Apocalipsis 22

1Ut li ángel quixcꞌut chicuu li nimaꞌ li naqꞌuehoc yuꞌam chi junelic. Li haꞌ sak sak ru. Chanchan lem. Na-el chak cuan cuiꞌ lix lokꞌlaj cꞌojariba̱l li Dios ut li Jun li chanchan carner. 2Li nimaꞌ aꞌan nanumeꞌ saꞌ xyi li tenamit. Chire li nimaꞌ xcaꞌ pacꞌalil cuan li cheꞌ retalil li junelic yuꞌam. Cablaju pa̱y li ru naxqꞌue ut rajlal po nau̱chin. Lix xak nacꞌanjelac re xqꞌuebal xcacuilaleb lix ni̱nkal ru tenamit. 3Aran ma̱cꞌaꞌak chic ma̱usilal. Lix lokꞌlaj cꞌojariba̱l li Dios ta̱cua̱nk aran ut ta̱cua̱nk ajcuiꞌ lix lokꞌlaj cꞌojariba̱l li Jun li chanchan carner. Ut eb laj cꞌanjel chiru teꞌlokꞌoni̱nk re. 4Eb aꞌan junelic yo̱keb chirilbal ru ut tzꞌi̱banbilak lix cꞌabaꞌ saꞌ xpe̱quemeb. 5Aran ma̱cꞌaꞌak chic kꞌojyi̱n. Joꞌcan nak incꞌaꞌ chic ta̱cꞌanjelak reheb li sakꞌe chi moco li candil. Li Ka̱cuaꞌ Dios, aꞌan chic li ta̱cutanobresi̱nk reheb. Ut teꞌcua̱nk aran chi kꞌaxal sa saꞌ xchꞌo̱leb. Chanchanakeb chic rey.

Nak ta̱cha̱lk cuiꞌchic li Jesucristo

6Ut li ángel quixye cue: —Eb li a̱tin aꞌin tzꞌakal ya̱l ut us xpa̱banquil. Li Ka̱cuaꞌ Dios li nacꞌutbesin chiruheb lix profeta cꞌaꞌru teꞌxye, aꞌan xtakla chak lix ángel chixcꞌutbal chiruheb laj cꞌanjel li cꞌaꞌru ta̱cꞌulma̱nk chi se̱b.— 7Li Jesús quixye: —Qꞌuehomak retal. Chi se̱b tincha̱lk la̱in. Us xak re li ani naxcꞌu̱la saꞌ xchꞌo̱l li a̱tin li tzꞌi̱banbil saꞌ li hu aꞌin chirix li cꞌaꞌru talajcꞌulma̱nk mokon, chan. 8La̱in laj Juan li quin-abin ut quin-iloc re chixjunil li cꞌaꞌak re ru aꞌin. Nak acak xcuabi ut nak acak xcuil, quincuikꞌib cuib chiru li ángel li quicꞌutuc chicuu chixjunil li cꞌaꞌak re ru aꞌin re raj xlokꞌoninquil. 9Abanan li ángel quixye cue: —Ma̱ba̱nu chi joꞌcan. Mina̱lokꞌoni. La̱in yal aj cꞌanjelin joꞌ la̱at, joꞌeb ajcuiꞌ li profeta la̱ cuech aj pa̱banelil, joꞌqueb ajcuiꞌ li nequeꞌpa̱ban re li a̱tin li tzꞌi̱banbil saꞌ li hu aꞌin. Aꞌ li Dios, aꞌan li ta̱lokꞌoni ru, chan. 10Ut quixye ajcuiꞌ cue li ángel: —Ma̱muk chiruheb li tenamit lix ya̱lal li tzꞌi̱banbil saꞌ li hu aꞌin. Ma̱muk chiruheb li cꞌaꞌru ta̱cꞌulma̱nk xban nak cuulac re xkꞌehil nak ta̱cꞌulma̱nk li cꞌaꞌru tzꞌi̱banbil saꞌ li hu aꞌin. 11Li ani yo̱k chixba̱nunquil li ma̱usilal, xba̱nuhak li ma̱usilal. Ut li ani yo̱k chi ma̱cobc, xba̱nuhak li ma̱c. Li ani ti̱c xchꞌo̱l, yo̱k chixba̱nunquil li ti̱quilal. Li ani santobresinbil, chicua̱nk saꞌ santilal.— 12—Qꞌuehomak retal, chan li Jesús. —La̱in chi se̱b tincha̱lk ut tincꞌam chak le̱ kꞌajca̱munquil. Tinqꞌue xkꞌajca̱munquil li junju̱nk aꞌ yal chanru lix yehom xba̱nuhom. 13La̱in li Alfa ut li Omega. La̱in ac cuanquin chak saꞌ xticlajic li ruchichꞌochꞌ ut cua̱nkin ajcuiꞌ saꞌ rosoꞌjic.—#Saꞌ li versículo 22:13 saꞌ li griego naxye: La̱in li Alfa ut li Omega. Alfa naraj naxye “ac cuan ajcuiꞌ chak saꞌ xticlajic” ut li Omega naraj naxye nak “cua̱nk ajcuiꞌ saꞌ rosoꞌjic.” 14Us xak reheb li cuybil sachbil xma̱queb xban li Dios, xban nak eb aꞌan ta̱ru̱k teꞌxtzaca li ru li cheꞌ li retalil li junelic yuꞌam. Ut teꞌoc ajcuiꞌ saꞌ li oqueba̱l re li tenamit. 15Abanan li incꞌaꞌ useb xnaꞌleb incꞌaꞌ ta̱ru̱k teꞌoc saꞌ li tenamit aꞌan, chi moco laj tu̱l, chi moco laj coꞌbe̱t laj yumbe̱t, chi moco li nequeꞌxcamsi ras ri̱tzꞌineb ut eb li nequeꞌlokꞌonin jalanil dios joꞌqueb ajcuiꞌ li nequeꞌcuulac chiru balakꞌic ut ticꞌtiꞌic. 16Ut li Jesús quixye: —La̱in xintakla lin ángel a̱cuiqꞌuin re nak ta̱chꞌolob lix ya̱lal aꞌin reheb laj pa̱banel. La̱in li chanchanin xtux li cheꞌ. Quinyoꞌla saꞌ xya̱nkeb li ralal xcꞌajol li rey David. La̱in chanchanin li cak chahim li nalemtzꞌun chak toj ekꞌela, chan li Jesús. 17Li Santil Musikꞌej ut li ixakilbej nequeꞌxye: —Cha̱lkex.— Li ani ta̱abi̱nk re li a̱tin aꞌin, chixyehak ajcuiꞌ —cha̱lkex.— Li ani ta̱raj rucꞌbal li haꞌ, li retalil li junelic yuꞌam, chicha̱lk chi ucꞌac chi ma̱tan. 18Aꞌan aꞌin li tinye re li ani ta̱abi̱nk reheb li a̱tin li tzꞌi̱banbil saꞌ li hu aꞌin chirix li ta̱cꞌulma̱nk mokon: Cui ani tixqꞌue xtzꞌakob li a̱tin aꞌin, li Dios tixqꞌue li raylal saꞌ xbe̱n joꞌ tzꞌi̱banbil retalil saꞌ li hu aꞌin. 19Ut cui ani ta̱risi junak reheb li a̱tin li tzꞌi̱banbil saꞌ li hu aꞌin, ta̱isi̱k lix cꞌabaꞌ xban li Dios saꞌ li hu li tzꞌi̱banbil cuiꞌ lix cꞌabaꞌeb li cuanqueb xyuꞌam chi junelic. Aꞌan incꞌaꞌ ta̱oc saꞌ li santil tenamit, chi moco ta̱cua̱nk lix yuꞌam chi junelic joꞌ tzꞌi̱banbil retalil saꞌ li hu aꞌin. 20Li Jesús li nachꞌoloban xya̱lal li cꞌaꞌak re ru aꞌin naxye: —Relic chi ya̱l chi se̱b tincha̱lk.—

Joꞌcan taxak. Cha̱lkat, at Ka̱cuaꞌ Jesús.

21Aꞌ taxak li usilal li naxqꞌue li Ka̱cuaꞌ Jesucristo chicua̱nk e̱riqꞌuin che̱junilex la̱ex laj pa̱banel. Joꞌcan taxak.

Currently Selected:

Apocalipsis 22: kek

Highlight

Copy

Compare