Ezequiel 26
26
1Saꞌ li xbe̱n cutan re li po nak yo̱ junlaju chihab kacꞌambal Babilonia li Ka̱cuaꞌ quia̱tinac cuiqꞌuin ut quixye cue: 2—At ralal cui̱nk, eb laj Tiro queꞌsahoꞌ xchꞌo̱l ut queꞌxjap re chixyebal, “Us ajcuiꞌ nak xsacheꞌ ru li tenamit Jerusalén. Ma̱cꞌaꞌ chic xcuanquil joꞌ tenamit. La̱o chic ta̱cua̱nk nabal cꞌaꞌru ke xban nak eb aꞌan xeꞌsacheꞌ ruheb.” 3Joꞌcan nak la̱in li nimajcual Dios ninye reheb: La̱in xicꞌ nequexcuil la̱ex li cuanquex Tiro. La̱in tintaklaheb nabal li xni̱nkal ru tenamit chi pletic e̱riqꞌuin. Chanchan nak nachal lix cau ok li palau nak teꞌcha̱lk chi pletic e̱riqꞌuin. 4Teꞌxtꞌan li tzꞌac li sutsu cuiꞌ le̱ tenamit ut teꞌxjuqꞌui li cab li najt xteram li nequecol cuiꞌ e̱rib. La̱in tincuisi chixjunil li cꞌaꞌak re ru cuan aran. Chanchan mesunbil tinba̱nu re. Junes pec aj chic ta̱cana̱k chi ma̱cꞌaꞌ cuan saꞌ xbe̱n. 5Saꞌ xbe̱n li pec li quicuan cuiꞌ li tenamit teꞌxhel chi chakic lix yoyeb laj car. Eb li xni̱nkal ru tenamit teꞌrelkꞌa li cꞌaꞌru cuan saꞌ li tenamit Tiro. La̱in li nimajcual Dios ninyehoc re aꞌin. 6Eb li cuanqueb saꞌ li cocꞌ cꞌaleba̱l teꞌcamsi̱k chi chꞌi̱chꞌ. Riqꞌuin aꞌan teꞌxqꞌue retal nak la̱in li Ka̱cuaꞌ Dios. 7Li nimajcual Dios naxye: —La̱in tintakla chi pletic saꞌ le̱ tenamit laj Nabucodonosor, lix reyeb laj Babilonia, li kꞌaxal nim xcuanquil. Ta̱cha̱lk saꞌ li norte chi pletic e̱riqꞌuin rochbeneb lix qꞌuila soldados, ut eb lix cacua̱y ut eb lix carruaje. 8Teꞌxcamsiheb chi chꞌi̱chꞌ li cuanqueb saꞌ li cocꞌ cꞌaleba̱l. Teꞌxyi̱b lix naꞌajeb re teꞌxcol cuiꞌ ribeb. Teꞌxyi̱b lix takleba̱l re teꞌoc saꞌ le̱ tenamit ut cua̱nk xchꞌi̱chꞌeb re xcolbal re xchꞌo̱leb. 9Teꞌxjor li tzꞌac li sutsu cuiꞌ le̱ tenamit riqꞌuin li jorleb pec. Teꞌxtꞌan ajcuiꞌ li cab li najt xteram li nequecol cuiꞌ e̱rib. 10Nak eb laj Babilonia teꞌoc saꞌ le̱ tenamit, teꞌxcuaclesi nabal li poks ut incꞌaꞌ chic texcꞌutu̱nk. Ut li tzꞌac li sutsu cuiꞌ le̱ tenamit ta̱ecꞌa̱nk saꞌ xnaꞌaj xban xya̱b rokeb lix cacua̱y ut eb lix carruaje nak teꞌoc saꞌ le̱ tenamit joꞌ nak nequeꞌoc saꞌ jun tenamit ac poꞌbil. 11Eb li cacua̱y teꞌnumekꞌ saꞌ chixjunileb li be saꞌ le̱ tenamit. Eb li soldados teꞌxcamsiheb li tenamit riqꞌuin chꞌi̱chꞌ ut teꞌxjuqꞌueb li okech li kꞌaxal cau. 12Teꞌxmakꞌ che̱ru le̱ biomal ut teꞌrelkꞌa li cꞌaꞌru e̱re. Teꞌxjuqꞌui li tzꞌac ut telajeꞌxtꞌan le̱ cha̱bil ochoch. Telajeꞌxcuti saꞌ li palau li pec, li cheꞌ ut chixjunil li mul. 13La̱in tinba̱nu nak incꞌaꞌ chic ta̱abi̱k xya̱b le̱ bich chi moco ta̱abi̱k xya̱b le̱ arpa. 14Le̱ tenamit chanchanak chic jun li pec ma̱cꞌaꞌ cuan saꞌ xbe̱n. Ut eb laj car teꞌxhel lix yoy aran re teꞌchakik. Incꞌaꞌ chic ta̱yi̱ba̱k le̱ tenamit, chan li Dios. 15Li nimajcual Dios naxye ajcuiꞌ reheb laj Tiro: —Nak yo̱keb chixsachbal le̱ tenamit li xicꞌ nequeꞌiloc e̱re, cꞌajoꞌ nak teꞌxucuak li tenamit li cuanqueb chire li palau nak teꞌrabi xya̱beb li yo̱keb chi camsi̱c. 16Ut chixjunileb li cuanqueb xcuanquil saꞌ eb li tenamit li cuanqueb chire li palau teꞌe̱lk saꞌ lix cꞌojariba̱leb xbaneb xxiu ut teꞌrisi chirixeb li rakꞌeb li cuan xsahob ru. Sicsotkeb xbaneb xxiu nak teꞌchunla̱k saꞌ chꞌochꞌ ut sachso̱keb xchꞌo̱l nak teꞌril li cꞌaꞌru te̱cꞌul la̱ex. 17Ut teꞌxbicha li bich aꞌin re rahil chꞌo̱lejil che̱rix la̱ex: Quisacheꞌ ru li tenamit li kꞌaxal naꞌno ru nak quicuan. Aran queꞌcuan li nequeꞌxic saꞌ eb li jucub. Junxil eb li cuanqueb saꞌ li tenamit aꞌin queꞌtaklan saꞌ xbe̱neb li nequeꞌxic saꞌ li palau ut queꞌxqꞌue xxiuheb li cuanqueb chire li palau. 18Anakcuan xsacheꞌ ru li tenamit Tiro. Eb li cuanqueb saꞌ eb li cocꞌ tenamit li sutsu̱queb xban li palau nequeꞌsicsot xban xxiuheb xban nak xsacheꞌ ruheb laj Tiro. 19Aꞌan aꞌin li naxye li nimajcual Dios. —La̱in tincanaba̱nk re li tenamit chi ma̱cꞌaꞌak chic cua̱nk chi saꞌ joꞌ eb li tenamit li queꞌsacheꞌ ruheb ut ma̱ ani chic cuan aran. La̱in tinba̱nu̱nk re nak ta̱butꞌu̱nk li palau saꞌ li tenamit. 20La̱in texintakla chi cua̱nc saꞌ xchamal li ruchichꞌochꞌ bar cuanqueb cuiꞌ li queꞌcam najter. Texincanab chi cua̱nc saꞌ xya̱nkeb li queꞌsacheꞌ ruheb najter. Incꞌaꞌ chic teꞌcua̱nk cristian saꞌ le̱ tenamit, chi moco ta̱yi̱ba̱k chic. 21Xucuajel rilbal li cꞌaꞌru tinba̱nu e̱re. Incꞌaꞌ chic tex-usa̱k. Texsiqꞌuekꞌ aban incꞌaꞌ textaꞌekꞌ, chan li Dios.
Currently Selected:
Ezequiel 26: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
