2 Timóteo 3
3
Kurã tỹ ẽgno to hã vẽjykre
1Ga tỹ tũ' henh ke to hã ẽg tóg nén ũ jagy ve kãn ke mũ. Vẽnh kar tỹ vẽjykre pãno han mũ ve jé ẽg tóg ke mũ. 2Ag jykre hã han sór jé ag tóg ke mũ. Nén ũ kar to én jé ag tóg ke mũ, ag riko nỹtĩ jé. Jagnẽ to vĩ kónãn jé ag tóg ke mũ. Ag panh vĩ ki hã han ke tũ ag tóg nĩ. “Kórég ti nĩ,” he jé ag tóg ke mũ, ũ tỹ ag mỹ nén ũ há nĩm mũ ra. Topẽ to ag é henh ke mũ gé. 3Jagnẽ to kórég ag nỹtĩnh mũ, ag krẽ to ke gé. Jagnẽ mỹ vẽnh pãte fón ke tũ ag nĩ gé. Jagnẽ to ag ónón ke mũ. Vẽso jykrén ke tũ ag tóg nĩ. Ag tỹ ũ vóg kónãn kỹ tóg ag mỹ sér tĩnh mũ. Vẽjykre há kato tẽ jé ag tóg ke mũ. 4Ag régre ag vatánh tá ag tóg ag to vĩ kónãn ke mũ gé. Ũ tỹ ag jykre kórég to ag vóg kónãn ke tag kamẽg ke tũ ag nĩ. Vẽso ag tóg: “vẽnh kar kãfór vỹ tỹ inh nĩ,” henh ke mũ gé. Ag tỹ Topẽ to há nỹtĩnh ke vẽ vẽ. Hã ra ag tóg ag tỹ nén to én mũ ẽn hã han sór ke mũ. 5Ón kỹ ag tóg Topẽ to há nỹtĩ ve nĩnh mũ, hã ra ag tóg ti jykre han sór ke tũ nĩ. Ti tỹ ẽg tar han tĩ tag vỹ ag mỹ há tũ nĩnh mũ. Ũ tỹ ge ag tovãnh nĩ, vỹ.
6Ag kã mĩ ũ ag vỹ ĩn kar mĩ mũnh mũ. Kỹ ag tóg ũn tỹtá kórég fag mré vẽmén sór ke mũ, ũ tỹ Topẽ vĩ mranh tĩ fag, ũn én (ka)mẽ fag. 7Ón kỹ fag tóg vẽnh kanhrãn to tar nỹtĩnh mũ. Hã ra fag tóg vẽnh vĩ há ki kagtĩg nỹtĩ. Hã kỹ fag tóg ag tỹ fag mỹ nén tó mũ ki hã han mũ. 8Ũ tỹ fag mré vẽmén mũ ẽn ag vỹ Topẽ vĩ kato tẽ nỹtĩ, vẽnh vĩ há ẽn kato. Vãsỹ Janes vỹ Moisés vĩ kato tẽ ja nĩgtĩ, Jambres ti ke gé. Ẽn ag ri ke ag nỹtĩ. Topẽ vĩ kato tẽ ag tóg tĩ. Ón kỹ ag tóg Jesus ki ge kỹ nỹtĩ ve nĩ, ag tỹ ón kỹ ti vĩ tón kỹ. 9Hã ra ũn e vỹ ag vĩ kri finh ke tũ nĩ, ha vem nĩ. Vẽnh kar vỹ ag krĩ tũ tag venh ke mũ, ha vem nĩ. Janes mré Jambres ri ke han jé ag tóg ke mũ. Vẽnh kar vỹ ag krĩ tũ ki kanhró ja nỹtĩgtĩ gé.
Ẽg tỹ nén jagy vẽnh ke mũ
10Ag jãvo ã tóg inh vĩ kri fig tĩ, Timóteo'. Isỹ nén han mũ ẽn ri ke han ã tóg tĩ. Isỹ nén ve sór mũ ẽn ve sór ã tóg tĩ gé. Isỹ Jesus ki rã ri ke han ã tóg tĩ gé. Isỹ komẽr hã vĩ ri ke han ã tóg tĩ gé. Isỹ vẽnh kar to há nĩ ri ke han ã tóg tĩ gé. 11Ag tỹ inh vóg kónãn ve ja ã nĩ gé, isỹ nén ũ jagy vég tĩ ẽn ti. Inh vóg kónãn tỹ hẽn ri ke han ja ag tóg nĩ, Antioquia tá, Icônio tá, Listra tá ke gé. Ter kren pẽ han inh, tá. Hã ra ẽg Senhor tóg ijy nĩgãn. 12Ha vé, ẽg tỹ Jesus Cristo jykre mĩ mũn kỹ ẽg kar tóg ag tỹ ẽg vóg kónãn venh ke mũ. 13Ẽg jãvo ũn jykre pãno ag vỹ komẽr hã vẽjykre pãno han kãn kỹ nỹtĩ, ũn ónón mũ ag ke gé. Ũ ag lograr (ke) he ag tóg tĩ, hã ra ag tóg ag lograr (ke) he tĩ gé, vẽnh kato.
14Ag jãvo isỹ ã mỹ nén tó ja ẽn mĩ tĩg nĩ, ã tỹ nén mẽ ja kar ẽn mĩ, ã tỹ ki rã kỹ jẽ ẽn mĩ. Isỹ ã kanhrãn ja ẽn to tar nĩm nĩ. Inh jykre ki kanhró ã tóg nĩ. 15Ã sĩ kã ã tóg Topẽ vĩ mẽ, ti vĩ tỹ rán kỹ nĩ ẽn. Ẽn to jãn kỹ ã tóg ki kanhrãn mũ, ẽg tỹ Jesus Cristo ki rã tugrĩn krenkren ke mũ ti.
16Ũ tỹ hẽn ri ke ag vỹ Topẽ vĩ ránrán ja nĩgtĩ. Hã ra Topẽ kuprĩg tóg ag mỹ tó ja nĩgtĩ, ag tỹ nén rán ke ti. Ti vĩ rán kỹ nĩ to ken kỹ ẽg tóg vẽnh vĩ há ki kanhrãn mũ. Kỹ ẽg tóg kãmén há han ke mũ gé. Ẽg mỹ tóg ẽg tỹ kygnẽ ja ẽn ven tĩ. Kỹ ẽg tóg jagnẽ jyvẽn ke mũ gé. 17Topẽ tũ vỹ tỹ ẽg nỹtĩ. Ti pijé ẽg tỹ kygnẽ ve sór mũ'. Ẽg tỹ kygnẽg tũ nĩn kỹ ẽg tóg nén ũ há kar han to tar nỹtĩ. Ti tỹ tag ve sór vẽ, hã jé tóg ẽg mỹ ti vĩ jẽnẽ ja nĩgtĩ.
Currently Selected:
2 Timóteo 3: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido