Levítico 16
16
Lix cutanquil nak na-oc laj tij saꞌ li tabernáculo chixtojbal xma̱queb laj Israel
1Quia̱tinac li Dios riqꞌuin laj Moisés nak ac xeꞌcam li cuib chi ralal laj Aarón nak yo̱queb chixcꞌatbal li pom chiru li Ka̱cuaꞌ. 2Li Dios quixye re laj Moisés: —Ye re laj Aarón la̱ cuas nak incꞌaꞌ naru ta̱oc yalak jokꞌe cuan cuiꞌ li Lokꞌlaj Ca̱x. Cui na-oc yalak jokꞌe, naru nacam xban nak aran ninhilan la̱in saꞌ li chanchan chok saꞌ xbe̱n lix tzꞌapbal re li Lokꞌlaj Ca̱x li nacuyeꞌ cuiꞌ li ma̱c. 3Nak ta̱oc laj Aarón cuan cuiꞌ li tabernáculo, tento nak tixcꞌam jun cuacax te̱lom li ta̱mayeja̱k re xtzꞌa̱manquil xcuybal li ma̱c. Ut tixcꞌam ajcuiꞌ jun li carner te̱lom chokꞌ re li cꞌatbil mayej. 4Tento nak tixqꞌue chirix li rakꞌ lino li kꞌaxtesinbil re li Dios, li narocsi laj tij. Tixqꞌue li rakꞌ li nim rok. Tixqꞌue ajcuiꞌ lix ta lix cue̱x. Tixqꞌue lix cꞌa̱mal xsaꞌ ut tixqꞌue ajcuiꞌ lix tꞌicr xbacꞌbal xjolom. Li tꞌicr aꞌin ac kꞌaxtesinbil re li Dios. Joꞌcan nak ta̱ati̱nk xbe̱n cua, tojoꞌnak tixqꞌue li rakꞌ chirix. 5Eb li ralal xcꞌajol laj Israel teꞌxqꞌue cuib li te̱lom chiba̱t toj sa̱jeb re laj Aarón re nak tixmayeja re xtzꞌa̱manquil xcuybal lix ma̱queb. Ut teꞌxqꞌue ajcuiꞌ jun li carner te̱lom re li cꞌatbil mayej. 6Ut laj Aarón tixmayeja li cuacax toro re xtojbal rix lix ma̱c aꞌan ut re ajcuiꞌ xtojbal rix lix ma̱queb li cuanqueb saꞌ li rochoch. 7Ut chirix aꞌan tixcꞌam li cuib chi te̱lom chiba̱t ut tixkꞌaxtesi re li Ka̱cuaꞌ chiru li oqueba̱l re li tabernáculo. 8Ut nak ac cua̱nkeb chiru li oqueba̱l re li tabernáculo, laj Aarón tixbu̱li rixeb li cuib chi chiba̱t re rilbal bar cuan li tixqꞌue chokꞌ mayej chiru li Dios ut bar cuan li ta̱rachꞌab. 9Nak ac xbu̱li rixeb li chiba̱t, laj Aarón tixmayeja li jun chiru li Ka̱cuaꞌ re xtzꞌa̱manquil xcuybal lix ma̱queb li tenamit. 10Ut li chiba̱t jun li ta̱rachꞌab, laj Aarón tixkꞌaxtesi chi yoꞌyo chiru li Ka̱cuaꞌ ut chirix aꞌan tixtakla saꞌ li chaki chꞌochꞌ re xtojbal rix lix ma̱queb li tenamit. 11Joꞌcaꞌin tixba̱nu laj Aarón nak tixmayeja li toro re xtojbal rix lix ma̱c aꞌan ut re ajcuiꞌ xtojbal rix lix ma̱queb li cuanqueb saꞌ li rochoch. 12Tixchap li ru xam saꞌ lix artal li Ka̱cuaꞌ ut tixqꞌue saꞌ lix sansar. Tixchap cuib mo̱chꞌ li queꞌbil incienso li sunu̱nc ut tixcꞌam saꞌ rukꞌ nak ta̱xic jun pacꞌal li nimla tꞌicr saꞌ li naꞌajej li cuan cuiꞌ li Lokꞌlaj Ca̱x. 13Tixqꞌue li incienso saꞌ li ru xam ut tixcꞌat chiru li Ka̱cuaꞌ. Lix sibel li incienso ta̱ramok re lix tzꞌapbal re li Lokꞌlaj Ca̱x li nacuyeꞌ cuiꞌ li ma̱c, li cuan cuiꞌ li chakꞌrab, re nak laj Aarón incꞌaꞌ ta̱ca̱mk. 14Laj Aarón tixcꞌam caꞌchꞌinak xquiqꞌuel li toro. Riqꞌuin li ruꞌuj rukꞌ tixrach li quicꞌ saꞌ xbe̱n lix tzꞌapbal re li Lokꞌlaj Ca̱x li nacana saꞌ releb sakꞌe ut chiru li Lokꞌlaj Ca̱x tixrach cuukub sut li quicꞌ aꞌan. 15Ut chirix aꞌan ta̱xic chixcamsinquil li te̱lom chiba̱t re xtzꞌa̱manquil xcuybal lix ma̱queb li tenamit. Tixcꞌam lix quiqꞌuel ut ta̱xic cuiꞌchic jun pacꞌal li nimla tꞌicr saꞌ li naꞌajej li cuan cuiꞌ li Lokꞌlaj Ca̱x. Tixrachrachi li quicꞌ saꞌ xbe̱n lix tzꞌapbal re li Lokꞌlaj Ca̱x joꞌ ajcuiꞌ chiru. Tixba̱nu joꞌ quixba̱nu riqꞌuin lix quiqꞌuel li toro. 16Tento nak tixba̱nu chi joꞌcan re nak li Dios tixsantobresi li Lokꞌlaj Santil Naꞌajej ut tixsantobresi ajcuiꞌ li tabernáculo li cuan saꞌ xya̱nkeb xban nak eb laj Israel nequeꞌxmux ru nak nequeꞌxkꞌet lix chakꞌrab ut nequeꞌxmux ru riqꞌuin lix ma̱queb. 17Nak laj Aarón cua̱nk chak saꞌ li Lokꞌlaj Santil Naꞌajej chixqꞌuebal lix mayej re xtojbal rix lix ma̱c aꞌan ut eb li cuanqueb saꞌ li rochoch joꞌ eb ajcuiꞌ lix ma̱queb li tenamit, ma̱ ani naru na-oc saꞌ li tabernáculo toj ta̱e̱lk chak saꞌ li Lokꞌlaj Santil Naꞌajej. 18Nak ta̱e̱lk chak laj Aarón, ta̱xic chixqꞌuebal lix quiqꞌuel li toro ut li chiba̱t saꞌ xbe̱n lix artal li Ka̱cuaꞌ bar nequeꞌxcꞌat cuiꞌ li mayej re xsantobresinquil. Tixyul li quicꞌ chiru li xucub li cuan saꞌ xca̱ xucu̱til. 19Ut tixrach li quicꞌ cuukub sut saꞌ xbe̱n li artal riqꞌuin ruꞌuj rukꞌ re nak li Dios tixsantobresi xban nak eb laj Israel nequeꞌxmux ru riqꞌuin li incꞌaꞌ us nequeꞌxba̱nu. 20Nak laj Aarón ta̱rakekꞌ chixsantobresinquil li Lokꞌlaj Santil Naꞌajej ut li tabernáculo joꞌ ajcuiꞌ li artal, tixtakla xcꞌambal li chiba̱t li yoꞌyo. 21Ut tixqꞌue xcabichal li rukꞌ saꞌ xjolom li chiba̱t ut tixye chixjunil li ma̱c ut li ma̱usilal li queꞌxba̱nu eb laj Israel. Tixba̱nu chi joꞌcan re nak ta̱cana̱k chixjunil li ma̱c saꞌ xbe̱n li chiba̱t. Ut jun li cui̱nk xakabanbil li ta̱cꞌamok re, re ta̱rachꞌab chak saꞌ li chaki chꞌochꞌ. 22Ut li te̱lom chiba̱t li ta̱rachꞌab chak saꞌ li chaki chꞌochꞌ tixcꞌam chixjunil lix ma̱usilaleb laj Israel saꞌ li naꞌajej li ma̱cꞌaꞌ cuiꞌ cristian. 23Ut chirix aꞌan, ta̱oc laj Aarón saꞌ li tabernáculo. Ta̱risi li rakꞌ lino li quixqꞌue chirix nak qui-oc saꞌ li Lokꞌlaj Santil Naꞌajej ut tixcanab aran. 24Ut saꞌ ajcuiꞌ li naꞌajej aꞌan ta̱ati̱nk ut tixqꞌue li rakꞌ jun chic chirix. Ut ta̱e̱lk chak saꞌ li Santil Naꞌajej re tixqꞌue lix cꞌatbil mayej re xtojbal rix lix ma̱c aꞌan ut re ajcuiꞌ xtojbal rix lix ma̱queb li tenamit. 25Ut tixcꞌat saꞌ li artal lix xe̱bul lix mayejeb re xtzꞌa̱manquil xcuybal lix ma̱queb. 26Ut li cui̱nk li ta̱cꞌamok re li chiba̱t saꞌ li chaki chꞌochꞌ bar ma̱cꞌaꞌ cristian, tento nak tixpuchꞌ li rakꞌ ut ta̱ati̱nk. Tojoꞌnak ta̱oc cuiꞌchic saꞌ li naꞌajej li cuanqueb cuiꞌ lix muheba̱leb laj Israel. 27Ut ta̱isi̱k saꞌ li naꞌajej aꞌan lix tibel li toro ut li chiba̱t li quicꞌanjelac xquiqꞌuel saꞌ li Santil Naꞌajej re xtojbal rix li ma̱c. Ut aran chirix li naꞌajej aꞌan ta̱cꞌatekꞌ lix tibel rech xiquic lix tzꞌu̱mal ut lix cꞌot. 28Li ani ta̱cꞌatok reheb lix tibel li xul aꞌan, tento nak ta̱ati̱nk ut tixpuchꞌ li rakꞌ. Chirix aꞌan naru na-oc saꞌ li naꞌajej li cuanqueb cuiꞌ lix muheba̱leb laj Israel. 29Aꞌin jun chakꞌrab tenebanbil saꞌ e̱be̱n ut cua̱nk chi junelic. Te̱ba̱nu la̱ex aj Israel joꞌ ajcuiꞌ eb li jalaneb xtenamit li cuanqueb saꞌ e̱ya̱nk. Saꞌ li laje̱b xbe li xcuuk li po te̱ba̱nu le̱ ayu̱n ut ma̱ jun li cꞌanjel te̱ba̱nu. 30Saꞌ li cutan aꞌan texmayejak re xtojbal rix le̱ ma̱c. Ut ta̱cuyekꞌ le̱ ma̱c xban li Ka̱cuaꞌ ut cuybilak sachbilak chic le̱ ma̱c. 31Aꞌan jun li hiloba̱l cutan kꞌaxal lokꞌ chokꞌ e̱re re nak texhila̱nk ut te̱ba̱nu le̱ ayu̱n. Aꞌan jun chakꞌrab tenebanbil saꞌ e̱be̱n la̱ex re nak te̱ba̱nu chi junelic. 32Laj tij, li xakabanbil chokꞌ xyucuaꞌileb laj tij saꞌ xnaꞌaj lix yucuaꞌ ut qꞌuebil saꞌ xjolom li aceite, aꞌan li ta̱qꞌuehok re li mayej re xtojbal rix lix ma̱queb li tenamit. Aꞌan ta̱rocsi li rakꞌeb laj tij yi̱banbil riqꞌuin lino, li ac kꞌaxtesinbil chiru li Ka̱cuaꞌ Dios. 33Tixba̱nu chixjunil li tento xba̱nunquil re nak li Dios tixsantobresi li Lokꞌlaj Santil Naꞌajej. Ut tixsantobresi ajcuiꞌ li tabernáculo ut li artal. Chi joꞌcaꞌin tixtoj rix lix ma̱queb laj tij joꞌ eb ajcuiꞌ chixjunileb li tenamit. 34Aꞌan aꞌin li chakꞌrab xinqꞌue e̱re. Joꞌcaꞌin te̱ba̱nu rajlal chihab re xtojbal rix li ma̱c queba̱nu la̱ex aj Israel, chan li Dios. Ut laj Aarón quixba̱nu joꞌ quiyeheꞌ re laj Moisés xban li Dios.
Currently Selected:
Levítico 16: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
