Levítico 18
18
Lix kꞌusbaleb chirix li cua̱nc riqꞌuin ixk
1Li Ka̱cuaꞌ quia̱tinac riqꞌuin laj Moisés ut quixye re: 2—Ye reheb laj Israel nak la̱in li Ka̱cuaꞌ lix Dioseb. 3Texcua̱nk saꞌ xya̱lal ut incꞌaꞌ te̱ba̱nu joꞌ nequeꞌxba̱nu li cuanqueb saꞌ li tenamit Egipto li quexcuan cuiꞌ chak. Chi moco te̱ba̱nu joꞌ nequeꞌxba̱nu li cuanqueb saꞌ li naꞌajej Canaán li yo̱quin cuiꞌ che̱cꞌambal. Chi moco te̱tzol e̱rib chixba̱nunquil li cꞌaꞌru naxye saꞌ lix chakꞌrabeb. 4Cheba̱nuhak ban li naxye saꞌ lin chakꞌrab li xinqꞌue e̱re. Cheba̱nuhak chixjunil li cꞌaꞌru xexintakla cuiꞌ. La̱in li Ka̱cuaꞌ le̱ Dios xinyehoc re aꞌin. 5Cui te̱ba̱nu li cꞌaꞌru naxye lin chakꞌrab li xinqꞌue e̱re, ut cui te̱ba̱nu chixjunil li cꞌaꞌru xexintakla cuiꞌ, ta̱cua̱nk le̱ yuꞌam. La̱in li Ka̱cuaꞌ le̱ Dios. 6Junak cui̱nk incꞌaꞌ naru tixchꞌic rib riqꞌuin junak ixk re ta̱cua̱nk riqꞌuin cui rechꞌalal li ixk. La̱in li Ka̱cuaꞌ yo̱quin chi yehoc e̱re. 7Cui junak cui̱nk naxchꞌic rib riqꞌuin lix naꞌ, li jun aꞌan naxcꞌut xxuta̱n lix yucuaꞌ. Li cui̱nk incꞌaꞌ naru ta̱cua̱nk riqꞌuin lix naꞌ, xban nak aꞌan lix naꞌ. 8Junak cui̱nk incꞌaꞌ naru naxchꞌic rib riqꞌuin li rixakil lix yucuaꞌ. Incꞌaꞌ naru naxcꞌut xxuta̱n lix yucuaꞌ. 9Junak cui̱nk incꞌaꞌ naru naxchꞌic rib riqꞌuin li ranab, malaj ut riqꞌuin li ri̱tzꞌin ixk, usta jalan xyucuaꞌ malaj ut jalan lix naꞌ. Incꞌaꞌ naru naxcꞌut xxuta̱n li ranab, usta saꞌ li rochoch quiyoꞌla malaj ut saꞌ jalan cab. Incꞌaꞌ naru ta̱cua̱nk riqꞌuin. 10Me̱mux e̱rib riqꞌuin xchꞌicbal e̱rib riqꞌuin lix rabin le̱ ralal, malaj ut riqꞌuin lix coꞌ le̱ rabin. Cui te̱ba̱nu aꞌan, te̱mux e̱rib. 11Junak cui̱nk incꞌaꞌ naru naxchꞌic rib riqꞌuin lix cab ranab, xban nak aꞌan li ranab. Incꞌaꞌ naru ta̱cua̱nk riqꞌuin. 12Junak cui̱nk incꞌaꞌ naru naxchꞌic rib riqꞌuin li ranab lix yucuaꞌ xban nak aꞌan xcomon lix yucuaꞌ. 13Junak cui̱nk incꞌaꞌ naru naxchꞌic rib riqꞌuin li ras malaj li ri̱tzꞌin lix naꞌ xban nak aꞌan xcomon lix naꞌ. 14Junak cui̱nk incꞌaꞌ naru naxchꞌic rib riqꞌuin li rixakil li rican. Incꞌaꞌ naru tixcꞌut xxuta̱n xban nak li ixk aꞌan rixakil li ras lix yucuaꞌ. 15Junak cui̱nk incꞌaꞌ naru naxchꞌic rib riqꞌuin li ralib. Incꞌaꞌ naru tixcꞌut xxuta̱n xban nak aꞌan rixakil li ralal. 16Junak cui̱nk incꞌaꞌ naru naxchꞌic rib riqꞌuin li rixakil li ras. Incꞌaꞌ naru tixcꞌut xxuta̱n li ras. 17Junak cui̱nk incꞌaꞌ naru naxchꞌic rib riqꞌuin lix cab xrabin, chi moco riqꞌuineb li ri li rixakil, xban nak xcomoneb rib. Nimla ma̱c xba̱nunquil aꞌan. 18Junak cui̱nk incꞌaꞌ naru naxchꞌic rib riqꞌuin li ras malaj ut li ri̱tzꞌin li rixakil nak toj yoꞌyo li rixakil re nak incꞌaꞌ xicꞌ teꞌril ribeb. 19Junak cui̱nk incꞌaꞌ naru naxchꞌic rib riqꞌuin junak ixk cui yo̱ xcꞌulbal xyajel re li po. 20Junak cui̱nk incꞌaꞌ naru naxchꞌic rib riqꞌuin li rixakil li ras ri̱tzꞌin. Cui tixba̱nu li ma̱usilal aꞌan, tixmux rib. 21Junak cui̱nk incꞌaꞌ naru tixqꞌue li ralal xcꞌajol chokꞌ xcꞌatbil mayej chiru li yi̱banbil dios Moloc. Incꞌaꞌ ta̱risi xlokꞌal lin cꞌabaꞌ la̱in li Ka̱cuaꞌ le̱ Dios riqꞌuin xba̱nunquil aꞌin. La̱in li Ka̱cuaꞌ li yo̱quin chi yehoc re aꞌin. 22Junak cui̱nk incꞌaꞌ naru naxchꞌic rib riqꞌuin li rech cui̱nkilal joꞌ naxba̱nu riqꞌuin junak ixk. Nimla ma̱c xba̱nunquil aꞌan. 23Junak cui̱nk incꞌaꞌ naru naxchꞌic rib riqꞌuin li xul. Incꞌaꞌ naru tixmux rib xba̱nunquil li ma̱usilal aꞌan. Chi moco junak ixk tixchꞌic rib riqꞌuin li xul. Kꞌaxal yibru xba̱nunquil aꞌan. 24Me̱mux e̱rib xba̱nunquil li cꞌaꞌak re ru aꞌin xban nak aꞌan incꞌaꞌ us. Aꞌan lix ma̱usilaleb li tenamit li tincuisi saꞌ li naꞌajej li tex-oc cuiꞌ. 25Xban li ma̱usilal li queꞌxba̱nu, queꞌxmux ru li naꞌajej. Joꞌcan nak la̱in tinqꞌueheb chixtojbal rix lix ma̱queb nak teꞌisi̱k saꞌ lix naꞌajeb. 26Joꞌcan nak la̱ex aj Israel tento nak te̱ba̱nu li cꞌaꞌru naxye lin chakꞌrab. Me̱ba̱nu li ma̱usilal joꞌ xeꞌxba̱nu eb aꞌan, joꞌ la̱ex aj Israel, joꞌ eb ajcuiꞌ li jalan xtenamit li cuanqueb saꞌ e̱ya̱nk. 27Chixjunil li ma̱usilal aꞌan queꞌxba̱nu li tenamit li queꞌcuan saꞌ li naꞌajej. Ut muxbil chic ru li chꞌochꞌ quicana xbaneb li cuanqueb aran nak toj ma̱jiꞌ nequex-oc. 28Cui la̱ex te̱ba̱nu li ma̱usilal joꞌ queꞌxba̱nu eb aꞌan, te̱mux ru li naꞌajej ut naru nequex-isi̱c saꞌ le̱ naꞌaj joꞌ nak queꞌisi̱c eb aꞌan. 29Li ani tixba̱nu eb li ma̱usilal aꞌin ta̱isi̱k saꞌ xya̱nkeb laj Israel. 30Joꞌcan nak la̱ex cheba̱nuhak li cꞌaꞌru nequexinchakꞌrabi cuiꞌ. Me̱tzol xba̱nunquil li ma̱usilal li queꞌxba̱nu li tenamit li cuanqueb aran nak toj ma̱jiꞌ nequex-oc la̱ex. Me̱mux e̱rib chixba̱nunquil aꞌan. La̱in li Ka̱cuaꞌ le̱ Dios xinyehoc re aꞌin.
Currently Selected:
Levítico 18: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
