Éxodo 16
16
Li Dios quixqꞌue li tzacae̱mk maná xcꞌabaꞌ
1Jun po riqꞌuin oꞌlaju cutan reliqueb chak Egipto nak queꞌel chixjunileb laj Israel saꞌ li naꞌajej Elim. Coxeꞌxtau li chaki chꞌochꞌ Sin xcꞌabaꞌ li nacana saꞌ xyiheb li naꞌajej Elim ut Sinaí. 2Ut aran saꞌ li chaki chꞌochꞌ aꞌan chixjunileb queꞌoc chixchꞌiꞌchꞌiꞌinquil laj Moisés ut laj Aarón. 3Queꞌxye reheb: —Incꞌaꞌ ta peꞌ cuan co-el chak Egipto. Kꞌaxal us raj nak coxcamsi ta li Ka̱cuaꞌ Dios nak toj cuanco chak saꞌ li tenamit Egipto. Aran sa cuanco cuiꞌ. Cuan katib ut cuan kacaxlan cua ut nujenako chi junelic. Ut la̱ex xoe̱cꞌam chak arin saꞌ li chaki chꞌochꞌ ut yo̱co chi xcuybal li kasaꞌ ut ca̱mc ke xban cueꞌej, chanqueb. 4Li Ka̱cuaꞌ Dios quixye re laj Moisés: —Anakcuan ta̱cuil cꞌaꞌru tinba̱nu. La̱in tintakla chak le̱ cua saꞌ choxa. Rajlal cutan eb li cristian teꞌxxoc li joꞌ qꞌuial teꞌxcuaꞌ chiru li jun cutan. Tincuil ma yo̱queb chixpa̱banquil lin chakꞌrab. 5Ut saꞌ xcuak li cutan teꞌxxoc tzꞌakal re cuib cutan, chan li Dios. 6Queꞌchakꞌoc laj Moisés ut laj Aarón, ut queꞌxye reheb chixjunileb laj Israel: —Anakcuan saꞌ li ecuu aꞌin, la̱ex te̱nau nak li Ka̱cuaꞌ Dios, aꞌan li qui-isin chak e̱re saꞌ li tenamit Egipto. 7Cuulaj ekꞌela te̱ril xnimal xlokꞌal li Ka̱cuaꞌ Dios. Aꞌan xrabi nak yo̱quex chixchꞌiꞌchꞌiꞌinquil. ¿Aniho la̱o nak yo̱quex chikacuechꞌinquil?— 8Laj Moisés quixye ajcuiꞌ reheb: —Rajlal ecuu li Ka̱cuaꞌ Dios tixqꞌue chak le̱ tib re te̱tzaca ut rajlal ekꞌela tixqꞌue chak le̱ cua li joꞌ qꞌuial te̱raj. Li Ka̱cuaꞌ Dios xrabi nak yo̱quex chi cuechꞌi̱nc. ¿Aniho la̱o nak yo̱quex chikacuechꞌinquil? Moco la̱o ta yo̱quex chikacuechꞌinquil. Li Ka̱cuaꞌ Dios ban li yo̱quex chixcuechꞌinquil.— 9Laj Moisés quixye re laj Aarón: —Joꞌcaꞌin ta̱ye reheb chixjunileb laj Israel, “Quimkex. Chꞌutubomak e̱rib chiru li Ka̱cuaꞌ Dios. Aꞌan xrabi nak yo̱quex chi cuechꞌi̱nc,” chaꞌkat reheb.— 10Ut nak laj Aarón yo̱ chi a̱tinac riqꞌuineb laj Israel, queꞌiloc saꞌ li chaki chꞌochꞌ ut aran queꞌril nak li Ka̱cuaꞌ Dios quixcꞌutbesi lix lokꞌal chiruheb saꞌ li chok. 11Li Ka̱cuaꞌ Dios quixye re laj Moisés: 12—La̱in xcuabi nak yo̱queb chi cuechꞌi̱nc laj Israel. Ta̱ye reheb nak joꞌcaꞌin xinye la̱in. “Rajlal ecuu textiꞌok tib ut ekꞌela texcuaꞌak cua. Chi joꞌcan te̱nau nak la̱in li Ka̱cuaꞌ le̱ Dios”, chan li Dios. 13Ut joꞌcan qui-uxman. Nak ac ecuu chic quilajeꞌchal nabaleb laj to̱nkꞌ saꞌ li naꞌajej li cuanqueb cuiꞌ. Ut nak quisake̱u, cꞌajoꞌ lix chuꞌque cuan aran. 14Nak nachakic li xchuꞌque, natꞌoroxin chic saꞌ xbe̱n chꞌochꞌ li teꞌxyi̱b chokꞌ xcuaheb. 15Nak eb laj Israel queꞌril aꞌan, queꞌxye chi ribileb rib: —¿Cꞌaꞌ put ru aꞌan? chanqueb xban nak ma̱ jun sut rilomeb. Ut laj Moisés quixye reheb: —Aꞌin le̱ tzacae̱mk li xqꞌue chak e̱re li Ka̱cuaꞌ Dios. 16Li Dios quixye nak che̱junilex te̱xoc li joꞌ qꞌuial naru te̱cuaꞌ. Te̱xoc junju̱nk cocꞌ chacach che̱ju̱nkal, chan. 17Ut eb laj Israel queꞌxba̱nu chi joꞌcan. Cuan queꞌxxoc nabal ut cuan queꞌxxoc caꞌchꞌin ajcuiꞌ. 18Tzꞌakal tzꞌakal li queꞌxxoc. Li queꞌxxoc nabal, ma̱cꞌaꞌ li qui-elaꞌan. Ut li queꞌxxoc caꞌchꞌin, tzꞌakal ajcuiꞌ reheb xban nak joꞌ xqꞌuialeb saꞌ rochocheb, joꞌcan ajcuiꞌ xqꞌuial li queꞌxxoc. 19Laj Moisés quixye reheb: —Ma̱cꞌaꞌ relaꞌ te̱cꞌu̱la re cuulaj, chan. 20Cuan li incꞌaꞌ queꞌabin chiru laj Moisés. Cuan li queꞌxcꞌu̱la re cuulaj. Ut quichuhoꞌ ut quimotzoꞌin. Ut laj Moisés quipoꞌ riqꞌuineb. 21Cuulaj cuulaj queꞌxxoc li joꞌ qꞌuial naru teꞌxcuaꞌ. Ut nak quitikcuoꞌ li sakꞌe quihaꞌoꞌ li joꞌ qꞌuial incꞌaꞌ queꞌxxoc. 22Saꞌ xcuak li cutan queꞌxxoc re cuib cutan. Caꞌcab cocꞌ chacach queꞌxxoc chixju̱nkaleb. Ut eb li cui̱nk li nequeꞌcꞌamoc be saꞌ xya̱nkeb laj Israel queꞌco̱eb xpatzꞌbal re laj Moisés cꞌaꞌut nak queꞌxba̱nu chi joꞌcan. 23Laj Moisés quixye reheb: —Joꞌcan xye li Ka̱cuaꞌ Dios. Cuulaj li hiloba̱l cutan. Aꞌan jun lokꞌlaj cutan chiru li Ka̱cuaꞌ Dios. Te̱jora li joꞌ qꞌuial te̱raj ut te̱chik li joꞌ qꞌuial te̱raj ut li ta̱elaꞌa̱nk naru te̱xoc re cuulaj, chan. 24Joꞌ quixye laj Moisés reheb, joꞌcan queꞌxba̱nu. Ut incꞌaꞌ quichuhoꞌ chi moco quimotzoꞌin. 25Joꞌ cuulajak chic laj Moisés quixye reheb: —Anakcuan incꞌaꞌ tixqꞌue li tzacae̱mk li Ka̱cuaꞌ Dios xban nak anakcuan hiloba̱l cutan. Te̱cuaꞌ li qui-elaꞌan ecue̱r. 26Saꞌ xcuuk li cutan ma̱cꞌaꞌ ta̱cua̱nk xban nak hiloba̱l cutan aꞌan. Cuakib cutan ajcuiꞌ te̱xoc le̱ tzacae̱mk, chan laj Moisés. 27Saꞌ xcuuk li cutan cuan queꞌco̱eb chi xxocbal ut ma̱cꞌaꞌ queꞌxtau. 28Li Ka̱cuaꞌ Dios quixye re laj Moisés: —¿Cꞌaꞌut nak incꞌaꞌ nequeꞌabin chicuu? 29La̱in xinqꞌue e̱re li hiloba̱l cutan re nak texhila̱nk. Xban aꞌan xinye e̱re nak saꞌ xcuak li cutan te̱xoc re cuib cutan, chan li Dios. 30Tojoꞌnak eb li cristian queꞌhilan saꞌ xcuuk li cutan. 31Eb laj Israel maná queꞌxqꞌue chokꞌ xcꞌabaꞌ li tzacae̱mk aꞌan. Li maná sak ut chanchan riyajil li culantro. Lix sahil chanchan yi̱banbil caxlan cua riqꞌuin xyaꞌal cab. 32Laj Moisés quixye reheb. —Aꞌin li quixye li Ka̱cuaꞌ Dios. Te̱xoc jun chꞌina chacachak li maná re xcꞌutbal chiruheb le̱ ralal e̱cꞌajol chanru li tzacae̱mk li quixqꞌue chak e̱re nak cuanquex chak saꞌ li chaki chꞌochꞌ re nak le̱ ralal e̱cꞌajol teꞌril chanru li tzacae̱mk quetzaca chak nak quexcuisi chak saꞌ li tenamit Egipto, chan li Dios e̱re. 33Laj Moisés quixye re laj Aarón: —Ta̱xoc li maná aꞌin saꞌ jun cꞌu̱leba̱l ut ta̱qꞌue aꞌan saꞌ li naꞌajej bar takalokꞌoni cuiꞌ li Dios. Ut mokon te̱cꞌut chiruheb le̱ ralal e̱cꞌajol, chan. 34Laj Aarón quixba̱nu joꞌ quiyeheꞌ re laj Moisés xban li Ka̱cuaꞌ Dios. Quixcꞌu̱la li maná re nak mokon tixqꞌue saꞌ li naꞌajej ta̱cꞌu̱la̱k cuiꞌ li pec li tzꞌi̱banbil cuiꞌ li laje̱b chi chakꞌrab. 35Caꞌcꞌa̱l (40) chihab queꞌxcuaꞌ li maná toj retal queꞌcuulac saꞌ li nuba̱l re li cha̱bil naꞌajej. Canaán xcꞌabaꞌ li naꞌajej aꞌan. 36Laje̱b cocꞌ chacach li maná na-oc saꞌ jun li bisleb efa xcꞌabaꞌ.
Currently Selected:
Éxodo 16: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
