Apocalipsis 8

Nak quiteheꞌ li xcuuk li sello

1Nak quixte li xcuuk sello li Jun li chanchan carner, ma̱ ani chic qui-ecꞌan saꞌ choxa. Mero o̱r na chꞌanamil queꞌcana. 2Ut quicuil cuukub li ángel xakxo̱queb chiru li Dios. Ut queꞌqꞌueheꞌ cuukub li trompeta reheb. 3Quichal jun chic li ángel ut quixakli chiru li artal yi̱banbil riqꞌuin oro. Cuan chak saꞌ rukꞌ jun xnaꞌaj li incienso yi̱banbil riqꞌuin oro. Quiqꞌueheꞌ nabal li incienso re, re tixcꞌat saꞌ li artal li cuan chiru li cꞌojariba̱l, re nak cuotz ta̱cuulak toj riqꞌuin li Ka̱cuaꞌ rochben lix tijeb laj pa̱banel. 4Ut lix sibel li incienso li cuan saꞌ rukꞌ li ángel quicuulac riqꞌuin li Dios rochben lix tijeb laj pa̱banel. 5Ut li ángel quixchap li xnaꞌaj li incienso ut quixnujobresi riqꞌuin li ru xam li cuan saꞌ li artal, ut quixcut saꞌ ruchichꞌochꞌ. Nak quitꞌaneꞌ saꞌ ruchichꞌochꞌ naquililnac joꞌ nak namok li ca̱k, ut nareploc li rakꞌ ca̱k ut quicuan ajcuiꞌ hi̱c.

Li trompetas

6Ut eb li cuukub chi ángel queꞌxcauresi ribeb chixya̱basinquil li cuukub chi trompeta li cuan riqꞌuineb. 7Li xbe̱n ángel quixya̱basi lix trompeta. Ut quicuteꞌ saꞌ ruchichꞌochꞌ sakbach ut xam junajinbil riqꞌuin quicꞌ. Caꞌchꞌin chic ma̱ jun jachal (1/3) li ruchichꞌochꞌ quicꞌat. Ut queꞌcꞌat ajcuiꞌ li cheꞌ. Caꞌchꞌin chic ma̱ jun jachal li cheꞌ queꞌcꞌat ut quicꞌat chixjunil li rax pim. 8Ut li xcab ángel quixya̱basi lix trompeta. Chanchan jun li nimla tzu̱l yo̱ chi cꞌatc ut quicuteꞌ saꞌ li palau. Caꞌchꞌin chic ma̱ jun jachal li palau quisukꞌi chokꞌ quicꞌ. 9Ut caꞌchꞌin chic ma̱ jun jachal li xul li cuanqueb saꞌ li palau quilajeꞌcam. Ut caꞌchꞌin chic ma̱ yijach li ni̱nki jucub queꞌsacheꞌ. 10Ut li rox ángel quixya̱basi lix trompeta ut jun nimla chahim quitꞌaneꞌ chak saꞌ choxa. Yo̱ chi cꞌatc. Chanchan jun li chaj yo̱ xxamlel. Caꞌchꞌin chic ma̱ yijach li nimaꞌ ut caꞌchꞌin chic ma̱ yijach li yuꞌam haꞌ li quinak cuiꞌ. 11Li chahim aꞌan, Cꞌa xcꞌabaꞌ. Caꞌchꞌin chic ma̱ yijach li haꞌ quicꞌahoꞌ ut nabaleb li tenamit queꞌcam xban nak queꞌrucꞌ li cꞌahil haꞌ. 12Ut li xca̱ ángel quixya̱basi li trompeta ut caꞌchꞌin chic ma̱ yijach (1/3) li sakꞌe incꞌaꞌ chic quicutanoꞌ ru. Ut caꞌchꞌin chic ma̱ yijach li po incꞌaꞌ chic quicutanoꞌ ru. Ut caꞌchꞌin chic ma̱ yijach li chahim incꞌaꞌ chic queꞌlemtzꞌun. Caꞌchꞌin chic ma̱ yijach li cutan quikꞌojyi̱noꞌ ru. Ut joꞌcan ajcuiꞌ li po chiru li kꞌojyi̱n. Caꞌchꞌin chic ma̱ yijach li kꞌojyi̱n incꞌaꞌ quicutanoꞌ ru. 13Ut quicuil jun chanchan nimla cꞌuch yo̱ chi rupupic chiru choxa, ut yo̱ chixjapbal re chixyebal: —Cꞌajoꞌ li raylal, cꞌajoꞌ li raylal. Cꞌajoꞌ li raylal li ta̱cha̱lk saꞌ xbe̱neb li cuanqueb saꞌ ruchichꞌochꞌ nak teꞌya̱basi̱k li oxib chic chi trompeta xbaneb li oxib chi ángel, chan.

Currently Selected:

Apocalipsis 8: kek

Highlight

Copy

Compare