Ezequiel 19
19
Jun li bich re rahil chꞌo̱lejil chirixeb lix reyeb laj Israel
1Li Dios quixye cue nak tinbicha li bich aꞌin re rahil chꞌo̱lejil chirixeb li nequeꞌtaklan aran Israel: 2La̱ naꞌ chanchan jun li cakcoj li cuan saꞌ xya̱nkeb li cakcoj. Quixqꞌuiresi li cocꞌ ral saꞌ xya̱nkeb aꞌan. 3Quixqꞌuiresi jun li ral ut kꞌaxal cau rib nak quiniman. Quixtzol xchapbal lix tib ut quixcamsiheb li cui̱nk. 4Eb li xni̱nkal ru tenamit queꞌrabi resil ut queꞌxchap saꞌ jun li raꞌal. Riqꞌuin cadena queꞌxcꞌam toj Egipto. 5Li naꞌbej quiril nak incꞌaꞌ us qui-el riqꞌuin li xbe̱n ral. Joꞌcan nak quixqꞌuiresi jun chic li ral toj quiniman chi us. 6Nak ac nim chic, li ral quicuan saꞌ xya̱nkeb li jun chꞌol chic li cakcoj. Quixtzol xchapbal lix tib ut quixcamsiheb li cui̱nk. 7Quirelkꞌa li cꞌaꞌru cuan saꞌ li palacio ut quixpoꞌi li tenamit ut li naꞌajej quicana chi ma̱cꞌaꞌ chic cuan. Cꞌajoꞌ nak queꞌxucuac li cuanqueb saꞌ li tenamit nak queꞌrabi nak quixjap re. 8Ut eb li xni̱nkal ru tenamit queꞌchal chixchapbal. Queꞌchal li cuanqueb chixjun sutam. Queꞌxyi̱beb lix raꞌal re teꞌxchap toj retal nak li cakcoj quitꞌaneꞌ chi saꞌ li raꞌal. 9Queꞌxbacꞌ riqꞌuin cadena ut queꞌxtzꞌap saꞌ jun nimla caxon re teꞌxcꞌam riqꞌuin lix reyeb laj Babilonia. Ut aran queꞌxqꞌue saꞌ tzꞌalam. Joꞌcan nak incꞌaꞌ chic queꞌrabi nak quixjap re saꞌ eb li tzu̱l li cuanqueb Israel. 10Ut quixye reheb li nequeꞌtaklan aran Israel: Le̱ naꞌ chanchan jun xto̱nal li uvas li queꞌrau chire li nimaꞌ. Xban nak nachꞌ cuan li haꞌ riqꞌuin, chꞌinaꞌus nak quiqꞌui. Cꞌajoꞌ li rukꞌ ut nabal li ru naxqꞌue. 11Cau li rukꞌ ut us chokꞌ xxukꞌeb li rey. Quiniman chi us li xto̱nal li uvas ut kꞌaxal najt rok quicuulac. Chixjunileb li tenamit queꞌxqꞌue retal lix najtil rok ut lix cha̱bil ukꞌ. 12Abanan cuan li queꞌjoskꞌoꞌ riqꞌuin ut queꞌxmichꞌ lix xeꞌ ut queꞌxcut saꞌ chꞌochꞌ. Ut li ru quichakic xban li tikcual ikꞌ li xchal saꞌ li este. Quitokeꞌ li rukꞌ ut queꞌchakic ut queꞌcꞌateꞌ. 13Ut queꞌrau li xto̱nal li uva saꞌ li chaki chꞌochꞌ bar ma̱cꞌaꞌ cuiꞌ haꞌ. 14Quiloch xxamlel li xto̱nal ut quixcꞌat li rukꞌ joꞌ ajcuiꞌ li ru. Incꞌaꞌ chic ta̱cua̱nk li rukꞌ cha̱bil chokꞌ xxukꞌeb li rey. Aꞌan aꞌin jun li bich re rahil chꞌo̱lej ut qꞌuila sut ta̱bichama̱nk re rahil chꞌo̱lej.
Currently Selected:
Ezequiel 19: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
