Gálatas 5

Me̱qꞌue chic e̱rib rubel xcuanquil li najter naꞌleb

1Ma̱cuaꞌo chic joꞌ li lokꞌbil mo̱s xban nak moco cuanco ta chic rubel xcuanquil li najter chakꞌrab. Libre ban chic cuanco xban nak li Cristo quicoloc ke chiru xcuanquil li najter chakꞌrab. Chexcua̱nk ut chi cau e̱chꞌo̱l saꞌ le̱ pa̱ba̱l ut me̱qꞌue chic e̱rib rubel xcuanquil li chakꞌrab. 2La̱in laj Pablo. Qꞌuehomak retal li yo̱quin chixyebal e̱re. Cui toj nequecꞌul li circuncisión re nak ta̱ti̱cobresi̱k e̱chꞌo̱l, aꞌan naraj naxye nak ma̱cꞌaꞌ na-oc cuiꞌ che̱ru li Cristo. 3Jun sut chic ninchꞌolob lix ya̱lal che̱ru. Li ani naxcꞌul li circuncisión re nak ta̱ti̱cobresi̱k xchꞌo̱l, tento nak tixba̱nu chixjunil li naxye saꞌ li najter chakꞌrab. 4La̱ex li nequeraj xti̱cobresinquil e̱chꞌo̱l chiru li Dios riqꞌuin xba̱nunquil li naxye saꞌ li chakꞌrab, nequerisi e̱rib riqꞌuin li Cristo ut nequerisi ajcuiꞌ e̱rib riqꞌuin li rusilal li Dios. 5Abanan la̱o yo̱co chiroybeninquil lix ti̱cobresinquil kachꞌo̱l chiru li Dios riqꞌuin xpa̱banquil li Cristo xban nak joꞌcan quicꞌutbesi̱c chiku xban li Santil Musikꞌej. 6Cui la̱o reho chic li Jesucristo, ma̱cꞌaꞌ naxye cui takacꞌul li circuncisión malaj ut incꞌaꞌ. Li kꞌaxal tento xba̱nunquil, aꞌan xpa̱banquil li Jesucristo. Ut cui ya̱l nak nakapa̱b li Cristo, ta̱cꞌutu̱nk li kapa̱ba̱l xban nak nocorahoc. 7Us nak quetiquib chak pa̱ba̱nc junxil. ¿Ani xtacchiꞌin e̱re nak incꞌaꞌ chic yo̱quex chixpa̱banquil li ya̱l? 8Li tacchiꞌ aꞌan incꞌaꞌ nachal riqꞌuin li Dios li quisicꞌoc e̱ru. 9Usta yal caꞌchꞌin li levadura li nachꞌamobresin naqꞌueman, aꞌan naxchꞌamobresi chixjunil li kꞌem. 10La̱in cau inchꞌo̱l saꞌ xcꞌabaꞌ li Ka̱cuaꞌ Jesucristo nak la̱ex moco jalan ta le̱ cꞌaꞌux chiru lin cꞌaꞌux la̱in. Li ani yo̱ chi poꞌoc ru le̱ pa̱ba̱l tixcꞌul xtojbal xma̱c aꞌ yal ani. 11Cui ta toj yo̱quin chixjulticanquil nak tento xcꞌulbal li circuncisión incꞌaꞌ raj chic tineꞌxrahobtesi. Cui ta toj yo̱quin chixba̱nunquil aꞌan, yo̱quin raj risinquil xcuanquil xcamic li Cristo chiru li cruz ut incꞌaꞌ raj chic teꞌjoskꞌokꞌ saꞌ inbe̱n. 12Li ani yo̱queb chi poꞌoc ru le̱ pa̱ba̱l ut yo̱queb chixyebal nak tento xcꞌulbal li circuncisión, us raj cui teꞌxcꞌul eb aꞌan ut teꞌxset raj ribeb chi junaj cua re nak teꞌxcanab chꞌiꞌchꞌiꞌi̱nc saꞌ e̱ya̱nk. 13Ex inherma̱n, la̱ex sicꞌbil e̱ru re nak libre chic cua̱nkex. Abanan moco xban ta nak libre chic cuanquex nak tex-oc chixba̱nunquil li naxrahi ru le̱ chꞌo̱l. Chera ban e̱rib ut chetenkꞌa e̱rib chi ribil e̱rib. 14Chixjunil li chakꞌrab natauman ru riqꞌuin xba̱nunquil li jun aꞌin:

Chara la̱ cuas a̱cui̱tzꞌin joꞌ nak nacara a̱cuib la̱at. (Lev. 19:18)

15Ut cui yo̱quex chixjoskꞌinquil e̱rib ut yo̱quex chixrahobtesinquil e̱rib, chexcꞌoxlak caꞌchꞌinak. Ma̱re anchal te̱poꞌ ru le̱ pa̱ba̱l chi ribil e̱rib.

Chikacanabak kib rubel xcuanquil li Santil Musikꞌej

16Li nacuaj xyebal e̱re, aꞌan aꞌin: Checanabak e̱rib rubel xcuanquil li Santil Musikꞌej re nak aꞌan ta̱beresi̱nk e̱re. Cui te̱ba̱nu aꞌan, incꞌaꞌ chic te̱ba̱nu li incꞌaꞌ us li nequerahi ru xba̱nunquil. 17Li cꞌaꞌru incꞌaꞌ us li nakarahi ru xba̱nunquil kajunes, aꞌan xicꞌ na-ileꞌ xban li Santil Musikꞌej. Ut li cꞌaꞌru us li naxrahi chokꞌ ke li Santil Musikꞌej, aꞌan incꞌaꞌ naxcꞌam rib riqꞌuin li nakaj xba̱nunquil kajunes. Xicꞌ nequeꞌril rib chi ribil rib ut xban aꞌan incꞌaꞌ nakaba̱nu li us li nakaj raj xba̱nunquil. 18Ut cui la̱ex beresinbilex xban li Santil Musikꞌej, moco cuanquex ta chic rubel xcuanquil li najter chakꞌrab. 19Cutan saken cꞌaꞌru li incꞌaꞌ us li nakarahi ru xba̱nunquil kajunes. Aꞌan eb aꞌin: muxuc caxa̱r, coꞌbe̱tac yumbe̱tac, ut li xuta̱nalil naꞌleb, 20lokꞌoni̱nc yi̱banbil dios, tu̱lac, xi̱qꞌuil u̱chi̱nc, pletic, cakali̱nc, joskꞌi̱nc, yoꞌoba̱nc ra xi̱cꞌ, cuechꞌij ib, poꞌoc ru pa̱ba̱l, 21socue̱nc, camsi̱nc ras ri̱tzꞌin, cala̱c, numcuaꞌac num ucꞌac, ut cꞌaꞌak chic re ru joꞌ eb aꞌin. Yo̱quin cuiꞌchic xyebal e̱re aꞌin, usta ac inyehom ajcuiꞌ e̱re, nak li nequeꞌba̱nun re li cꞌaꞌak re ru aꞌin incꞌaꞌ teꞌre̱chani lix nimajcual cuanquilal li Dios. 22Abanan li cꞌaꞌru naxqꞌue li Santil Musikꞌej saꞌ li kayuꞌam, aꞌan li rahoc, sahil chꞌo̱lejil, tuktu̱quil usilal, cuyuc, cha̱bilal, usilal, ti̱quil chꞌo̱lej, 23tu̱lanil ut cuyuc ib. Ma̱cꞌaꞌ junak chakꞌrab naxye nak incꞌaꞌ us xba̱nunquil aꞌin. 24Li ani re chic li Jesucristo, chanchan nak quiqꞌueheꞌ chiru cruz lix najter naꞌleb xban nak ac xcanab xba̱nunquil chi junaj cua li najter naꞌleb li quixrahi ru xba̱nunquil junxil. 25Cui acꞌ chic li kayuꞌam qꞌuebil ke xban li Santil Musikꞌej, chikacanabak kib rubel xcuanquil re nak aꞌan chic ta̱beresi̱nk ke. 26Mikaba̱nu kib nak kꞌaxal nim kacuanquil ut incꞌaꞌ chic chikajoskꞌi kib ut incꞌaꞌ chic chikacakali kib.

Currently Selected:

Gálatas 5: kek

Highlight

Copy

Compare