2 Corintios 2

1Joꞌcan nak xincꞌoxla nak toj ma̱jiꞌ chic tinxic e̱riqꞌuin xban nak incꞌaꞌ nacuaj xqꞌuebal xrahil e̱chꞌo̱l. 2Cui inma̱c la̱in nak ta̱rahokꞌ e̱chꞌo̱l, ¿ani ta chic ta̱qꞌuehok xsahil inchꞌo̱l la̱in xban nak caꞌaj cuiꞌ la̱ex nequeqꞌue xsahil inchꞌo̱l? Cui ta xincuulac e̱riqꞌuin xinqꞌue raj xrahil e̱chꞌo̱l. 3Joꞌcan nak xintzꞌi̱ba li hu li xintakla e̱riqꞌuin. Incꞌaꞌ xco̱in e̱riqꞌuin xban nak incꞌaꞌ xcuaj xrahoꞌ inchꞌo̱l e̱ban la̱ex li xeqꞌue raj xsahil inchꞌo̱l. Ninnau nak nasahoꞌ ajcuiꞌ e̱chꞌo̱l la̱ex cui sa saꞌ inchꞌo̱l la̱in. 4Nak xintzꞌi̱bac e̱riqꞌuin xinyotꞌeꞌ ut xinya̱bac xban nak xrahoꞌ saꞌ inchꞌo̱l. Incꞌaꞌ xintzꞌi̱bac e̱riqꞌuin re xqꞌuebal xrahil e̱chꞌo̱l. Re ban nak te̱nau nak kꞌaxal raro̱quex inban.

Checuyak xma̱c li quixba̱nu li incꞌaꞌ us

5Li ani quixqꞌue xrahil inchꞌo̱l xban li incꞌaꞌ us quixba̱nu, moco caꞌaj cuiꞌ la̱in ta quixqꞌue xrahil inchꞌo̱l. Quixqꞌue aj ban cuiꞌ xrahil e̱chꞌo̱l la̱ex. Aban ma̱re cuan ajcuiꞌ incꞌaꞌ quirahoꞌ xchꞌo̱l xban. Abanan ninnau nak cuan ajcuiꞌ queꞌrahoꞌ xchꞌo̱l xban. Incꞌaꞌ nacuaj xkꞌusbal chi kꞌaxal cau. 6Tzꞌakal lix kꞌusbal li yo̱ chixcꞌulbal e̱riqꞌuin. 7Us cui te̱cuy xma̱c anakcuan ut te̱cꞌojob xchꞌo̱l xban nak naru nachꞌinan cuiꞌchic xchꞌo̱l. 8Nintzꞌa̱ma che̱ru nak checꞌutak chiru nak nequera. 9Xban aꞌan nak xintzꞌi̱bac e̱riqꞌuin junxil. Ut xintzꞌi̱bac ajcuiꞌ xban nak nacuaj xnaubal ma te̱ba̱nu chixjunil li cꞌaꞌru ninye e̱re. 10Cui te̱cuy xma̱c aꞌan la̱in tincuy ajcuiꞌ xma̱c. Li ani te̱cuy xma̱c la̱ex, tincuy ajcuiꞌ xma̱c la̱in. Cui ani nincuy xma̱c, aꞌan ninba̱nu re e̱tenkꞌanquil ajcuiꞌ la̱ex. Ut li Cristo naxnau nak ninba̱nu chi anchal inchꞌo̱l. 11Takacuy xma̱c re nak laj tza incꞌaꞌ ta̱numta̱k saꞌ kabe̱n xban nak chikajunilo ac nakanau nak aꞌan cuan xnaꞌleb chi balakꞌic.

Laj Pablo ra saꞌ xchꞌo̱l xban nak ma̱ ani laj Tito aran Troas

12Nak quincuulac saꞌ li tenamit Troas chi cꞌanjelac chiru li Ka̱cuaꞌ, kꞌaxal queꞌxqꞌue xchꞌo̱l chirabinquil nak quinchꞌolob xya̱lal li colba-ib saꞌ xcꞌabaꞌ li Jesucristo. 13Abanan nak quincuulac Troas quirahoꞌ inchꞌo̱l xban nak ma̱ ani aran li kaherma̱n Tito chixyebal cue chanru cuanquex. Joꞌcan nak quinchakꞌrabiheb ut quincꞌulun arin saꞌ li naꞌajej Macedonia.

La̱o taklanbilo xban li Dios chixchꞌolobanquil xya̱lal chirix li Jesucristo

14Nakabantioxi re li Dios xban nak yalak bar nocoxic li Cristo nacꞌamoc be chiku ut naxqꞌue kacuanquilal chi e̱lc chi us riqꞌuin chixjunil. Nak nakachꞌolob xya̱lal li Cristo, chanchan xbo̱c li sununquil ban li naxic yalak bar. 15Chanchano li sununquil ban li quixmayeja li Cristo chiru li Dios. Lix bo̱c nacuulac riqꞌuineb li nequeꞌcoleꞌ ut nacuulac ajcuiꞌ riqꞌuineb li nequeꞌsach. 16Chiruheb li nequeꞌsach chanchan xchuhil li camenak li nacamsin. Abanan chiruheb li nequeꞌcoleꞌ chanchan jun sununquil ban li naqꞌuehoc yuꞌam. ¿Ani tzꞌakal cuan xnaꞌleb chixchꞌolobanquil lix ya̱lal li colba-ib? 17Caꞌaj cuiꞌ la̱o li taklanbilo xban li Dios. Chi anchal kachꞌo̱l nococꞌanjelac chiru li Dios saꞌ xcꞌabaꞌ li Cristo xban nak reho chic. Moco juntakꞌe̱to ta riqꞌuineb li jun chꞌol chic li incꞌaꞌ nequeꞌxqꞌue xlokꞌal li ra̱tin li Dios. Chanchaneb aj yaconel nak nequeꞌxsicꞌ xtumineb riqꞌuin xyebal li ra̱tin li Dios.

Currently Selected:

2 Corintios 2: kek

Highlight

Copy

Compare