2 Timóteo 2
2
Ẽg vãsãn ke
1Inh kósin', Jesus Cristo ne ã tar han ke mũ', kỹ krónh ke tũg nĩ. 2Inh vĩ mẽ ã, sỹ ũn e ag kanhrãn kỹ. Tag tóm nĩ gé, inh kóm, ũ tỹ krónh ke tũ ag mỹ.
3Ẽg tỹ Jesus tugrĩn vẽsỹrénh ke to tar nĩm nĩ inh mré, Timóteo'. Jesus Cristo soldado ri ke ẽg nỹtĩ. 4Soldado jykre tag to jykrén nĩ. Ag pijé vyr mỹ jykrén tĩ'. Ag pã'i vĩ ki hã han ag tóg tĩ, ti tỹ ag to há nĩ jé. Hã kỹ ag tóg vyr mỹ gỹj ve sór tũ nĩgtĩ.
5Kỹ ũ tỹ corrida han mũ ag jykre to jykrén nĩ gé. Corrida to vẽjykre ẽn hã han ag tĩ, ag tỹ gỹjỹ he jé. Ag ri ke han nĩ, Timóteo'.
6Kỹ ẽpỹ ki rĩr tĩ ag vỹ rãnhrãj mág han tĩ gé, hã kỹ ag tóg krãn kỹ ti kanẽ ko tĩ. Ag ri kén ã tóg venh ke mũ gé, ã tỹ nén ve sór mũ ti, ã rãnhrãj to, ha vem nĩ.
7Tag to jykrén há han nĩ, sỹ ã mỹ tó mũ tag to. Kỹ ẽg Senhor vỹ ã tỹ to jykrén há tãvĩ han ke mũ sir. 8Jesus Cristo mĩ ẽkrén nĩ. Ti ter kar kỹ tóg rĩr mãn. Ti jógjóg ve vỹ tỹ Davi ja nĩgtĩ. Hã tó sóg tĩ, ti kãmén kỹ. 9Hã kỹ sóg se kỹ jẽ, ferro tỹ mỹr. “Ti hỹn tỹ ũn jykre pãno nĩ,” he ag tóg tĩ iso. Hã kỹ ag tóg ferro tỹ isé. Hã ra Topẽ vĩ pijé se kỹ nĩ nĩ'. Tã mĩ tóg tĩ ha. 10Hã kỹ sóg ise kỹ jẽ hã ra ti to tar nĩ, Topẽ tỹ ũn kuprẽg mũ ag jagfy, ag krenkren jé, ag tỹ Jesus Cristo ki ge tugrĩn kanhkã tá junjun jé. 11Vẽnh vĩ há vẽ, tag ti, ha mẽ: ẽg tỹ ti tugrĩn kãgter mũ ra ẽg tóg ti mré rĩnrĩr mãn ke mũ gé. 12Ẽg tỹ ti tugrĩn nén ũ jagy kar to tar nỹtĩn kỹ ẽg tóg ti mré tỹ ũn mág nỹtĩnh ke mũ gé. Ẽg tỹ ti tovãnh kỹ tóg ẽg tovãnh ke mũ gé. 13Ẽg tỹ ti to krónh ke tĩ ra tóg ẽg to krónh kenh ke tũ nĩ jãvo. Ti pijé ón tĩ', hã kỹ tóg ẽg to krónh kenh ke tũ nĩ.
Topẽ rãnhrãj han há han ke
14Tag tóm nĩ, vẽnh kar mỹ. Tỹ ag jyvẽn nĩ, kỹ ag jyvẽn tar han nĩ gé. Topẽ vỹ ã vĩ mẽnh mũ. Ag mỹ: “ẽg kato tẽ ag vĩ kafãn sór tũg nĩ,” hem nĩ. “Jagnẽ vĩ kafãn pijé ẽg tar han mũ'. Ũ tỹ tag mẽ kỹ tóg krónh ke sór mũ,” hem nĩ ag mỹ. 15Vãsãn ra, Topẽ tỹ ã rãnhrãj to: “há ti nĩ,” he jé, ã tỹ ã rãnhrãj to mỹ'ãg tũ nĩ jé. Topẽ vĩ to vãsãn nĩ, ã tỹ ki kanhrãn há han jé, ã tỹ vẽnh kar mỹ tó há han jé gé. 16Ũ tỹ kanhir kỹ nén ũ kórég tó kỹ jẽmẽ sór tũg nĩ. Ũ tỹ ge ag vỹ Topẽ to kórég tãvĩ nỹtĩ. Kỹ ag vĩ vỹ ag kókén ke mũ, kỹ tóg ag jykre pãno pẽ han mũ. 17Vẽnh vĩ tỹ ge vỹ ẽg kar kókén ke mũ, komẽr hã, ti tỹ vẽnh kar kri rũm ken kỹ. Vẽnh kaga kórég tỹ vẽnh kar kri rũm ke ri ke ti nĩ.
Ũ tỹ vẽnh vĩ tỹ ge han mũ vỹ tỹ Himeneu nĩ gé, Fileto ke gé. 18Tag ag vỹ ónón tĩ, Topẽ vĩ to. “Rĩr mãn ri ke han ẽg huri, ẽg tỹ Cristo ki gen kỹ. Hã kỹ ẽg rĩnrĩr mãn ke tũ nĩ ha, ẽg ter kar kỹ, Jesus kãtĩg mãn kỹ,” he ag tóg tĩ. Ag tỹ tag tó kỹ ag tóg ũ ag tỹ Jesus to krónh ke han tĩ. Kỹ ag tóg Cristo tovãnh mũ, ag tugrĩn.
19Ẽg tỹ ĩn han kỹ ẽg tóg ti nũna ẽn tar han tĩ. Ẽn ri ke ti nĩ, Topẽ jykre ti. Kỹ tóg tũ' henh ke tũ nĩ, ũ ag tỹ ón kỹ to vĩ mũ hã ra. Ẽg tỹ ti ki ge kỹ nỹtĩn kỹ tag vỹ ẽg to rán kỹ nĩ, ha mẽ: “ẽg Senhor vỹ ti tũ ag ki kanhró nĩ,” he tóg mũ.
Kar kỹ tóg: “vẽjykre pãno tovãnh kãn ra, ãjag tỹ: inh Senhor vỹ tỹ ti nĩ, Jesus ti, he jé,” he mũ.
20Ha vé, ĩn mág krẽm kukrũ vỹ e nỹtĩ. Ũ vỹ ouro tỹ há nỹtĩ. Ũ vỹ prata tỹ há nỹtĩ. Kỹ ũ vỹ ka tỹ há nỹtĩ gé. Ũ vỹ go'or tỹ há nỹtĩ gé. Kukrũ há vỹ tỹ vẽjẽn né nĩ, kỹ ũn kórég vỹ tỹ vãfár né nĩ gé. 21Kỹ tóg ge nĩ. Ũ tỹ kanhir kỹ nén ũ kórég tó (ka)mẽ ẽn ag vỹ kukrũ kórég ri ke nỹtĩ. Hã kỹ Topẽ tóg ag mỹ: “inh rãnhrãj han ra,” henh ke tũ nĩ sir. Ẽg tỹ ti kórég tovãnh kãn kỹ ẽg tóg kukrũ há ri ke nỹtĩ. Kỹ Topẽ tóg ẽg mỹ: “inh rãnhrãj han nĩ,” henh ke mũ gé sir.
22Kyrũ ag vỹ nén ũ kar to én (ka)mẽ nỹtĩ. Ẽn tovãnh kãn nĩ. Vẽjykre há hã mĩ tĩg sórm nĩ. Jesus ki rã há han nĩ. Vẽnh kar to há nĩm nĩ. Krĩ kuprã nĩm nĩ, ũ tỹ tỹ ẽg Senhor mré ke ag to, ũn jãnhkri ag to, vẽnh kar to ke gé.
23Ũ ag tóg ón kỹ: “Topẽ hỹn tag tó sór mũ, ti tỹ ẽn tó kỹ,” he sór tĩ. Topẽ tỹ nén tó vãnh ẽn tó sór ag tóg tĩ. Tag tugrĩn jagnẽ to jũ tóg kutẽ tĩ. Hã kỹ ag mré to jykrén sór tũg nĩ. 24Ũ tỹ Topẽ mỹ rãnhrãj tĩ jé vẽnh kar to há nĩ. Ti tỹ kãnhmar ag to jũn kỹ tóg kórég nĩ. Ti tỹ komẽr hã vĩ kỹ tóg há tĩ, ag kanhrãn jé, vẽnh kar to fe há nĩn kỹ. 25Ũ tóg ti vĩ kafãn sór mũ. Ẽn mỹ ã tóg vĩ há han ke mũ. Komẽr hã ã tóg ag mỹ Topẽ vĩ tónh ke mũ, Topẽ tỹ ag jagãgtãn jé, ag tỹ ag jykre pãno tovãnh kỹ vẽnh vĩ há hã nón mũ jé. 26Kỹ ag krĩ há nỹtĩnh mũ. Japo tũ vỹ tỹ ag nỹtĩ ja nĩgtĩ, ti tỹ ag sigse ja nĩn kỹ, ag tỹ ti rãnhrãj han jé. Ag tỹ ti tovãnh kỹ Topẽ tóg ag krenkren han ke mũ. Kỹ tóg ag tỹ Japo jykre tag to vẽnh nenh to ag tar han ke mũ, ẽg ke gé. Kỹ tóg há tĩ.
Currently Selected:
2 Timóteo 2: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido