1 Corintios 8

Xqꞌuebal xnaꞌlebeb chirix li tzacae̱mk mayejanbil chiruheb li yi̱banbil dios

1Cuan cuib oxib cua̱tin tinye e̱re chirix li tzacae̱mk mayejanbil chiruheb li yi̱banbil dios. Nakanau nak chikajunilo ac xkatzol kib chirix aꞌin. Abanan toj cuan saꞌ e̱ya̱nk nequeꞌxcꞌoxla nak nequeꞌxnau chixjunil ut riqꞌuin aꞌan nequeꞌxkꞌetkꞌeti rib. Aban li ani narahoc, aꞌan naxtenkꞌa li rech aj pa̱banelil chi qꞌui̱c saꞌ lix pa̱ba̱l. 2Li ani narecꞌa nak cuan xnaꞌleb, li jun aꞌan toj ma̱jiꞌ naxtau lix ya̱lal chi tzꞌakal. 3Abanan li ani narahoc re li Dios, li Dios naxnau nak aꞌan li ralal xcꞌajol. 4Anakcuan tina̱tinak chirix li tzacae̱mk mayejanbil chiruheb li yi̱banbil dios. La̱o nakanau nak li yi̱banbil dios ma̱cꞌaꞌ nequeꞌoc cuiꞌ xban nak moco dioseb ta. Nakanau nak jun ajcuiꞌ li Dios cuan. 5Cuan nequeꞌyehoc re nak cuan nabal li dios joꞌ saꞌ choxa joꞌ saꞌ ruchichꞌochꞌ. Dios ut Ka̱cuaꞌ nequeꞌxye reheb. Ut ya̱l nak cuan nabaleb li yi̱banbil dios. 6Abanan la̱o aj pa̱banel nakanau nak jun ajcuiꞌ li Dios cuan. Ut li Dios Acuabej aꞌan li quiyi̱ban re chixjunil li cꞌaꞌru cuan. Coxyoꞌobtesi la̱o re nak takalokꞌoni aꞌan. Ut jun ajcuiꞌ li Ka̱cuaꞌ cuan, aꞌ li Jesucristo. Ut saꞌ xcꞌabaꞌ aꞌan cuan chixjunil ut saꞌ xcꞌabaꞌ aꞌan nak cuan li colba-ib. 7Abanan moco chixjunileb ta nequeꞌxtau ru lix ya̱lal aꞌin chirix li mayejanbil tzacae̱mk. Cꞌaynakeb chalen chak najter chixpa̱banquil li yi̱banbil dios, ut anakcuan nak nequeꞌxtzaca li tzacae̱mk mayejanbil chiru li yi̱banbil dios nequeꞌxcꞌoxla nak yo̱queb chixqꞌuebal xlokꞌal li yi̱banbil dios. Ut xban nak toj kꞌuneb xchꞌo̱l saꞌ lix pa̱ba̱l, nequeꞌxcꞌoxla nak nequeꞌxmux ru lix pa̱ba̱leb. 8Moco xban ta li katzacae̱mk nak tocua̱nk chi sum a̱tin riqꞌuin li Dios. Li tzacae̱mk incꞌaꞌ naxnimobresi xcuanquil li kapa̱ba̱l chi moco naxpoꞌ li kapa̱ba̱l. 9Naru te̱tzaca li mayejanbil tzacae̱mk. Abanan cheqꞌuehak retal nak incꞌaꞌ te̱luctasi xchꞌo̱l li toj kꞌuneb xchꞌo̱l saꞌ lix pa̱ba̱leb xban nak nequetzaca aꞌan. Cheqꞌuehak retal nak incꞌaꞌ ta̱oc cuiꞌchic chi ma̱cobc e̱ban la̱ex. 10La̱ex nequenau lix ya̱lal aꞌin. Nequenau nak moco ma̱c ta xtzacanquil li tzacae̱mk mayejanbil. Abanan cui junak aj pa̱banel toj kꞌun xchꞌo̱l saꞌ xpa̱ba̱l ta̱ilok e̱re nak cꞌojcꞌo̱quex saꞌ me̱x chi cuaꞌac cuan cuiꞌ li yi̱banbil dios, ma̱re aꞌan tixtzaca li mayejanbil chiruheb li yi̱banbil dios ut tixcꞌoxla nak xmux ru lix pa̱ba̱l. 11La̱ex nequenau nak naru te̱tzaca li mayejanbil tzacae̱mk. Abanan, ma̱re yal e̱ma̱c la̱ex nak ta̱oc cuiꞌchic chi ma̱cobc li toj ma̱jiꞌ nacacuu saꞌ xpa̱ba̱l. La̱ex nequenau nak li Cristo quicam ajcuiꞌ saꞌ xcꞌabaꞌ eb aꞌan. 12Cui e̱ban la̱ex nak yo̱queb chi lucta̱c xchꞌo̱leb le̱ rech aj pa̱banelil li toj kꞌuneb xchꞌo̱l saꞌ lix pa̱ba̱l, yo̱quex chi ma̱cobc chiruheb aꞌan. Ut yo̱quex ajcuiꞌ chi ma̱cobc chiru li Cristo. 13Joꞌcan nak cui li nintzaca naxqꞌue chi ma̱cobc li cuech aj pa̱banelil, ma̱ jokꞌe chic tintiu li mayejanbil tib xban nak incꞌaꞌ nacuaj nak teꞌma̱cobk inban la̱in.

Currently Selected:

1 Corintios 8: kek

Highlight

Copy

Compare