Apocalipsis 19

Li lokꞌoni̱nc li queꞌxba̱nu saꞌ choxa

1Chirix chic aꞌan quicuabi nak nabaleb queꞌecꞌan saꞌ choxa. Chi cau xya̱b xcuxeb yo̱queb chixyebal:

Aleluya. Lokꞌoninbil taxak li Ka̱cuaꞌ. Li kaDios, aꞌan li nacoloc. Aꞌan li kꞌaxal nim xcuanquil ut xcꞌulub nak ta̱lokꞌoni̱k.

2Aꞌan ti̱c xchꞌo̱l chi rakoc a̱tin saꞌ xya̱lal. Aꞌan xrakoc a̱tin saꞌ xbe̱n li nimla tenamit li chanchan jun li ixk naxcꞌayi rib. Xban nak numtajenak lix ma̱usilal, aꞌan quipoꞌoc ruheb li tenamit li cuanqueb saꞌ ruchichꞌochꞌ. Li Dios xqꞌueheb chixtojbal rix lix ma̱queb xban nak queꞌxcamsi nabaleb laj cꞌanjel chiru.

3Ut queꞌxye cuiꞌchic:

Aleluya, lokꞌoninbil taxak li Dios. Lix sibel li tenamit aꞌan ta̱takekꞌ chi junelic kꞌe cutan nak yo̱k chi cꞌatc.

4Ut li ca̱hib xcaꞌcꞌa̱l li cꞌojcꞌo̱queb saꞌ xcꞌojariba̱leb joꞌqueb ajcuiꞌ li ca̱hib li yoꞌyo̱queb li chanchaneb ángel queꞌxcuikꞌib ribeb ut queꞌxlokꞌoni li Dios li cꞌojcꞌo saꞌ li lokꞌlaj cꞌojariba̱l ut queꞌxye:

Lokꞌoninbil taxak li Ka̱cuaꞌ. Joꞌcan taxak, chanqueb.

5Ut quicuabi jun yo̱ chak chi a̱tinac saꞌ li lokꞌlaj cꞌojariba̱l ut quixye:

Chelokꞌonihak li kaDios che̱junilex la̱ex li nequexcꞌanjelac chiru. Chelokꞌonihak li Ka̱cuaꞌ la̱ex li nequexucua ru, la̱ex li cuan e̱cuanquil joꞌ ajcuiꞌ li ma̱cꞌaꞌ e̱cuanquil.

6Ut quicuabi cuiꞌchic xya̱b xcuxeb nabaleb li cuanqueb saꞌ choxa. Chanchan xya̱b lix cau ok li palau ut chanchan nak namok li ca̱k. Queꞌxye:

Aleluya. Li Ka̱cuaꞌ li nimajcual Dios, aꞌan cuan saꞌ xcuanquil.

7Chisahokꞌ taxak saꞌ kachꞌo̱l. Chikaqꞌue xlokꞌal li Ka̱cuaꞌ xban nak xcuulac xkꞌehil lix sumlajic li Jun li chanchan carner. Li ixakilbej ac xcauresi rib.

8Quiqꞌueheꞌ li cha̱bil lino re xtikibanquil rib. Sak ru li rakꞌ ut nalemtzꞌun. Li saki lino aꞌan retalil lix ti̱quilal xchꞌo̱leb li ralal xcꞌajol li Dios.

9Ut li ángel quixye cue: —Tzꞌi̱ba retalil aꞌin: Us xak reheb li bokbileb chixninkꞌeinquil lix sumlajic li Jun li chanchan carner.— Ut quixye ajcuiꞌ cue: —Aꞌin ra̱tin li Dios ut tzꞌakal ya̱l, chan. 10La̱in quincuikꞌib cuib chiru chixlokꞌoninquil. Ut aꞌan quixye cue: —Ma̱ba̱nu aꞌan. La̱in yal aj cꞌanjelin chiru li Dios joꞌ la̱at, ut joꞌ eb ajcuiꞌ la̱ cuech aj pa̱banelil, li nequeꞌxpa̱b lix ya̱lal li quixchꞌolob li Jesús. Li Dios, aꞌan li ta̱lokꞌoni, chan cue, xban nak li quixchꞌolob li Jesús, aꞌan ajcuiꞌ li musikꞌanbil reheb li profeta.—

Li Jun li chunchu chirix jun li cacua̱y sak rix

11Ut teto li choxa nak quicuil. Quicuil jun li cacua̱y sak rix. Ut lix cꞌabaꞌ li cꞌojcꞌo chirix li cacua̱y, aꞌan “Tzꞌakal Dios” ut “Ti̱c Xchꞌo̱l”, xban nak aꞌan saꞌ ti̱quilal ta̱rakok a̱tin ut saꞌ ti̱quilal ta̱pletik. 12Lix nakꞌ ru chanchan xam. Nabal li corona cuan saꞌ xjolom ut tzꞌi̱banbil lix cꞌabaꞌ chiru. Abanan ma̱ ani nataꞌoc ru. Caꞌaj cuiꞌ aꞌan. 13Cuan quicꞌ chiru li rakꞌ ut lix cꞌabaꞌ aꞌan “Ra̱tin li Dios”. 14Nabaleb li cuanqueb saꞌ choxa yo̱queb chi ta̱ke̱nc re. Tikto̱queb riqꞌuin li saki tꞌicr lino ut sak ru. Yo̱queb chi xic chirix li cacua̱y sakeb rix. 15Li Ti̱c Xchꞌo̱l cuan jun li kꞌesnal chꞌi̱chꞌ saꞌ re, re xsachbal xcuanquileb li xni̱nkal ru tenamit. Cau ta̱takla̱nk saꞌ xbe̱neb. Chanchan riqꞌuin jun xukꞌ chꞌi̱chꞌ tixtaklaheb. Chanchan nak nayatzꞌeꞌ li ru li uvas nak ta̱rakok a̱tin saꞌ xbe̱neb riqꞌuin xjoskꞌil li Dios. 16Tzꞌi̱banbil xcꞌabaꞌ chiru li rakꞌ ut chiru li raꞌ. Aꞌan aꞌin lix cꞌabaꞌ: Li Rey li kꞌaxal nim xcuanquil saꞌ xbe̱neb chixjunileb li rey. Li Ka̱cuaꞌ, li kꞌaxal nim xcuanquil saꞌ xbe̱neb chixjunileb li nequeꞌtaklan. 17Ut quicuil jun li ángel xakxo chiru li sakꞌe. Chi cau xya̱b xcux yo̱ chi a̱tinac riqꞌuineb chixjunileb laj xicꞌanel xul li nequeꞌtiꞌoc tib, li yo̱queb chi rupupic chiru choxa. Quixye reheb: —Quimkex. Chꞌutubomak e̱rib chi cuaꞌac saꞌ li ninkꞌe li ac xcauresi li Dios. 18Quimkex ut tiuhomakeb lix tibeleb li rey li cuanqueb saꞌ ruchichꞌochꞌ joꞌ ajcuiꞌ lix tibeleb li nequeꞌtaklan saꞌ xbe̱neb li soldado. Tiuhomakeb xtibeleb li cauheb rib joꞌqueb ajcuiꞌ li cacua̱y ut eb li cui̱nk li nequeꞌxic chirixeb. Tiuhomakeb xtibeleb chixjunileb, joꞌ li lokꞌbil chi cꞌanjelac joꞌ ajcuiꞌ li incꞌaꞌ lokꞌbil, joꞌ li cuanqueb xcuanquil ut joꞌ ajcuiꞌ li ma̱cꞌaꞌeb xcuanquil.— 19Quicuil ru li joskꞌ aj xul ut eb li rey li cuanqueb saꞌ ruchichꞌochꞌ rochbeneb li soldado li nequeꞌcꞌanjelac chiruheb. Queꞌxchꞌutub rib re teꞌpletik riqꞌuin li Ti̱c Xchꞌo̱l li cuan chirix li cacua̱y sak rix rochbeneb li nequeꞌta̱ken re. 20Li joskꞌ aj xul quichapeꞌ xban li Ti̱c Xchꞌo̱l li cuan chirix li cacua̱y sak rix ut quichapeꞌ ajcuiꞌ li profeta aj balakꞌ, li quixba̱nu li sachba chꞌo̱lej saꞌ xcꞌabaꞌ li joskꞌ aj xul. Riqꞌuin li sachba chꞌo̱lej quixba̱nu quixbalakꞌi nabaleb li tenamit chixcꞌulbal li retalil li joskꞌ aj xul ut queꞌxlokꞌoni lix jalam u̱ch. Chi xcabichaleb li joskꞌ aj xul ut li profeta aj balakꞌ queꞌcuteꞌ chi yoꞌyo̱queb saꞌ li xxamlel li azufre li chanchan nimla palau. 21Ut li jun chꞌol chic li nequeꞌcꞌanjelac chiru li joskꞌ aj xul queꞌsacheꞌ ruheb riqꞌuin li kꞌesnal chꞌi̱chꞌ li cuan saꞌ re li Ti̱c Xchꞌo̱l li cuan chirix li cacua̱y sak rix. Ut chixjunileb laj xicꞌanel xul li nequeꞌtiꞌoc tib queꞌnujac xsaꞌeb riqꞌuin xtibeleb li joꞌ qꞌuial queꞌcam.

Currently Selected:

Apocalipsis 19: kek

Highlight

Copy

Compare