Números 16
16
Queꞌxkꞌetkꞌeti ribeb chiru li Dios laj Coré, laj Datán ut laj Abiram
1Quicuan jun li cui̱nk aj Coré xcꞌabaꞌ. Laj Coré, aꞌan li ralal laj Izhar, ri laj Coat ut rixmam laj Leví. Quixkꞌetkꞌeti rib rochbeneb laj Datán ut laj Abiram li ralaleb laj Eliab, ut laj On li ralal laj Pelet. Li ca̱hibeb xcomoneb li ralal xcꞌajol laj Rubén. 2Queꞌxkꞌetkꞌeti ribeb chiru laj Moisés rochbeneb cuib ciento riqꞌuin laje̱b roxcꞌa̱l (250) laj Israel xcomoneb li xakabanbileb chi takla̱nc saꞌ xbe̱neb li tenamit. Naꞌno ruheb li cui̱nk aꞌan. 3Queꞌxchꞌutub ribeb ut queꞌco̱eb chixcuechꞌinquil laj Moisés ut laj Aarón. Queꞌxye reheb: —Xotitzꞌ e̱riqꞌuin. Tzꞌakal li xeba̱nu la̱ex. Chixjunileb li tenamit santobresinbileb xban li Dios ut li Ka̱cuaꞌ cuan kiqꞌuin. ¿Cꞌaꞌut nak la̱ex nequeraj takla̱nc saꞌ kabe̱n la̱o lix tenamit li Ka̱cuaꞌ? chanqueb. 4Nak laj Moisés quirabi li cꞌaꞌru queꞌxye, quixhupub rib saꞌ chꞌochꞌ. 5Ut quixye reheb laj Coré ut eb li nequeꞌoquen chirix: —Chiru li ekꞌela cuulaj li Ka̱cuaꞌ tixcꞌut chiku ani li sicꞌbil ru ut ani li santobresinbil ut tixqꞌue li jun aꞌan chi nachꞌoc riqꞌuin. Li ani tixsicꞌ ru li Ka̱cuaꞌ tixqꞌue chi nachꞌoc riqꞌuin. 6La̱at Coré ut eb la̱ cuochben te̱ba̱nu li cꞌaꞌru ninye. Te̱cꞌam le̱ sansar. 7Ut cuulaj te̱cꞌat li pom chiru li Ka̱cuaꞌ. Li ani ta̱siqꞌuekꞌ ru cuulaj xban li Ka̱cuaꞌ, aꞌanak li santobresinbil. La̱ex aj levita, la̱ex li incꞌaꞌ yo̱quex chixba̱nunquil li us.— 8Ut quixye ajcuiꞌ laj Moisés re laj Coré: —Abihomak la̱ex aj levita. 9¿Ma incꞌaꞌ ta biꞌ tzꞌakal riqꞌuin nak li kaDios quisicꞌoc e̱ru la̱ex saꞌ xya̱nkeb laj Israel re nak texcꞌanjelak chiru? Quixsicꞌ e̱ru re nak texxakli̱k chiruheb li tenamit ut texcꞌanjelak saꞌ li tabernáculo saꞌ xcꞌabaꞌeb li tenamit. 10Li Dios quixakaban e̱re joꞌ eb ajcuiꞌ chixjunileb le̱ rech aj levita chi cꞌanjelac chiru. Abanan la̱ex toj te̱raj texcꞌanjelak chokꞌ aj tij. 11La̱at ut eb la̱ cuochben xechꞌutub e̱rib chixcuechꞌbal rix laj Aarón. ¿Cꞌaꞌut nak nequecuechꞌi rix laj Aarón? ¿Ma ma̱cuaꞌ ta biꞌ li Dios li yo̱quex chixcuechꞌinquil rix?— 12Chirix aꞌan laj Moisés quixtakla xbokbaleb laj Datán ut laj Abiram, eb li ralal laj Eliab. Abanan eb aꞌan queꞌxye: —La̱o incꞌaꞌ toxic aran. 13¿Ma incꞌaꞌ tzꞌakal riqꞌuin nak xoa̱cuisi saꞌ li tenamit li na-el cuiꞌ chi us li acui̱mk re toca̱mk saꞌ li chaki chꞌochꞌ? ¿Ma toj ta̱cuaj tattakla̱nk saꞌ kabe̱n saꞌ joskꞌil? 14La̱at incꞌaꞌ xoa̱cꞌam saꞌ li naꞌajej li na-el cuiꞌ chi us li acui̱mk, chi moco xaqꞌue ke li cꞌaleba̱l, chi moco xaqꞌue xnaꞌaj ka-uvas. ¿Ma ta̱cuaj nak toa̱beresi chikajunilo joꞌ naberesi̱c li mutzꞌ? La̱o incꞌaꞌ toxic cha̱cuilbal, chanqueb. 15Riqꞌuin li cꞌaꞌru queꞌxye, queꞌxchikꞌ xjoskꞌil laj Moisés ut quixye re li Ka̱cuaꞌ: —At Ka̱cuaꞌ, ma̱cꞌul taxak lix mayejeb. La̱in ma̱cꞌaꞌ xinmakꞌ chiruheb. La̱in incꞌaꞌ xinmakꞌ lix bu̱r chiruheb chi moco xinba̱nu raylal reheb.— 16Ut laj Moisés quixye re laj Coré: —La̱at a̱cuochbeneb li nequeꞌoquen cha̱cuix texxic chiru li Ka̱cuaꞌ cuulaj. La̱ex ut laj Aarón cua̱nkex aran. 17Li junju̱nk e̱re te̱qꞌue li pom chi saꞌ le̱ sansar ut te̱cꞌam chiru li Ka̱cuaꞌ. Cuib ciento riqꞌuin laje̱b roxcꞌa̱l (250) chixjunil. La̱at ut laj Aarón cua̱nk ajcuiꞌ le̱ sansar, chan laj Moisés. 18Ut chixjunileb queꞌxqꞌue li xam saꞌ lix sansar ut queꞌxqꞌue ajcuiꞌ li pom ut queꞌxakli chiru li oqueba̱l re li tabernáculo rochbeneb laj Moisés ut laj Aarón. 19Ut laj Coré quixchꞌutubeb chiru li oqueba̱l re li tabernáculo eb li nequeꞌoquen chirix. Ut li Ka̱cuaꞌ quixcꞌutbesi lix lokꞌal chiruheb chixjunileb li tenamit. 20Ut li Ka̱cuaꞌ quixye reheb laj Moisés ut laj Aarón: 21—Elenkex saꞌ xya̱nkeb li tenamit aꞌin re nak tinsach ruheb chixjunileb saꞌ junpa̱t, chan. 22Ut laj Moisés ut laj Aarón queꞌxhupub ribeb saꞌ chꞌochꞌ ut queꞌxye: —At Ka̱cuaꞌ, at kaDios, la̱at nacatqꞌuehoc xyuꞌam li junju̱nk. Jun ajcuiꞌ li xma̱cob cha̱cuu. ¿Ma ta̱cuisi a̱joskꞌil saꞌ xbe̱neb chixjunileb li tenamit?— 23Ut li Ka̱cuaꞌ quichakꞌoc ut quixye re laj Moisés: 24—Ta̱ye reheb laj Israel nak teꞌe̱lk chixcꞌatk lix muheba̱leb laj Coré, laj Datán, ut laj Abiram.— 25Laj Moisés co̱ riqꞌuineb laj Datán ut laj Abiram. Ut eb li nequeꞌcꞌamoc be saꞌ xya̱nkeb laj Israel queꞌco̱eb chirix. 26-27Ut laj Moisés quixye reheb laj Israel: —Elenkex chixcꞌatk lix muheba̱leb li cui̱nk aꞌin li incꞌaꞌ useb xnaꞌleb. Ut me̱chꞌeꞌ li cꞌaꞌru reheb ma̱re anchal texca̱mk xban lix ma̱usilaleb, chan. Joꞌcan nak queꞌel chixcꞌatk lix muheba̱leb laj Coré, laj Datán ut laj Abiram. Laj Datán ut laj Abiram queꞌel chak saꞌ lix muheba̱leb. Xakxo̱queb chiru li oqueba̱l rochbeneb li rixakil ut eb lix cocꞌal. 28Laj Moisés quixye reheb: —Joꞌcaꞌin nak te̱nau nak li Ka̱cuaꞌ quitaklan chak cue chixba̱nunquil li cꞌaꞌru ninba̱nu. Moco injunes ta nintakla cuib. 29Cui eb li cui̱nk aꞌin teꞌca̱mk joꞌ nak nequeꞌcam chixjunileb li cristian, aꞌan retalil nak li Ka̱cuaꞌ incꞌaꞌ quinixtakla chixba̱nunquil li cꞌaꞌru ninba̱nu. 30Abanan cui li Ka̱cuaꞌ tixba̱nu li ma̱ jun sut quicꞌulman ut cui li chꞌochꞌ ta̱jachekꞌ ut teꞌtꞌanekꞌ chi saꞌ eb li cui̱nk aꞌin chi yoꞌyo rochben chixjunil li cꞌaꞌru cuan reheb, aꞌan retalil nak eb li cui̱nk aꞌin queꞌxtzꞌekta̱na li Ka̱cuaꞌ, chan. 31Tojeꞌ ajcuiꞌ ta̱rakekꞌ chi a̱tinac laj Moisés nak li chꞌochꞌ quijacheꞌ rubeleb. 32Chanchan nak li chꞌochꞌ quixte li re ut quixnukꞌ laj Coré ut chixjunileb li cui̱nk li queꞌoquen chirix rochbeneb lix jun cablal ut chixjunil li cꞌaꞌru cuan reheb. 33Toj yoꞌyo̱queb nak queꞌtꞌaneꞌ saꞌ xchamal li chꞌochꞌ rochbeneb chixjunil li cꞌaꞌru cuan reheb. Ut li chꞌochꞌ quixtzꞌap cuiꞌchic rib saꞌ xbe̱neb. Joꞌcan nak queꞌsacheꞌ ruheb saꞌ xya̱nkeb laj Israel. 34Ut nak queꞌrabi nak yo̱queb chixjapbal reheb li queꞌsacheꞌ ruheb, chixjunileb laj Israel queꞌe̱lelic ut queꞌxye: —Ma̱re toxnukꞌ ajcuiꞌ li chꞌochꞌ la̱o, chanqueb. 35Ut li Ka̱cuaꞌ quixtakla li xam ut quixcꞌateb li cuib ciento riqꞌuin laje̱b roxcꞌa̱l (250) chi cui̱nk li queꞌcꞌatoc re li pom. 36Ut li Ka̱cuaꞌ quia̱tinac riqꞌuin laj Moisés ut quixye re: 37—Ta̱ye re laj Eleazar li ralal laj Aarón laj tij nak tixxoc chak li sansar saꞌ li xam ut tixcut chi najt li ru xam li cuan chi saꞌ xban nak li sansar aꞌan santobresinbileb. 38-39Queꞌsantobresi̱c nak queꞌqꞌueheꞌ chiru lin artal la̱in li Ka̱cuaꞌ. Cꞌameb lix sansareb li cui̱nk li queꞌsacheꞌ ruheb xban nak queꞌma̱cob. Riqꞌuin li sansar aꞌin te̱yi̱b li perpo̱quil chꞌi̱chꞌ ut li perpo̱quil chꞌi̱chꞌ aꞌin te̱letz chiru li artal. Ut aꞌanak jun retalil chiruheb laj Israel, chan li Dios. Ut laj Eleazar laj tij quixxoc lix sansareb li queꞌsacheꞌ ruheb. Ut quixtakla xyi̱banquil li perpo̱quil chꞌi̱chꞌ riqꞌuineb li sansar re nak teꞌxletz chiru li artal. 40Quixba̱nu laj Eleazar joꞌ quixye li Ka̱cuaꞌ re laj Moisés. Aꞌan jun retalil chiruheb laj Israel nak juneseb li ralal xcꞌajol laj Aarón naru nequeꞌxcꞌat li pom chiru li Ka̱cuaꞌ. Jalan incꞌaꞌ naru ma̱re anchal tixcꞌul joꞌ queꞌxcꞌul laj Coré ut eb li queꞌoquen chirix. 41Cuulajak chic chixjunileb laj Israel queꞌxcuechꞌi rixeb laj Moisés ut laj Aarón ut queꞌxye reheb: —La̱ex quecamsiheb lix tenamit li Ka̱cuaꞌ, chanqueb. 42Abanan nak eb li tenamit queꞌxchꞌutub ribeb chixcuechꞌinquil rixeb laj Moisés ut laj Aarón, nak queꞌiloc cuan cuiꞌ li tabernáculo, jun li chok quixtzꞌap li tabernáculo ut li Ka̱cuaꞌ quixcꞌutbesi lix lokꞌal. 43Laj Moisés ut laj Aarón queꞌco̱eb chiru li tabernáculo. 44Ut li Ka̱cuaꞌ quixye re laj Moisés: 45—Isihomak e̱rib saꞌ xya̱nkeb laj Israel re nak ta̱ru̱k tinsach ruheb chi junaj cua, chan. Ut queꞌxhupub ribeb saꞌ chꞌochꞌ. 46Ut laj Moisés quixye re laj Aarón: —Cꞌam la̱ sansar chiru li artal ut ta̱qꞌue li ru xam chi saꞌ ut ta̱qꞌue ajcuiꞌ li pom. Ut ta̱cꞌam chi junpa̱t cuanqueb cuiꞌ li tenamit ut ta̱santobresiheb. Xnumta lix joskꞌil li Dios saꞌ xbe̱neb ut ac xticla li caki yajel, chan. 47Ut laj Aarón quixba̱nu joꞌ quixye laj Moisés. Co̱ saꞌ a̱nil saꞌ xya̱nkeb li tenamit. Ac xticla li caki yajel saꞌ xya̱nkeb. Abanan laj Aarón quixcꞌat li pom re xtojbal rix lix ma̱queb li tenamit. 48Laj Aarón quixakli saꞌ xyiheb li camenak ut li yoꞌyo̱queb. Ut queꞌxcanab ca̱mc xban li caki yajel. 49Ca̱laju mil riqꞌuin cuukub ciento (14,700) queꞌcam xban li caki yajel aꞌan. Ma̱cꞌaꞌeb saꞌ ajl laj Coré ut eb li queꞌoquen chirix. 50Ut laj Aarón co̱ riqꞌuin laj Moisés chiru li oqueba̱l re li tabernáculo nak ac xeꞌxcanab ca̱mc xban li caki yajel.
Currently Selected:
Números 16: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
