1 Pedro 5

Xqꞌuebal xnaꞌleb laj cꞌamol be

1Ut anakcuan tinye cuib oxibak li a̱tin reheb laj cꞌamol be saꞌ e̱ya̱nk la̱ex aj pa̱banel. La̱in ajcuiꞌ e̱rochben chi cꞌamoc be ut quicuil tzꞌakal nak li Cristo quixcꞌul raylal. La̱in tintzꞌako̱nk ajcuiꞌ joꞌ nak la̱ex textzꞌako̱nk saꞌ lix nimal xlokꞌal li ta̱cꞌutbesi̱k. 2La̱ex laj cꞌamol be, tintzꞌa̱ma che̱ru nak te̱qꞌue e̱chꞌo̱l chirilbaleb li ralal xcꞌajol li Dios joꞌ nak laj ilol xul narileb lix xul chi anchal xchꞌo̱l. Te̱qꞌue e̱chꞌo̱l chixchꞌolaninquileb laj pa̱banel li kꞌaxtesinbil e̱re xban li Dios chi ma̱cuaꞌ minbil e̱ru. Te̱ba̱nu ban chi anchal e̱chꞌo̱l. Me̱ba̱nu yal xban xrahinquil ru le̱ tojbal. Cheba̱nu ban xban nak te̱raj cꞌanjelac chiru li Dios. 3Me̱taklaheb saꞌ joskꞌil li kꞌaxtesinbileb e̱re. Te̱taklaheb ban saꞌ xya̱lal. Cha̱bilakex chiruheb re nak teꞌril le̱ cha̱bilal. 4Li Jesucristo aꞌan tzꞌakal laj ilol ke. Cui nakachꞌolaniheb chi us li kꞌaxtesinbileb ke, li Jesucristo tixqꞌue kakꞌajca̱munquil nak tol-e̱lk cuiꞌchic. Li kakꞌajca̱munquil aꞌan incꞌaꞌ nalaj incꞌaꞌ na-osoꞌ. Ut totzꞌako̱nk ajcuiꞌ riqꞌuin lix nimal xlokꞌal. 5Ut anakcuan, ex herma̱n, tinye cuib oxibak a̱tin e̱re la̱ex li toj sa̱jex. Chex-abi̱nk chiruheb li nequeꞌcꞌamoc be saꞌ e̱ya̱nk. Me̱nimobresi e̱rib che̱ribil e̱rib. Chetenkꞌa ban e̱rib che̱ribil e̱rib che̱junilex joꞌ tzꞌi̱banbil saꞌ li Santil Hu:

Li Dios naxtzꞌekta̱naheb li kꞌetkꞌeteb ut naxba̱nu usilal reheb li nequeꞌxcubsi ribeb. (Prov. 3:34)

6Checubsi biꞌ e̱cuanquil chiru li Dios li kꞌaxal nim xcuanquil re nak li Dios tixnimobresi le̱ cuanquil nak tixtau xkꞌehil. 7Checanabak saꞌ rukꞌ li Dios chixjunil li cꞌaꞌak re ru yo̱ e̱cꞌaꞌux chirix xban nak li Dios naxqꞌue xchꞌo̱l che̱rix la̱ex. 8Chicua̱nk e̱naꞌleb re xcolbal e̱rib chiru laj tza xban nak laj tza yo̱ chixsicꞌbal ani ta̱ra̱le. Laj tza aꞌan chanchan li cakcoj ca̱mc re xban xtzꞌocajic ut yo̱ chixsutinquil rib yalak bar re xsicꞌbal ani tixcamsi re tixtiu. 9Me̱qꞌue e̱rib chi a̱le̱c xban laj tza. Cauhak ban e̱chꞌo̱l saꞌ le̱ pa̱ba̱l. Michꞌinan e̱chꞌo̱l nak ta̱cha̱lk junak raylal saꞌ e̱be̱n. Nequenau nak ma̱cuaꞌ caꞌaj cuiꞌ la̱ex yo̱quex chi cꞌuluc raylal. Joꞌcan ajcuiꞌ nequeꞌxcꞌul le̱ rech aj pa̱banelil yalak bar jun sut saꞌ ruchichꞌochꞌ. 10La̱ex te̱cꞌul li raylal. Cuyomak cuan caꞌchꞌinak xban nak chi se̱b ajcuiꞌ nocoxtenkꞌa li Dios. Aꞌan ta̱tzꞌakobresi̱nk e̱ru. Aꞌan ta̱tenkꞌa̱nk e̱re re nak incꞌaꞌ ta̱chꞌina̱nk e̱chꞌo̱l. Tixqꞌue ban xcacuil e̱chꞌo̱l. Li Dios, li naqꞌuehoc ke li usilal, aꞌan quibokoc ke chi tzꞌako̱nc riqꞌuin lix nimal xlokꞌal saꞌ choxa kochben li Cristo. 11Aꞌan taxak chinima̱k xcuanquil chi junelic kꞌe cutan. Joꞌcan taxak.

Xrakbal li hu riqꞌuin sahil chꞌo̱lej

12Laj Silvano, aꞌan jun tzꞌakal aj pa̱banel. Aꞌan ta̱cꞌamok re li hu aꞌin xintzꞌi̱ba chokꞌ e̱re. Moco qꞌui ta li a̱tin xintzꞌi̱ba e̱re. Riqꞌuin li a̱tin aꞌin yo̱quin chixqꞌuebal e̱naꞌleb. Xinchꞌolob xya̱lal che̱ru chanru li rusilal li Dios. Aꞌin taxak chiqꞌuehok xcacuil e̱chꞌo̱l. 13Eb laj pa̱banel li cuanqueb Babilonia nequeꞌxtakla xsahil e̱chꞌo̱l. Eb aꞌan sicꞌbil ajcuiꞌ ruheb xban li Dios joꞌ la̱ex. Naxtakla ajcuiꞌ xsahil e̱chꞌo̱l laj Marcos, li ninra joꞌ cualal. 14Cheqꞌuehak xsahil e̱chꞌo̱l che̱ribil e̱rib riqꞌuin santil utzꞌuc u xban nak nequera e̱rib. Chicua̱nk taxak li tuktu̱quil usilal e̱riqꞌuin xban nak la̱ex chic ralal xcꞌajol li Cristo. Joꞌcan taxak.

Currently Selected:

1 Pedro 5: kek

Highlight

Copy

Compare