Colosenses 1
1
Xqꞌuebal xsahileb xchꞌo̱l
1La̱in laj Pablo. La̱in x-apóstol li Jesucristo xban nak joꞌcan quiraj li Dios. Cuochben li hermano Timoteo nak yo̱quin chixtzꞌi̱banquil li hu aꞌin. 2Yo̱quin chi tzꞌi̱bac e̱riqꞌuin la̱ex li cuanquex aran Colosas. La̱ex ac xepa̱b chi tzꞌakal li Jesucristo. La̱ex chic kech aj pa̱banelil ut rehex chic li Dios. Aꞌ taxak li Dios li kaYucuaꞌ chi-osobtesi̱nk e̱re ut tixqꞌue taxak e̱re li tuktu̱quil usilal.
Laj Pablo quitijoc chirixeb laj pa̱banel
3Nak nocotijoc che̱rix junelic nakabantioxi chiru li Dios lix Yucuaꞌ li Ka̱cuaꞌ Jesucristo. 4Nakabantioxi chiru li Dios xban nak xkabi resil nak cau e̱chꞌo̱l chixpa̱banquil li Jesucristo ut xkabi ajcuiꞌ resil nak nequera chixjunileb le̱ rech aj pa̱banelil. 5Nak xerabi resil li colba-ib, xerabi ajcuiꞌ resil li sahil chꞌo̱lejil cꞌu̱lanbil saꞌ choxa chokꞌ e̱re. Xban nak yo̱quex chixyoꞌoninquil aꞌan, nequexpa̱ban ut nequera le̱ rech aj pa̱banelil. 6Chanru nak xerabi resil li colba-ib la̱ex, joꞌcan ajcuiꞌ nak yo̱queb chirabinquil saꞌ chixjunil li ruchichꞌochꞌ. Nabal yo̱queb chi jalac lix naꞌlebeb joꞌ nak xjala le̱ naꞌleb la̱ex chalen nak xerabi resil li colba-ib ut quetau ru chi tzꞌakal li rusilal li Dios. 7Lix ya̱lal aꞌan quichꞌoloba̱c che̱ru xban laj Epafras. Aꞌan kochben chi cꞌanjelac chiru li Cristo ut raro kaban. Aꞌan jun cha̱bil aj cꞌanjel che̱ru saꞌ xcꞌabaꞌ li Jesucristo. 8Laj Epafras quiyehoc ke nak la̱ex nequera e̱ras e̱ri̱tzꞌin xban nak li Santil Musikꞌej cuan e̱riqꞌuin. 9Ut chalen nak quikabi resil nak xexpa̱ban, joꞌcan nak junelic nocotijoc che̱rix. Nakatzꞌa̱ma chiru li Dios nak tixcꞌut che̱ru cꞌaꞌru naraj te̱ba̱nu. Ut nakatzꞌa̱ma ajcuiꞌ chiru li Dios nak li Santil Musikꞌej tixqꞌue e̱naꞌleb chixtaubal ru lix ya̱lal. 10Nocotijoc che̱rix re nak ti̱cak le̱ yuꞌam xban nak rehex chic li Ka̱cuaꞌ ut sahak saꞌ xchꞌo̱l li Dios e̱riqꞌuin. Junelic cheba̱nuhak li us ut chetauhak ru chi tzꞌakal lix lokꞌal li Dios. 11Nakatzꞌa̱ma chiru li Dios re nak cua̱nk xcacuil e̱chꞌo̱l xban xnimal xcuanquil li Dios. Chisahokꞌ saꞌ e̱chꞌo̱l ut checuyak xnumsinquil li cꞌaꞌak re ru nachal saꞌ e̱be̱n ut incꞌaꞌ ta̱chꞌina̱nk e̱chꞌo̱l. 12Chebantioxi chiru li Acuabej Dios li quiqꞌuehoc ke chitzꞌako̱nk riqꞌuin li sahil chꞌo̱lejil kochbeneb laj pa̱banel li ac xeꞌxtau xya̱lal. 13Li Dios corisi rubel xcuanquil laj tza ut coxkꞌaxtesi rubel xcuanquil li Cꞌajolbej li kꞌaxal raro xban li Dios. 14Li Ralal li Dios quicam chiru li cruz re kacolbal ut quixcuy quixsach li kama̱c.
Xban xcamic li Jesucristo, cuanco chic saꞌ usilal riqꞌuin li Dios
15Li Dios incꞌaꞌ na-ilman ru. Abanan nakanau chanru li Dios xban nak li Ralal quicꞌulun saꞌ ruchichꞌochꞌ chixcꞌutbal chiku. Li Jesucristo aꞌan li kꞌaxal nim xcuanquil chiruheb chixjunil li queꞌyoꞌobtesi̱c. 16Saꞌ xcꞌabaꞌ aꞌan, li Dios quixyoꞌobtesi chixjunil li cꞌaꞌak re ru cuan saꞌ choxa, joꞌ ajcuiꞌ li cuan saꞌ ruchichꞌochꞌ. Li Dios quixyoꞌobtesi chixjunil li na-ilman ru, joꞌqueb ajcuiꞌ chixjunileb li musikꞌej, li incꞌaꞌ na-ilman ru. Aꞌ yal chanru lix cꞌanjel li junju̱nk ut lix cuanquileb, li Dios quiyoꞌobtesin reheb saꞌ xcꞌabaꞌ li Jesucristo ut aꞌan laj e̱chal reheb. 17Li Cristo ac cuan ajcuiꞌ chak nak toj ma̱jiꞌ nequeꞌyoꞌobtesi̱c li cꞌaꞌak re ru. Ut chixjunil li cꞌaꞌak re ru quiyoꞌobtesi̱c qꞌuebil saꞌ xnaꞌaj ut aran quicana xban nak li Cristo aꞌan yal re saꞌ xbe̱n. 18Ut aꞌan ajcuiꞌ najolomin ke la̱o aj pa̱banel ut junajo chic riqꞌuin li Cristo. Aꞌan li naqꞌuehoc re li kayuꞌam. Aꞌan li xbe̱n quicuacli cuiꞌchic chi yoꞌyo saꞌ xya̱nkeb li camenak ut aꞌan li kꞌaxal nim xcuanquil saꞌ xbe̱n chixjunil. 19Li Jesucristo, aꞌan tzꞌakal Dios ut riqꞌuin aꞌan cuan chixjunil li cuanquilal xban nak joꞌcan quiraj li Acuabej Dios. 20Xban xcamic li Jesucristo, chixjunil li cuan saꞌ choxa joꞌ ajcuiꞌ li cuan saꞌ ruchichꞌochꞌ naru ta̱cua̱nk chi sum a̱tin riqꞌuin li Dios. Ut xban lix quiqꞌuel li quihoyeꞌ chiru li cruz, li Jesucristo quixqꞌue li tuktu̱quil usilal. 21Junxil incꞌaꞌ nequepa̱b li Dios. Ut xban li ma̱usilal cuan saꞌ le̱ chꞌo̱l, xicꞌ nequeril li Dios ut junes li incꞌaꞌ us nequeba̱nu. 22Abanan anakcuan xban lix camic li Cristo quexcꞌam saꞌ usilal riqꞌuin li Dios. Xban nak li Cristo quicam saꞌ kacꞌabaꞌ, naru toxkꞌaxtesi chiru li Dios chi ac santobresinbilo ut chi ma̱cꞌaꞌak chic kama̱c ut chi tzꞌakalak re ru li kapa̱ba̱l. 23Abanan tento nak texpa̱ba̱nk chi tzꞌakal ut cauhak e̱chꞌo̱l riqꞌuin li Dios saꞌ le̱ pa̱ba̱l. Me̱canab xyoꞌoninquil li yechiꞌinbil e̱re saꞌ xcꞌabaꞌ li colba-ib xban nak la̱ex ac nequenau nak saꞌ e̱cꞌabaꞌ quicam li Jesucristo. Ut li resil li ac xerabi la̱ex yo̱queb chirabinquil saꞌ chixjunil li ruchichꞌochꞌ. La̱in laj Pablo, tenebanbil saꞌ inbe̱n xyebal resilal li colba-ib.
Laj Pablo cau xchꞌo̱l chi cꞌanjelac saꞌ xya̱nkeb li ma̱cuaꞌeb aj judío
24La̱in nasahoꞌ saꞌ inchꞌo̱l nak yo̱quin chixcꞌulbal li raylal saꞌ e̱cꞌabaꞌ. Li Cristo quixye nak teꞌxcꞌul li raylal li ralal xcꞌajol. Joꞌcan nak nasahoꞌ saꞌ inchꞌo̱l nak yo̱quin chi tzꞌako̱nc riqꞌuin li raylal joꞌ quixcꞌul li Cristo saꞌ xcꞌabaꞌeb chixjunileb li nequeꞌpa̱ban re. 25Li Dios xinixqꞌue chi cꞌanjelac chiruheb laj pa̱banel. Joꞌcan nak re e̱tenkꞌanquil nak nincꞌanjelac che̱ru re xchꞌolobanquil chi tzꞌakal lix ya̱lal li ra̱tin li Dios. 26Li xya̱lal aꞌan mukmu chiruheb chixjunileb nak quicuan chak junxil. Abanan anakcuan moco mukmu ta chic. Li Dios yo̱ chixcꞌutbesinquil chiruheb li nequeꞌpa̱ban re. 27Li Dios quiraj nak la̱ex li ma̱cuaꞌex aj judío, te̱nau nak e̱re ajcuiꞌ li colba-ib. Li resil aꞌan mukmu nak quicuan chak. Abanan anakcuan nanauman nak lix ya̱lal li lokꞌlaj esil, aꞌan aꞌin: Nak li Cristo cuan e̱riqꞌuin ut saꞌ xcꞌabaꞌ aꞌan textzꞌako̱nk riqꞌuin lix nimal xlokꞌal li Dios. 28Aꞌ li Cristo, aꞌan li nakachꞌolob xya̱lal. Nakaqꞌue xnaꞌlebeb chixjunil ut nakacꞌut xya̱lal chiruheb chi anchal li kachꞌo̱l ut chi anchal li kacꞌaꞌux re nak tzꞌakalak ru lix pa̱ba̱leb saꞌ xcꞌabaꞌ li Jesucristo. 29Joꞌcan nak ninyal inkꞌe chi cꞌanjelac chi anchal inchꞌo̱l ut li Cristo naqꞌuehoc incacuilal chixba̱nunquil lin cꞌanjel chiru li Dios.
Currently Selected:
Colosenses 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.