Hebreos 3

Kꞌaxal nim xcuanquil li Ka̱cuaꞌ Jesucristo chiru xcuanquil laj Moisés

1Ex herma̱n, la̱ex sicꞌbil e̱ru xban li Dios chokꞌ ralal xcꞌajol. Cheqꞌuehak e̱chꞌo̱l chixcꞌoxlanquil li Jesucristo. Aꞌan li quitakla̱c chak xban li Dios chi cꞌanjelac joꞌ xyucuaꞌil aj tij saꞌ li kapa̱ba̱l. 2Li Jesucristo quipa̱ban chi tzꞌakal chiru li Dios li quixakaban chak re chi cꞌanjelac joꞌ xyucuaꞌil aj tij. Ut laj Moisés quipa̱ban ajcuiꞌ chiru li Dios nak quicꞌanjelac chi cꞌamoc be chiruheb laj Israel. 3Abanan li Jesucristo numtajenak cuiꞌchic xlokꞌal chiru xlokꞌal laj Moisés. Li Jesucristo, aꞌan chanchan jun aj cablanel. Li ani nayi̱ban junak cab, aꞌan kꞌaxal nim xcuanquil saꞌ xbe̱n usta kꞌaxal cha̱bil li cab li naxyi̱b. 4Li junju̱nk chi ochoch cuan ani nayi̱ban re; aꞌut li quiyi̱ban re chixjunil li cꞌaꞌak re ru cuan, aꞌan li Ka̱cuaꞌ Dios. 5Relic chi ya̱l nak laj Moisés quipa̱ban chiru li Dios ut quicꞌamoc be chiruheb laj Israel. Quixchꞌolob xya̱lal li cꞌaꞌru ta̱cꞌulma̱nk mokon. Laj Moisés yal aj cꞌanjel chiru li Dios. 6Aban li Ka̱cuaꞌ Jesucristo, aꞌan tzꞌakal Ralal li Dios ut cuan xcuanquil chi takla̱nc saꞌ xbe̱neb li ralal xcꞌajol li Dios. La̱o li ralal xcꞌajol li Dios cui caꞌaj cuiꞌ riqꞌuin li Dios nocoyoꞌonin ut cauhak kachꞌo̱l saꞌ li kapa̱ba̱l toj saꞌ rosoꞌjic li cutan.

Naru to-oc chi hila̱nc riqꞌuin li Dios

7Li Ka̱cuaꞌ Jesucristo kꞌaxal nim xcuanquil. Joꞌcan nak takabi li ra̱tin li naxye li Santil Musikꞌej:

Cherabihak anakcuan li cua̱tin.

8Me̱ba̱nu joꞌ queꞌxba̱nu le̱ xeꞌto̱nil yucuaꞌ nak queꞌxkꞌet chak li cua̱tin. Queꞌcuechꞌoc ut nequeꞌayaynac ut queꞌxyal inchꞌiꞌchꞌiꞌinquil nak cuanqueb chak saꞌ li chaki chꞌochꞌ.

9Aran queꞌxqꞌue injoskꞌil le̱ xeꞌto̱nil yucuaꞌ. Chiru caꞌcꞌa̱l chihab queꞌril li usilal li quilajinba̱nu reheb. Abanan junelic yo̱queb chixqꞌuebal injoskꞌil.

10Xban aꞌan nak quinpoꞌ inchꞌo̱l saꞌ xbe̱neb li tenamit aꞌin. Ut quinye: Junelic nequeꞌxcuiba xchꞌo̱leb ut incꞌaꞌ nequeꞌraj xba̱nunquil lix ya̱lal. Incꞌaꞌ nequeꞌxba̱nu li cꞌaꞌru nacuaj.

11Nak quichal injoskꞌil ut quinye, relic chi ya̱l nak ma̱ jokꞌe teꞌoc chi hila̱nc saꞌ li cha̱bil naꞌajej cꞌu̱banbil inban, chan li Dios. (Sal. 95:7-11)

12Ex herma̱n, cheqꞌuehak retal nak ma̱ jun taxak saꞌ e̱ya̱nk incꞌaꞌ tixpa̱b li Dios xma̱c lix ma̱usilal. Ma̱re anchal tixtzꞌekta̱na li yoꞌyo̱quil Dios. 13Cheqꞌuehak ban e̱naꞌleb che̱ribil e̱rib rajlal cutan nak toj naru xba̱nunquil. Chetenkꞌa e̱rib che̱ribil e̱rib re nak ma̱ jun ta̱balakꞌi̱k xban li ma̱c, xban nak li nabalakꞌi̱c xban li ma̱c incꞌaꞌ chic naraj xba̱nunquil li cꞌaꞌru naraj li Dios. 14Totzꞌako̱nk riqꞌuin xlokꞌal li Jesucristo cui nakaqꞌue kachꞌo̱l chixpa̱banquil. Chanru nak xkatiquib chak xpa̱banquil li Ka̱cuaꞌ, joꞌcan taxak toj chalen saꞌ rosoꞌjic li cutan. 15Joꞌcaꞌin tzꞌi̱banbil saꞌ li Santil Hu li quixye li Dios:

Cherabihak li cua̱tin anakcuan. Me̱cacuubresi e̱chꞌo̱l joꞌ queꞌxba̱nu chak le̱ xeꞌto̱nil yucuaꞌ nak queꞌxkꞌet chak li cua̱tin. (Sal. 95:7-8)

16¿Aniheb li queꞌkꞌetoc chak re li ra̱tin li Dios li quixye reheb? Aꞌaneb chixjunileb li queꞌel chak Egipto nak laj Moisés quicꞌamoc be chiruheb. 17¿Ani saꞌ aj be̱n quijoskꞌoꞌ li Dios chiru li caꞌcꞌa̱l chihab? Saꞌ xbe̱neb li queꞌma̱cob ut queꞌcam saꞌ li chaki chꞌochꞌ. 18Ut, ¿aniheb aj e quixye li Dios nak relic chi ya̱l incꞌaꞌ teꞌoc chi hila̱nc riqꞌuin saꞌ li cha̱bil naꞌajej? Reheb li queꞌkꞌetoc re lix chakꞌrab. 19Ut relic chi ya̱l xbaneb lix kꞌetba a̱tin, incꞌaꞌ queꞌoc chi hila̱nc saꞌ li cha̱bil naꞌajej.

Currently Selected:

Hebreos 3: kek

Highlight

Copy

Compare