2 Corinto 5

1Ẽg fár vỹ ẽg pãjó ri ke nĩ. Tũ' he jé tóg ke mũ. Hã ra Topẽ ne ẽg mỹ ĩn tãg ri ke han ke mũ', kanhkã tá'. Hã ra tóg ẽg tỹ tag ki ĩn han ri ke tũ nĩ. Tũ' henh ke tũ tóg nĩ. 2Tag ki ẽg tóg vẽsỹrénh tĩ. Kỹ tóg ẽg tỹ kanhkã tá ẽg jamã tãg ẽn venh há tĩ. Kỹ tóg ẽg tỹ kur tãg tu ri ke nĩ. 3Ẽg tỹ kur tu kỹ ẽg kator tũ nỹtĩ. Kanhkã tá ẽg jamã vỹ ẽg mỹ kur ri ke nĩ, ẽg tỹ ẽg fár tãg tun kỹ. 4Ha vé, tag ki ẽg tóg vẽsỹrénh tĩ, ẽg ter jãvãnh nỹtĩn kỹ. Ẽg mỹ tóg ẽg rĩr tag hã tỹ kanhkã tá jun há tĩ vẽ. Ẽg tỹ ẽg fár tãg ve kỹ ẽg fár si tóg tũ' henh mũ, ẽg ter tũ ra. 5Ẽg tỹ kanhkã tá ẽg fár tãg ve jé Topẽ tóg ẽg mỹ vẽjykre nĩm. Hã jé tóg ẽg mỹ ti kuprĩg jẽnẽ gé.

6Hã kỹ tóg inh mỹ sér tĩ. Ẽg tỹ ga kri mũn kỹ ẽg tóg ẽg Senhor vég tũ nĩgtĩ ver. 7Ẽg tỹ ti vég tũ ra ẽg tóg ti vĩ kri fig tĩ. 8Kỹ sóg kanẽ jur mãn tũ nĩ ha. Isỹ inh fár tỹ pãjó ri ke tag tovãnh há tóg tĩ, isỹ ẽg Senhor mré nĩ jé, inh jamã pẽ tá. 9Hã kỹ sóg vãsãn tĩ, inh jykre tỹ ti mỹ há nĩ jé, tag ki, tá ke gé.

10Ha vé, ẽg kar vỹ Cristo mỹ vẽnh ven ke mũ, ti tỹ ẽg jykre tugnỹm jé. Kỹ tóg ẽg mỹ ẽg kaja ti nĩm ke mũ. Ũ tỹ tag ki nén (ũ) há han mũ ẽn tóg ti tũ kaja venh ke mũ gé, kỹ ũ tỹ tag ki nén ũ kórég han mũ ẽn ag tóg ag vẽsỹrénh venh ke mũ gé sir.

Cristo tỹ ẽg jykre pãno tỹ tũ' he

11Ha vé, ẽg Senhor kamẽg sóg tĩ, hã kỹ sóg ẽprã ke ag mỹ ki hã tó tĩ, ag tỹ ti ki ge jé. Topẽ hã ne inh ki kanhró kar nĩ'. Kỹ ãjag hỹn inh jykre ki kanhró nỹtĩnh ke mũ gé, ãjag tỹ sỹ nén han mũ tugnỹm kỹ. 12Inh pijé ãjag mỹ: “ũn mág vỹ tỹ inh nĩ,” he sór tĩ'. Hã ra sóg ãjag mỹ vẽnh kãmén mũ, ti tỹ ãjag mỹ sér tĩ jé, ãjag tỹ iso: “jykre há tãvĩ ti nĩ,” he jé. Tag tóm nĩ, ũ tỹ vẽsỹ ũn mág han sór mũ ag mỹ. Ũ tỹ ge jykre vỹ sĩnvĩ nĩ ve nĩ. Hã ra tóg ẽg tỹ ve há han kỹ kórég nĩ. 13Ha vé, krĩ tũ inh nẽji nĩ. Topẽ jykre han tugrĩn sóg krĩ tũ nĩ ve nĩ. Kejẽn sóg krĩ há han tĩ gé. Ãjag tugrĩn ke vẽ, inh krĩ há ti. 14Cristo hã vỹ tỹ inh fe nĩ, hã kỹ sóg vẽnh kar to há nĩ. Tag to sóg jykrén mũ, ha mẽ: vẽnh kar jagfy tóg ter ja nĩ, Cristo ti, kỹ ẽg kar jykre pãno vỹ tũ' he mũ sir. 15Ti hã ne vẽnh kar jagfy ter ja nĩ'. Hã kỹ ẽg pijé tỹ vẽsũ nỹtĩ', ũri'. Ti tũ vỹ tỹ ẽg nỹtĩ. Ẽg jagfy tóg rĩr mãn ja nĩ gé. Kỹ ti hã ne ẽg mỹ ẽg tỹ nén han ke mũ ẽn tó tĩ', ũri'.

16Vãsỹ ẽg tóg, ẽg tỹ vẽsóg ki nén ũ to jykrén kỹ ẽprã ke jykre to: “tag vỹ há nĩ, tag vỹ kórég nĩ,” he ja nĩgtĩ. Ũri ẽg tóg, vẽsóg ki tag to jykrén mãn ke tũ nĩ ha. Cristo to ẽg vẽsóg ki jykrén mãn ke tũ nĩ gé. 17Hẽ ri ken kỹ? Cristo tỹ ẽg han mãn kỹ mỹr. Ti ki ge kỹ ẽg nỹtĩ, hã kỹ tóg ẽg han mãn ja nĩ. Ẽg jykre pãno tóg tũ tĩ ha. Ũri ẽg tóg tỹ ũn tãg nỹtĩ ha, ẽg krĩ, ẽg jykre ti ke gé. 18Topẽ tỹ nén han mũn hã vẽ. Topẽ kato vãsãn ja ẽg nĩgtĩ vẽ, hã ra ẽg tóg ũri tỹ Cristo mré ke nỹtĩ ha. Kỹ tóg ẽg mỹ vẽnh rãnhrãj tag nĩm mũ gé sir, ẽg tỹ vẽnh kar mỹ: tỹ Cristo mré ke nỹtĩm nĩ, he jé. 19Ha vé, Topẽ vỹ Cristo jẽnẽ, ẽg tỹ ti ki ge jé. Kỹ tóg ẽg tỹ ti vĩ mranh tỹ tũ' he mũ gé sir, ẽg tỹ ti kaja kórég vég tũ nĩ jé. Kỹ tóg ẽg mỹ: “ha vẽnh kar mỹ tó, isỹ ag to há nĩ sór mũ ti,” he ja nĩ gé.

20 Cristo hã ne inh jẽnẽg mũ', isỹ ti jiji tó jé. Kỹ Topẽ tóg vẽnh kar jyvẽn tĩ. Hã kỹ sóg, Cristo jiji tó kỹ ãjag mỹ: “Topẽ to há nỹtĩm nĩ, ti kato vãsãn mãn sór tũg nĩ,” he mũ. 21Jesus pijé Topẽ vĩ mranh ja nĩgtĩ'. Hã ra tóg ẽg tỹ ti vĩ mranh ja ẽn kajãm kãn. Kỹ tóg ẽg mỹ Topẽ jykre kuryj ẽn nĩm mũ sir, ẽg jagfy kajãm kar kỹ.

Currently Selected:

2 Corinto 5: kgp

Highlight

Copy

Compare