Levítico 15
15
Li chakꞌrab chirix li namuxuc reheb li cui̱nk
1Li Ka̱cuaꞌ quia̱tinac riqꞌuin laj Moisés ut laj Aarón ut quixye reheb: 2—Tex-a̱tinak riqꞌuineb laj Israel ut te̱ye reheb chi joꞌcaꞌin: Muxbil ru li cui̱nk li na-el xyaꞌal lix tzꞌejcual xban junak yajel. 3Muxbil ru ta̱cana̱k usta yo̱k chi e̱lc xyaꞌal lix tzꞌejcual, usta naxcanab e̱lc. 4Muxbil ru ta̱cana̱k li cuarib li ta̱yocla̱k cuiꞌ li cui̱nk aꞌan, joꞌ ajcuiꞌ li naꞌajej li ta̱cꞌojla̱k cuiꞌ. 5Ut muxbilak ru li ani ta̱chꞌeꞌok re li cuarib aꞌan. Tento nak ta̱ati̱nk ut tixpuchꞌ li rakꞌ ut muxbil ru ta̱cana̱k toj ta̱oc li kꞌojyi̱n. 6Ut muxbilak ru li ani ta̱cꞌojla̱k saꞌ li naꞌajej li xcꞌojla cuiꞌ li cui̱nk aꞌan. Tento nak ta̱ati̱nk ut tixpuchꞌ li rakꞌ ut muxbil ru ta̱cana̱k toj ta̱oc li kꞌojyi̱n. 7Li ani ta̱chꞌeꞌok re junak li cui̱nk yo̱ chi e̱lc xyaꞌal lix tzꞌejcual, tento nak ta̱ati̱nk ut tixpuchꞌ li rakꞌ ut muxbilak ru ta̱cana̱k toj ta̱oc li kꞌojyi̱n. 8Ut cui li cui̱nk li yo̱ chi e̱lc xyaꞌal lix tzꞌejcual tixchu̱ba junak, li jun li quichu̱ba̱c muxbilak ru ta̱cana̱k toj ta̱oc li kꞌojyi̱n. Tento nak ta̱ati̱nk ut tixpuchꞌ li rakꞌ. 9Ut cui li cui̱nk li yo̱ chi e̱lc xyaꞌal lix tzꞌejcual yo̱ chi xic chirix cacua̱y, muxbilak chic ru li nacꞌojla cuiꞌ li cui̱nk. 10Cui junak naxchꞌeꞌ li cꞌaꞌak re ru quicuan rubel li cui̱nk aꞌan, li ani xchꞌeꞌoc re muxbil chic ru. Ut muxbil ajcuiꞌ ru li ani ta̱cꞌamok re li cꞌaꞌak re ru aꞌin. Tento nak ta̱ati̱nk ut tixpuchꞌ li rakꞌ ut muxbil ru ta̱cana̱k toj ta̱oc li kꞌojyi̱n. 11Cui junak li cui̱nk yo̱ chi e̱lc xyaꞌal lix tzꞌejcual tixchꞌeꞌ junak chi incꞌaꞌ xchꞌaj li rukꞌ xbe̱n cua, li ani li tixchꞌeꞌ muxbil chic ru. Tento nak ta̱ati̱nk ut tixpuchꞌ li rakꞌ. Li jun aꞌan muxbil ru ta̱cana̱k toj ta̱oc li kꞌojyi̱n. 12Cui li cui̱nk li yo̱ chi e̱lc xyaꞌal lix tzꞌejcual tixchꞌeꞌ junak li chꞌochꞌ ucꞌal, tento nak teꞌxjor li chꞌochꞌ ucꞌal ut cui tixchꞌeꞌ li cꞌaꞌak re ru yi̱banbil riqꞌuin cheꞌ tento nak teꞌxchꞌaj. 13Nak ac xqꞌuira li cui̱nk ut incꞌaꞌ chic na-el xyaꞌal lix tzꞌejcual, tento ta̱roybeni cuukub cutan. Tento nak ta̱ati̱nk ut tixpuchꞌ li rakꞌ riqꞌuin haꞌ li x-el saꞌ junak li yuꞌam haꞌ re nak incꞌaꞌ chic muxbilak ru. 14Saꞌ xcuakxak li cutan tixcꞌam cuib li mucuy malaj cuib li paloma toj sa̱jeb. Tixcꞌam li xul chiru li Ka̱cuaꞌ chiru li oqueba̱l re li tabernáculo ut tixkꞌaxtesi re laj tij. 15Ut laj tij tixmayejaheb. Li jun tixmayeja re xtzꞌa̱manquil xcuybal xma̱c li cui̱nk. Ut li jun chic tixmayeja re lix cꞌatbil mayej. Joꞌcaꞌin tixba̱nu laj tij re nak li cui̱nk ta̱santobresi̱k chiru li Ka̱cuaꞌ riqꞌuin lix yajel. 16Nak junak cui̱nk x-el xyaꞌal lix tzꞌejcual chi ma̱cuaꞌ xban yajel, tento nak ta̱ati̱nk ut muxbil ru ta̱cana̱k toj nak ta̱oc li kꞌojyi̱n. 17Cui li xyaꞌal xtzꞌejcual nanak chiru tꞌicr, malaj ut chiru li yi̱banbil riqꞌuin tzꞌu̱m, tento xpuchꞌbal. Ut muxbil ru ta̱cana̱k toj ta̱oc li kꞌojyi̱n. 18Cui junak cui̱nk xcuan riqꞌuin junak ixk, tento nak teꞌati̱nk chixcabichaleb ut muxbilakeb chic ruheb toj nak ta̱oc li kꞌojyi̱n.
Li chakꞌrab chirix li cꞌaꞌru namuxuc reheb li ixk
19Cui junak ixk yo̱k xyajel re lix po, muxbil ru chiru cuukub cutan. Ut li ani ta̱chꞌeꞌok re li ixk muxbilak ru toj ta̱oc li kꞌojyi̱n. 20Ut muxbilak ru li ta̱yocla̱k cuiꞌ li ixk nak yo̱k xyajel re li po. Ut muxbilak ajcuiꞌ ru li ta̱cꞌojla̱k cuiꞌ. 21Li ani ta̱chꞌeꞌok re lix cuarib li ixk nak yo̱ xyajel re li po, tento nak ta̱ati̱nk ut tixpuchꞌ li rakꞌ ut muxbilak ru toj ta̱oc li kꞌojyi̱n. 22Cui junak tixchꞌeꞌ li cꞌaꞌru ta̱cꞌojla̱k cuiꞌ li ixk aꞌan, li ani xchꞌeꞌoc re tento nak ta̱ati̱nk ut tixpuchꞌ li rakꞌ. Ut muxbil chic ru ta̱cana̱k toj ta̱oc li kꞌojyi̱n. 23Li ani ta̱chꞌeꞌok re lix cuarib, malaj ut li cꞌaꞌru ta̱cꞌojla̱k cuiꞌ li ixk aꞌan, muxbil ru ta̱cana̱k toj ta̱oc li kꞌojyi̱n. 24Cui junak cui̱nk ta̱cua̱nk riqꞌuin junak ixk nak yo̱ xyajel re li po, muxbilak ru li cui̱nk chiru cuukub cutan ut muxbilak ajcuiꞌ li cuarib li ta̱yocla̱k cuiꞌ li cui̱nk. 25Ut cui nachal xyajel re li po junak li ixk chi toj ma̱jiꞌ xkꞌehil, ut cui nabay, li ixk aꞌan muxbilak ru joꞌ najtil ta̱ba̱yk lix yajel re li po joꞌ naxba̱nu nak naxcꞌul lix yajel. 26Ut muxbilak ru ajcuiꞌ li cuarib li naxyocob cuiꞌ rib li ixk. Ut muxbil ajcuiꞌ ru li nacꞌojla cuiꞌ, joꞌ naxcꞌul nak yo̱ xyajel re li po. 27Ut muxbilak ru li ani ta̱chꞌeꞌok re li cꞌaꞌak re ru aꞌin. Tento nak ta̱ati̱nk ut tixpuchꞌ li rakꞌ. Muxbil ru ta̱cana̱k toj ta̱oc li kꞌojyi̱n. 28Nak acak xrakeꞌ xcꞌulbal lix yajel re li po, li ixk ta̱roybeni cuukub cutan ut chirix aꞌan incꞌaꞌ chic muxbil ru. 29Saꞌ xcuakxak li cutan li ixk tixcꞌam cuib li mucuy malaj ut cuib li paloma toj sa̱j ut tixqꞌue re laj tij chiru li oqueba̱l re li tabernáculo. 30Ut laj tij tixmayeja jun re xtzꞌa̱manquil xcuybal lix ma̱c li ixk ut li jun chic tixmayeja re lix cꞌatbil mayej. Joꞌcaꞌin nak li ixk ta̱santobresi̱k chiru li Ka̱cuaꞌ riqꞌuin li yajel li quixcꞌul. 31La̱ex te̱ye reheb laj Israel nak teꞌxba̱nu li chakꞌrab aꞌin re nak incꞌaꞌ muxbilak ruheb nak teꞌcha̱lk saꞌ lin tabernáculo li cuan saꞌ xya̱nkeb. Cui teꞌxmux ru lin tabernáculo teꞌca̱mk. 32Aꞌin li chakꞌrab reheb li cui̱nk li na-el xyaꞌal lix tzꞌejcual xban nak cuan xyajel, ut reheb ajcuiꞌ li cui̱nk li na-el xyaꞌal lix tzꞌejcual chi ma̱cꞌaꞌ xyajel. Eb li cui̱nk aꞌin muxbil ruheb. 33Li chakꞌrab aꞌin, aꞌan reheb li ixk nak nequeꞌxcꞌul xyajel re li po. Ut reheb ajcuiꞌ li na-el xyaꞌal lix tzꞌejcual, usta cui̱nk usta ixk. Ut re ajcuiꞌ li cui̱nk li ta̱cua̱nk riqꞌuin junak ixk nak yo̱ xyajel re li po.
Currently Selected:
Levítico 15: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
