Apocalipsis 21

Li Acꞌ Jerusalén

1Ut quicuil ajcuiꞌ jun acꞌ choxa ut jun acꞌ ruchichꞌochꞌ xban nak li xbe̱n choxa ut li xbe̱n ruchichꞌochꞌ ma̱cꞌaꞌ chic. Ac xsacheꞌ. Ut ma̱cꞌaꞌ chic li palau. 2Ut quicuil nak yo̱ chak chi cubec saꞌ choxa cuan cuiꞌ li Dios li santil tenamit, li Acꞌ Jerusalén. Cꞌajoꞌ xchꞌinaꞌusal. Chanchan jun li ixakilbej tikibanbil chi cha̱bil xban nak oc re chi sumla̱c. 3Ut quicuabi jun yo̱ chak chi a̱tinac cuan cuiꞌ li cꞌojariba̱l ut quixye chi cau xya̱b xcux: —Anakcuan ta̱cua̱nk li Dios riqꞌuineb li cristian. Aꞌanakeb li ralal xcꞌajol. Li Dios ta̱cua̱nk riqꞌuineb. Aꞌanak lix Dioseb. 4Ma̱cꞌaꞌak chic rahil chꞌo̱lej. Ma̱cꞌaꞌak chic li ca̱mc chi moco li ya̱bac chi moco li yotꞌecꞌ, chi moco li raylal xban nak chixjunil li cꞌaꞌak re ru aꞌan, ac xelajeꞌnumeꞌ.— 5Li cꞌojcꞌo saꞌ li cꞌojariba̱l quixye: —La̱in tinacꞌobresi chixjunil li cꞌaꞌak re ru.— Ut quixye ajcuiꞌ: —Tzꞌi̱ba retalil aꞌin xban nak li a̱tin aꞌin tzꞌakal ya̱l ut us xpa̱banquil.— 6Ut quixye cue: —Xtzꞌakloc ru chixjunil. La̱in li Alfa ut li Omega.#Saꞌ li versículo 21:6 saꞌ li griego naxye: La̱in li Alfa ut li Omega. Alfa naraj naxye “ac cuan ajcuiꞌ chak saꞌ xticlajic” ut li Omega naraj naxye nak “cua̱nk ajcuiꞌ saꞌ rosoꞌjic.” La̱in tinqꞌue chi ma̱tan li yuꞌam chi junelic re li ani ta̱raj joꞌ nak ta̱qꞌuehekꞌ chi ucꞌac li ani ta̱chakik re. 7Li ani tixcuy xnumsinquil li raylal ut incꞌaꞌ ta̱chꞌina̱nk xchꞌo̱l saꞌ lix pa̱ba̱l, aꞌan ta̱re̱chani chixjunil li cꞌaꞌak re ru aꞌin. La̱inak lix Dios ut aꞌanak li cualal incꞌajol. 8Abanan li cꞌaꞌru teꞌre̱chani li incꞌaꞌ useb xnaꞌleb, aꞌan li xxamlel li azufre li chanchan palau, aꞌan lix naꞌajeb li nequeꞌxucuac, ut eb li incꞌaꞌ nequeꞌpa̱ban, ut eb li queꞌxmux ru lix pa̱ba̱leb, ut eb li nequeꞌxcamsi ras ri̱tzꞌin, ut eb laj coꞌbe̱t laj yumbe̱t, ut eb laj tu̱l, ut eb li nequeꞌlokꞌonin jalanil dios, joꞌqueb ajcuiꞌ laj ticꞌtiꞌ. Li cꞌaꞌru teꞌre̱chani eb aꞌan, aꞌan li xcab camic nak teꞌcutekꞌ saꞌ li xam.— 9Quichal jun reheb li cuukub chi ángel li queꞌcuan li cuukub chi secꞌ riqꞌuineb, li cuan cuiꞌ li cuukub chi raylal li queꞌxcꞌul saꞌ rosoꞌjic, ut quixye cue: —Quim. Tincꞌut cha̱cuu li ixk li ta̱sumla̱k cuiꞌ li Jun li chanchan carner, chan. 10Riqꞌuin xcuanquil li Santil Musikꞌej, xinixcꞌam saꞌ xbe̱n jun li nimla tzu̱l najt xteram ut quixcꞌut chicuu li santil tenamit Jerusalén, yo̱ chak chi cubec saꞌ choxa riqꞌuin li Dios. 11Lix lokꞌal li Dios cuan riqꞌuin. Cꞌajoꞌ xchꞌinaꞌusal. Chanchan jun li terto̱quil pec jaspe. Kꞌaxal xchakꞌal ru ut nalemtzꞌun joꞌ li lem. 12Li tenamit sutsu saꞌ jun nimla tzꞌac najt xteram ut cuan cablaju li oqueba̱l. Cablaju chi ángel cuanqueb saꞌ eb li oqueba̱l. Chiru li oqueba̱l tzꞌi̱banbil retalileb li xcꞌabaꞌeb li cablaju xte̱paleb li ralal xcꞌajol laj Israel. 13Oxib li oqueba̱l cuan saꞌ li norte, oxib cuan saꞌ li sur, oxib cuan bar na-el cuiꞌ li sakꞌe ut oxib cuan bar na-oc cuiꞌ li sakꞌe. 14Cablaju li pec li qui-oc chokꞌ xcimiento li tzꞌac li sutsu cuiꞌ li tenamit. Ut chiruheb aꞌan tzꞌi̱banbil retalileb lix cꞌabaꞌeb li cablaju chi apóstol li queꞌcꞌanjelac chiru li Jun li chanchan carner. 15Li ángel li quia̱tinac cuiqꞌuin cuan jun lix bisleb riqꞌuin yi̱banbil riqꞌuin oro re xbisbal li tenamit ut li oqueba̱l joꞌ ajcuiꞌ li tzꞌac. 16Ca̱ xucu̱t li tenamit nak quicuil. Lix nimal rok juntakꞌe̱t riqꞌuin xnimal ru. Li ángel quixbis li tenamit riqꞌuin lix bisleb. Cuib mil kilómetro riqꞌuin cuib ciento kilómetro lix bisbal. Juntakꞌe̱t xbisbal li rok, li ru ut lix teram. 17Chirix aꞌan quixbis li tzꞌac li sutsu cuiꞌ li tenamit. Lix bisbal aꞌan o̱b xca̱cꞌa̱l metro (65). Li ángel quixbis li tzꞌac joꞌ nequeꞌbisoc saꞌ ruchichꞌochꞌ. 18Li tzꞌac yi̱banbil riqꞌuin li cha̱bil pec jaspe. Li tenamit yi̱banbil riqꞌuin tzꞌakal oro. Nalemtzꞌun. Chanchan lem. 19Li pec li qui-oc chokꞌ xcimiento li tenamit cuan xsahob ru yi̱banbil riqꞌuin qꞌuila pa̱y ru chi terto̱quil pec. Li xbe̱n pec, aꞌan li cha̱bil pec jaspe; lix cab, aꞌan zafiro; li rox, aꞌan ágata; li xca̱, aꞌan esmeralda. 20Li roꞌ, aꞌan ónice; li xcuak, aꞌan cornalina; li xcuuk, aꞌan crisólito; li xcuakxak, aꞌan berilo; ut li xbele, aꞌan topacio; li xlaje, aꞌan crisopraso; li xjunlaju, aꞌan jacinto; ut li xcablaju, aꞌan amatista. 21Li cablaju chi oqueba̱l, yi̱banbileb riqꞌuin cablaju chi terto̱quil perla, jun saꞌ li junju̱nk chi oqueba̱l. Eb li be saꞌ li tenamit yi̱banbileb riqꞌuin tzꞌakal oro. Nalemtzꞌun. Chanchan lem. 22Quicuil nak saꞌ li tenamit aꞌan ma̱cꞌaꞌ lix templo li Ka̱cuaꞌ bar teꞌxic li tenamit chi lokꞌoni̱nc. Ma̱cꞌaꞌ chic aj e xban nak li Ka̱cuaꞌ li kꞌaxal nim xcuanquil cuan aran riqꞌuineb chi junelic. Ut cuan ajcuiꞌ aran li Jun li chanchan carner. 23Ma̱cꞌaꞌ li sakꞌe aran ut ma̱cꞌaꞌ li po xban nak li Dios cuan aran ut lix lokꞌal li Dios nacutanobresin re. Ut lix lokꞌal li Jun li chanchan carner nacutanobresin re li tenamit. 24Eb li xni̱nkal ru tenamit li teꞌcolekꞌ, teꞌcua̱nk saꞌ cutan saken. Ut eb li queꞌcuan xlokꞌal saꞌ ruchichꞌochꞌ, eb aꞌan teꞌxqꞌue xlokꞌal li tenamit. 25Eb li oqueba̱l incꞌaꞌ teꞌtzꞌapekꞌ xban nak junelic cutanak. Ma̱cꞌaꞌak kꞌojyi̱n. 26Eb li queꞌcuan xlokꞌal saꞌ ruchichꞌochꞌ teꞌxqꞌue xlokꞌal li tenamit. 27Li ani cuanqueb xma̱c incꞌaꞌ ta̱ru̱k teꞌoc aran. Eb li nequeꞌxba̱nu ma̱usilal chi moco li nequeꞌticꞌtiꞌic, teꞌoc saꞌ li tenamit aꞌan. Li ani teꞌoc aran, caꞌaj cuiꞌ li tzꞌi̱banbileb xcꞌabaꞌ saꞌ lix hu li Jun li chanchan carner, li hu li tzꞌi̱banbil cuiꞌ xcꞌabaꞌeb li cuanqueb xyuꞌam chi junelic.

Currently Selected:

Apocalipsis 21: kek

Highlight

Copy

Compare