Números 10
10
Li Dios quixye nak eb laj Israel teꞌxic chi tustu nak teꞌnumekꞌ saꞌ li chaki chꞌochꞌ
1Li Ka̱cuaꞌ quia̱tinac riqꞌuin laj Moisés ut quixye re: 2—Ta̱yi̱b cuib li trompeta riqꞌuin plata tenbil riqꞌuin martillo. Eb li trompeta aꞌin teꞌcꞌanjelak chicuu re xbokbaleb li tenamit ut re xyebal reheb nak teꞌxyi̱b li cꞌaꞌru reheb re teꞌxic. 3Nak teꞌya̱basi̱k li cuib chi trompeta, chixjunileb laj Israel teꞌxchꞌutub ribeb cha̱cuu chiru li oqueba̱l re li tabernáculo. 4Cui jun ajcuiꞌ li trompeta ta̱ya̱basi̱k, teꞌxchꞌutub ribeb cha̱cuu eb li nequeꞌjolomin reheb li junju̱nk xte̱paleb laj Israel. 5Nak ta̱ya̱basi̱k xbe̱n sut chi cocꞌ aj saꞌ chixjunileb li cuanqueb xmuheba̱leb saꞌ li este teꞌxyi̱b ribeb re teꞌxic. 6Nak ta̱ya̱basi̱k li trompeta xcaꞌ sut chi cocꞌ aj saꞌ eb li cuanqueb xmuheba̱leb saꞌ li sur teꞌxyi̱b ribeb re teꞌxic. Nak ta̱ya̱basi̱k li trompeta, aꞌan retalil nak oqueb re chi xic. 7Jalan cuiꞌ lix ya̱b li trompeta re xchꞌutubanquileb li tenamit. 8Eb laj tij, li ralaleb laj Aarón, aꞌaneb li teꞌya̱basi̱nk reheb li trompeta. Aꞌan jun li chakꞌrab chokꞌ e̱re la̱ex ut reheb le̱ ralal e̱cꞌajol li teꞌcua̱nk mokon chi junelic kꞌe cutan. 9Te̱ya̱basiheb li trompetas nak texxic chi pletic saꞌ le̱ chꞌochꞌ riqꞌuineb li xicꞌ nequeꞌiloc e̱re li yo̱queb chi rahobtesi̱nc e̱re. Cui te̱ba̱nu chi joꞌcan, texjulticokꞌ re li Dios ut aꞌan ta̱colok e̱re chiruheb. 10Teꞌya̱basi̱k li trompetas saꞌ eb li cutan nak sahak saꞌ e̱chꞌo̱l ut nak nequexninkꞌei̱c saꞌ xkꞌehil ut re li xyoꞌlajic li po. Teꞌya̱basi̱k li trompeta nak nequeqꞌue le̱ cꞌatbil mayej ut eb li mayej re xcꞌambal e̱rib saꞌ usilal cuiqꞌuin. Ut la̱in li Ka̱cuaꞌ texjulticokꞌ cue. La̱in li Ka̱cuaꞌ le̱ Dios, chan. 11Saꞌ li junmay xbe li xcab po re li xcab chihab li chok qui-el saꞌ xbe̱n li tabernáculo. 12Joꞌcan nak eb laj Israel queꞌel saꞌ li chaki chꞌochꞌ li cuan Sinaí ut queꞌco̱eb. Ut li chok yo̱ chi cꞌamoc be chiruheb toj retal quicuulac saꞌ li chaki chꞌochꞌ Parán ut aran quixakli. 13Queꞌco̱eb joꞌ quiyeheꞌ re laj Moisés xban li Ka̱cuaꞌ. 14Eb li ralal xcꞌajol laj Judá, aꞌaneb li xbe̱n chꞌu̱tal li queꞌco̱eb chi ubej ut cuan lix bandereb. Ut laj Naasón li ralal laj Aminadab, aꞌan li najolomin reheb. 15Ut chirixeb li ralal xcꞌajol laj Judá queꞌco̱eb li jun chꞌu̱tal li ralal xcꞌajol laj Isacar. Ut laj Natanael li ralal laj Zuar, aꞌan li najolomin reheb. 16Ut chirixeb li ralal xcꞌajol laj Isacar queꞌco̱eb li jun chꞌu̱tal li ralal xcꞌajol laj Zabulón. Ut laj Eliab li ralal laj Helón, aꞌan li najolomin reheb. 17Nak ac xeꞌxjit li tabernáculo, eb li ralal xcꞌajol laj Gersón ut eb li ralal xcꞌajol laj Merari queꞌxcꞌam. 18Chirixeb aꞌan queꞌco̱eb li jun chꞌu̱tal li ralal xcꞌajol laj Rubén ut cuan lix bandereb. Laj Elisur li ralal laj Sedeur, aꞌan li najolomin reheb. 19Ut chirixeb li ralal xcꞌajol laj Rubén queꞌco̱eb li jun chꞌu̱tal li ralal xcꞌajol laj Simeón. Ut laj Selumiel li ralal laj Zurisadai, aꞌan li najolomin reheb. 20Ut chirixeb li ralal xcꞌajol laj Simeón queꞌco̱eb li jun chꞌu̱tal li ralal xcꞌajol laj Gad. Ut laj Eliasaf li ralal laj Deuel, aꞌan li najolomin reheb. 21Ut chirixeb li ralal xcꞌajol laj Gad queꞌco̱eb li jun chꞌu̱tal li ralal xcꞌajol laj Coat li queꞌcꞌamoc re li cꞌaꞌak re ru li nacꞌanjelac saꞌ li tabernáculo. Nak nequeꞌcuulac saꞌ li naꞌajej li nequeꞌxic cuiꞌ, ac xakabanbil chic li tabernáculo. 22Ut chirixeb li ralal xcꞌajol laj Coat, queꞌco̱eb li jun chꞌu̱tal li ralal xcꞌajol laj Efraín ut cuan xbande̱reb. Laj Elisama li ralal laj Amiud, aꞌan li najolomin reheb. 23Ut chirixeb li ralal xcꞌajol laj Efraín queꞌco̱eb li jun chꞌu̱tal li ralal xcꞌajol laj Manasés. Ut laj Gamaliel li ralal laj Pedasur, aꞌan li najolomin reheb. 24Ut chirixeb li ralal xcꞌajol laj Manasés queꞌco̱eb li jun chꞌu̱tal li ralal xcꞌajol laj Benjamín. Ut laj Abidán li ralal laj Gedeoni, aꞌan li najolomin reheb. 25Ut chirixeb li ralal xcꞌajol laj Benjamín queꞌco̱eb li jun chꞌu̱tal li ralal xcꞌajol laj Dan ut cuan xbande̱reb. Aꞌaneb li teꞌilok reheb li teꞌxic chi ubej. Ut laj Ahiezer li ralal laj Amisadai, aꞌan li najolomin reheb. 26Ut chirixeb li ralal xcꞌajol laj Dan queꞌco̱eb li jun chꞌu̱tal li ralal xcꞌajol laj Aser. Laj Pagiel, li ralal laj Ocrán, aꞌan li najolomin reheb. 27Ut chirixeb li ralal xcꞌajol laj Aser queꞌco̱eb li jun chꞌu̱tal li ralal xcꞌajol laj Neftalí. Laj Ahira, li ralal laj Enán, aꞌan li najolomin reheb. 28Joꞌcaꞌin nak queꞌco̱eb chi chꞌu̱tal chixjunileb laj Israel. 29Ut laj Moisés quia̱tinac riqꞌuin laj Hobab lix ba̱lc. Aꞌan li ralal laj Ragüel laj Madián. Quixye re: —La̱o xic ke saꞌ li naꞌajej li quixyechiꞌi ke li Ka̱cuaꞌ. Yoꞌo chikix ut la̱o takaba̱nu usilal a̱cue. Li Ka̱cuaꞌ quixye nak torosobtesi, chan. 30Laj Hobab quichakꞌoc ut quixye: —La̱in incꞌaꞌ tinxic che̱rix. La̱in tinsukꞌi̱k saꞌ lin tenamit cuanqueb cuiꞌ li cuechꞌalal, chan. 31Laj Moisés quixye re: —La̱in tintzꞌa̱ma cha̱cuu nak incꞌaꞌ toa̱canab kajunes xban nak la̱at nacanau chi us li naꞌajej ut nacanau bar ta̱ru̱k tohila̱nk. La̱at raj tatcꞌamok be chiku. 32Cui la̱at tatxic chikix, la̱at tattzꞌako̱nk ajcuiꞌ riqꞌuin li usilal li tixba̱nu ke li Dios. La̱o takaba̱nu usilal a̱cue, chan. 33Joꞌcan nak queꞌel laj Israel saꞌ li tzu̱l Sinaí lix tzu̱l li Ka̱cuaꞌ. Oxib cutan queꞌbe̱c. Ut li Lokꞌlaj Ca̱x li xocxo cuiꞌ li contrato yo̱ chi xic chiruheb ut yo̱ chixsicꞌbal li naꞌajej bar teꞌhila̱nk cuiꞌ. 34Ut li chok, li taklanbil xban li Ka̱cuaꞌ, cuan saꞌ xbe̱neb ut yo̱ chi cꞌamoc be chiruheb chi cutan nak yo̱queb chi xic. 35Nak nequeꞌxtiquib xpakonquil li Lokꞌlaj Ca̱x laj Moisés quixye: —Choa̱tenkꞌa, at Ka̱cuaꞌ. Chajeqꞌuiheb li xicꞌ nequeꞌiloc a̱cue. Cheꞌe̱lelik ta cha̱cuu.— 36Ut nak nequeꞌxqꞌue chi hila̱nc li Lokꞌlaj Ca̱x, laj Moisés naxye: —Chatsukꞌi̱k ta chak riqꞌuineb li qꞌuila okꞌob chi aj Israel, at Ka̱cuaꞌ.—
Currently Selected:
Números 10: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
