1 Tesalonicenses 3
3
1Xban aꞌan nak kꞌaxal takaj raj rabinquil e̱resil. Incꞌaꞌ chic xkacuy roybeninquil. Joꞌcan nak la̱o xocana arin Atenas kajunes. 2Ut xkatakla li hermano Timoteo e̱riqꞌuin. Aꞌan laj cꞌanjel chiru li Dios chixyebal resil li colba-ib saꞌ xcꞌabaꞌ li Cristo. Laj Timoteo tixqꞌue xcacuilal e̱chꞌo̱l saꞌ le̱ pa̱ba̱l ut tixqꞌue ajcuiꞌ e̱naꞌleb. 3Incꞌaꞌ nakaj nak ta̱chꞌina̱k e̱chꞌo̱l xban li raylal aꞌin. La̱ex nequenau nak takacꞌul li raylal. 4Nak toj cuanco chak saꞌ e̱ya̱nk xkaye resil e̱re nak takacꞌul li raylal la̱o aj pa̱banel. Ac nequenau la̱ex nak joꞌcan quicꞌulman. 5Joꞌcan nak xintakla laj Timoteo e̱riqꞌuin xban nak incꞌaꞌ chic xincuy roybeninquil resil chanru cuanquex saꞌ le̱ pa̱ba̱l. Ma̱re anchal xex-a̱le̱c xban laj tza ut li kacꞌanjel ma̱re chicana̱k chi ma̱cꞌaꞌ rajbal. 6Tojeꞌ xsukꞌi chak laj Timoteo e̱riqꞌuin ut aꞌan xcꞌam chak jun cha̱bil esilal che̱rix chanru nak cau e̱chꞌo̱l saꞌ le̱ pa̱ba̱l ut chanru nak nequexrahoc. Ut xye ajcuiꞌ ke nak rajlal nocoe̱cꞌoxla joꞌ ajcuiꞌ nak nequexkacꞌoxla la̱o. La̱ex nequeraj rilbal ku ut joꞌcan ajcuiꞌ la̱o nakaj rilbal e̱ru la̱ex. 7Riqꞌuin aꞌin, ex herma̱n, saꞌ chixjunil li raylal li yo̱co chixcꞌulbal, nacꞌojla kachꞌo̱l chirabinquil nak cau e̱chꞌo̱l saꞌ le̱ pa̱ba̱l. 8Ut anakcuan naru chic tocua̱nk chi sa saꞌ kachꞌo̱l xban nak nakanau nak cau e̱chꞌo̱l saꞌ e̱pa̱ba̱l saꞌ xcꞌabaꞌ li Jesucristo. 9Incꞌaꞌ nakatau chanru nak takabantioxi chiru li Dios riqꞌuin lix sahil li kachꞌo̱l nequeqꞌue ke saꞌ xcꞌabaꞌ le̱ pa̱ba̱l. Li Dios naxnau nak cꞌajoꞌ xsahil li kachꞌo̱l e̱ban la̱ex. 10Chi kꞌek chi cutan nakatzꞌa̱ma chiru li Dios nak takil cuiꞌchic e̱ru re nak takaqꞌue xcacuilal e̱chꞌo̱l saꞌ le̱ pa̱ba̱l. 11Aꞌ taxak li Dios li kaYucuaꞌ ut aꞌ taxak li Ka̱cuaꞌ Jesucristo chitenkꞌa̱nk ke re nak ta̱ru̱k toxic cuiꞌchic e̱riqꞌuin. 12Aꞌ taxak li Ka̱cuaꞌ chitenkꞌa̱nk e̱re re nak te̱ra e̱rib che̱ribil e̱rib ut chi anchal e̱chꞌo̱l cherahak taxak le̱ ras e̱ri̱tzꞌin joꞌ nak nequexkara la̱ex. 13Aꞌ taxak li Dios li kaYucuaꞌ chiqꞌuehok xcacuil e̱chꞌo̱l. Tzꞌakalak taxak re ru le̱ pa̱ba̱l. Ma̱cꞌaꞌak taxak e̱ma̱c chiru li Dios nak ta̱cha̱lk li Jesucristo rochbeneb li ac colbileb.
Currently Selected:
1 Tesalonicenses 3: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
