Hebreos 7

Laj Melquisedec

1Laj Melquisedec aꞌan li rey re li tenamit Salem. Aꞌan ajcuiꞌ laj tij chiru li nimajcual Dios. Laj Melquisedec qui-el chak chixcꞌulbal laj Abraham ut quirosobtesi nak quisukꞌi chak chixsachbal ruheb li rey. 2Ut li joꞌ qꞌuial quire̱chani chak laj Abraham saꞌ li ple̱t riqꞌuineb li rey, quixqꞌue li junju̱nk saꞌ xlaje̱tkil re laj Melquisedec. Li cꞌabaꞌej Melquisedec naraj naxye “rey re li ti̱quilal”. Ut li cꞌabaꞌej Salem naraj naxye “tuktu̱quil usilal”. Joꞌcan nak laj Melquisedec, aꞌan rey re li ti̱quilal ut rey re li tuktu̱quil usilal. 3Incꞌaꞌ nanauman ani lix yucuaꞌ laj Melquisedec chi moco lix naꞌ chi moco lix xeꞌto̱nil yucuaꞌ. Incꞌaꞌ nanauman chirix lix yoꞌlajic chi moco lix camic. Laj Melquisedec, aꞌan retalil li Jesucristo ut aꞌan laj tij chi junelic. 4Qꞌuehomak retal nak laj Melquisedec, kꞌaxal nim xcuanquil chiru laj Abraham. Laj Abraham, aꞌan xyucuaꞌeb laj Israel, abanan quixqꞌue re laj Melquisedec li junju̱nk saꞌ xlaje̱tkil li quire̱chani chak saꞌ li ple̱t. 5Tzꞌi̱banbil saꞌ li chakꞌrab li quiqꞌueheꞌ re laj Moisés nak eb li cristian teꞌxqꞌue reheb laj tij li junju̱nk saꞌ xlaje̱tkil li cꞌaꞌru cuan reheb. Eb laj tij, aꞌan eb li ralal xcꞌajol laj Leví. Queꞌxba̱nu chi joꞌcan usta laj Abraham, aꞌan lix xeꞌto̱nil yucuaꞌ chixjunileb, laj tij joꞌqueb ajcuiꞌ li cristian. 6Laj Melquisedec ma̱cuaꞌ xcomoneb li ralal xcꞌajol laj Leví aban laj Abraham quixqꞌue li junju̱nk saꞌ xlaje̱tkil re laj Melquisedec. Nim xcuanquil laj Abraham xban nak ac yechiꞌinbil re li rosobtesinquil xban li Dios. Aban laj Melquisedec kꞌaxal nim cuiꞌchic lix cuanquil. Joꞌcan nak quirosobtesi laj Abraham. 7Nakanau chi tzꞌakal nak li na-osobtesin, aꞌan li nim xcuanquil chiru li na-osobtesi̱c. Joꞌcan nak nakanau nak nim xlokꞌal laj Melquisedec chiru xlokꞌal laj Abraham. 8Eb laj tij aj Israel queꞌxcꞌul ajcuiꞌ li junju̱nk saꞌ xlaje̱tkil. Aꞌaneb yal cui̱nkeb ut queꞌcam. Abanan laj Melquisedec moco quicam ta. Joꞌcan tzꞌi̱banbil saꞌ li Santil Hu. 9Eb li ralal xcꞌajol laj Leví, aꞌan eb laj tij. Eb aꞌan li queꞌcꞌuluc re li junju̱nk saꞌ xlaje̱tkil li queꞌxqꞌue laj Israel. Laj Abraham aꞌan lix xeꞌto̱nil yucuaꞌ laj Leví. Joꞌcan nak naru xyebal nak eb li ralal xcꞌajol laj Leví queꞌxqꞌue li junju̱nk saꞌ xlaje̱tkil re laj Melquisedec xban nak laj Abraham quixqꞌue li junju̱nk saꞌ xlaje̱tkil saꞌ xcꞌabaꞌeb aꞌan. 10Naru xyebal chi joꞌcan usta toj ma̱jiꞌ nequeꞌyoꞌla li ralal xcꞌajol laj Leví xban nak laj Abraham, aꞌan lix xeꞌto̱nil yucuaꞌeb. Riqꞌuin aꞌan nakanau nak laj Melquisedec nim xcuanquil chiruheb li ralal xcꞌajol laj Leví. 11Li ralal xcꞌajol laj Leví ut laj Aarón, aꞌaneb li nequeꞌchꞌoloban chiruheb laj Israel lix ya̱lal lix chakꞌrab li Dios li quixye laj Moisés. Abanan chi moco li chakꞌrab chi moco eb laj tij li ta̱ru̱k ta̱colok ke. Cui ta eb laj tij ut li chakꞌrab, incꞌaꞌ raj chic quitakla̱c chak junak aj tij kꞌaxal nim xcuanquil joꞌ nak quicuan laj Melquisedec. Laj tij li quitakla̱c chak ma̱cuaꞌ xcomoneb laj Aarón. 12Laj tij li quitakla̱c chak jalan chic lix cꞌanjel. Joꞌcan nak quijala ajcuiꞌ ru li chakꞌrab. 13Li a̱tin aꞌin tzꞌi̱banbil chirix li Jesucristo. Aꞌan ma̱cuaꞌ ralal xcꞌajol laj Leví. Aꞌan ralal xcꞌajol laj Judá. Ma̱ jun ralal xcꞌajol laj Judá xakabanbil chokꞌ aj tij chi mayejac. 14Laj Moisés, nak quia̱tinac chirixeb laj tij, ma̱ jun cua quixye nak saꞌ xya̱nkeb ta li ralal xcꞌajol laj Judá ta̱e̱lk chak junak aj tij. Ut li Jesucristo quiyoꞌla saꞌ xya̱nkeb li ralal xcꞌajol laj Judá.

Kꞌaxal nim xcuanquil li Jesús chiru xcuanquil laj Melquisedec

15Riqꞌuin aꞌin nanauman nak li Jesucristo nim xcuanquil chiruheb laj tij li queꞌcuan saꞌ xya̱nkeb aj Israel. Li Jesucristo, aꞌan aj tij joꞌ nak quicuan laj Melquisedec ut aꞌan ma̱cuaꞌ ralal xcꞌajol laj Leví. 16Li Jesucristo incꞌaꞌ quixakaba̱c chokꞌ aj tij joꞌ quixye li chakꞌrab. Xakabanbil ban chokꞌ aj tij xban nak nim xcuanquil ut yoꞌyo chi junelic. 17Joꞌcaꞌin tzꞌi̱banbil saꞌ li Santil Hu chirix li Ka̱cuaꞌ Jesucristo:

La̱at aj tij chi junelic joꞌ nak quicuan laj Melquisedec. (Sal. 110:4)

18Joꞌcan nak li chakꞌrab li quicuan junxil ma̱cꞌaꞌ chic rajbal xban nak ma̱cꞌaꞌ chic xcuanquil. 19Ma̱ ani nacoleꞌ xban li chakꞌrab li quicuan chak junxil. Abanan cuan kayoꞌon anakcuan kꞌaxal nim xcuanquil chiru li chakꞌrab. Li kayoꞌon, aꞌan li Jesucristo. Ut xban aꞌan cua̱nko chi sum a̱tin riqꞌuin li Dios. 20Li Jesucristo xakabanbil chokꞌ aj tij xban li Dios riqꞌuin juramento. 21Abanan ma̱cuaꞌ riqꞌuin juramento nak queꞌxakaba̱c chokꞌ aj tij li ralal xcꞌajol laj Leví. Aꞌut li Ka̱cuaꞌ Jesucristo xakabanbil chokꞌ aj tij xban li Dios riqꞌuin juramento. Tzꞌi̱banbil saꞌ li Santil Hu chi joꞌcaꞌin:

Li Dios quia̱tinac riqꞌuin li Ralal ut quixye re: Saꞌ incꞌabaꞌ la̱in tinye a̱cue: La̱at laj tij chi junelic joꞌ nak quicuan laj Melquisedec, chan. Li Dios incꞌaꞌ tixjal lix cꞌaꞌux xban nak quixpatzꞌ lix lokꞌlaj cꞌabaꞌ. (Sal. 110:4)

22Riqꞌuin li juramento aꞌin, saꞌ xcꞌabaꞌ li Jesucristo, nim xcuanquil li acꞌ contrato, ut kꞌaxal lokꞌ chiru li quicuan junxil. 23Najter nabaleb laj tij queꞌcuan chak. Incꞌaꞌ queꞌcana saꞌ xcꞌanjel chi junelic li junju̱nk xban nak nequeꞌcam ut jalan chic nacana chokꞌ re̱kaj. 24Aban li Ka̱cuaꞌ Jesucristo, aꞌan chic li tzꞌakal laj tij. Ma̱ jaruj chic ta̱sicꞌma̱nk junak re̱kaj xban nak aꞌan yoꞌyo chi junelic. 25Li Jesucristo aꞌan tzꞌakal ta̱colok reheb chixjunileb li nequeꞌpa̱ban re li Dios saꞌ xcꞌabaꞌ aꞌan. Li Jesucristo yoꞌyo chi junelic ut naa̱tinac chirixeb chiru li Dios. 26Li Ka̱cuaꞌ Jesucristo, aꞌan li tzꞌakal xyucuaꞌil aj tij. Ut aꞌan li natenkꞌan ke chi tzꞌakal. Moco juntakꞌe̱t ta lix yuꞌam riqꞌuineb laj ma̱c. Li Jesucristo santo ut ma̱cꞌaꞌ xma̱c. Aꞌan co̱ saꞌ choxa ut aran quiqꞌueheꞌ xnimal xlokꞌal. 27Li Jesucristo ma̱cuaꞌ joꞌqueb lix yucuaꞌileb aj tij li queꞌcuan saꞌ xya̱nkeb laj Israel. Eb aꞌan cuulaj cuulaj nequeꞌxmayeja li xul re xtojbal rix lix ma̱queb joꞌ ajcuiꞌ lix ma̱queb li tenamit. Aban li Jesucristo jun sut ajcuiꞌ quixmayeja rib re xtojbal rix li kama̱c. 28Joꞌ tzꞌi̱banbil saꞌ li chakꞌrab najter, eb li xakabanbil chokꞌ xyucuaꞌil aj tij, aꞌan yal cui̱nkeb. Abanan mokon, nak quisacheꞌ xcuanquil li chakꞌrab, li Dios quixxakab riqꞌuin juramento li Ralal chokꞌ xyucuaꞌil aj tij. Riqꞌuin ut aꞌan li Jesucristo tzꞌakal re ru chi cꞌanjelac chi junelic.

Currently Selected:

Hebreos 7: kek

Highlight

Copy

Compare