1 Corintios 16

Li xtenkꞌanquileb laj pa̱banel li cuanqueb Jerusalén

1Anakcuan nacuaj xyebal e̱re chanru te̱ba̱nu riqꞌuin li tumin li yo̱quex chixxocbal re xtenkꞌanquileb le̱ rech aj pa̱banelil li cuanqueb aran Jerusalén. Joꞌ xinye reheb laj pa̱banel aran Galacia, joꞌcan ajcuiꞌ tinye e̱re la̱ex. 2Rajlal xama̱n, saꞌ li xbe̱n cutan re li xama̱n, che̱junju̱nkalex te̱qꞌue li joꞌ qꞌuial texru̱k aꞌ yal joꞌ nimal le̱ tojbal te̱cꞌul. Ut li tumin aꞌin ac xocbilak e̱ban nak tincuulak e̱riqꞌuin re nak incꞌaꞌ yo̱kex chi xococ tumin nak tincuulak la̱in. 3Ut te̱sicꞌ ruheb li ani teꞌxic Jerusalén chixcanabanquil li tumin. Ut nak tincuulak e̱riqꞌuin, tintzꞌi̱ba li hu teꞌxcꞌam nak teꞌxic Jerusalén chixkꞌaxtesinquil li tumin reheb laj pa̱banel. 4Cui naxqꞌue rib nak tinxic la̱in, cuochbeneb nak toxic.

Laj Pablo yo̱ chixcauresinquil lix xiquic Corinto

5Nak tinxic e̱riqꞌuin, xbe̱n cua toxinnumekꞌ Macedonia. 6Ma̱re tinba̱yk caꞌchꞌinak e̱riqꞌuin. Ma̱re toj tinnumsi li habalkꞌe e̱riqꞌuin re nak cua̱nk saꞌ e̱chꞌo̱l nak tine̱tenkꞌa chi xic tojaꞌ yal na bar tinxic. 7Incꞌaꞌ nacuaj nak yal numecꞌ cue nak tincuulak e̱riqꞌuin. Nacuaj ban tincua̱nk jarubak cutan e̱riqꞌuin cui joꞌcan naraj li Ka̱cuaꞌ Dios. 8Abanan toj tinnumsi li ninkꞌe Pentecostés arin Éfeso tojoꞌnak tinxic e̱riqꞌuin. 9Yo̱ chi e̱lc chi us lin cꞌanjel arin xban nak nabaleb nequeꞌraj rabinquil resil li colba-ib. Abanan cuan ajcuiꞌ li xicꞌ nequeꞌrabi resil li colba-ib. 10Cui ta̱cuulak laj Timoteo e̱riqꞌuin, checꞌulak chi sa saꞌ e̱chꞌo̱l re nak sahak saꞌ xchꞌo̱l aꞌan ut ma̱cꞌaꞌak xcꞌaꞌux nak cua̱nk saꞌ e̱ya̱nk. Aꞌan yo̱ chi cꞌanjelac chiru li Ka̱cuaꞌ joꞌ nak nincꞌanjelac la̱in. 11Joꞌcan ut ma̱ ani chitzꞌekta̱na̱nk re. Chetenkꞌa riqꞌuin li cꞌaꞌru re, re nak ta̱cha̱lk cuiꞌchic cuiqꞌuin saꞌ xya̱lal. La̱in yo̱quin chiroybeninquil nak ta̱cha̱lk cuiꞌchic cuiqꞌuin rochbeneb li herma̱n. 12Nabal sut xintzꞌa̱ma chiru li hermano Apolos nak ta̱xic e̱riqꞌuin rochbeneb li herma̱n. Abanan aꞌan quirecꞌa saꞌ xchꞌo̱l nak toj ma̱jiꞌ ta̱ru̱k chi xic. Nak tixqꞌue rib ta̱cuulak aran che̱rilbal.

Laj Pablo naxrak lix hu

13Michꞌinan e̱chꞌo̱l saꞌ le̱ pa̱ba̱l. Cauhak taxak e̱chꞌo̱l chi pa̱ba̱nc ut me̱qꞌue e̱rib chi a̱le̱c. Yoꞌon cua̱nkex ut chepa̱bak li Ka̱cuaꞌ chi anchal e̱chꞌo̱l, usta nachal raylal saꞌ e̱be̱n. 14Ut chixjunil li cꞌaꞌru te̱ba̱nu, cheba̱nuhak chi anchal e̱chꞌo̱l xban nak nequera le̱ ras e̱ri̱tzꞌin. 15Ex inherma̱n, la̱ex ac nequenau nak laj Estéfanas ut li rixakil joꞌqueb ajcuiꞌ li ralal xcꞌajol, aꞌaneb li xbe̱n queꞌpa̱ban aran Acaya. Eb aꞌan queꞌxqꞌue xchꞌo̱l chi cꞌanjelac chiruheb li rech aj pa̱banelil. 16Joꞌcan nak tintzꞌa̱ma che̱ru nak tex-abi̱nk chiru laj Estéfanas joꞌqueb ajcuiꞌ chixjunileb li nequeꞌtenkꞌan ut nequeꞌcꞌanjelac saꞌ e̱ya̱nk. 17Nasahoꞌ saꞌ inchꞌo̱l nak xeꞌcꞌulun cuiqꞌuin laj Estéfanas ut laj Fortunato ut laj Acaico. Eb aꞌan xeꞌtenkꞌan cue chokꞌ e̱ru̱chil la̱ex nak ma̱ anihex cuiqꞌuin. 18Queꞌxqꞌue xcacuil inchꞌo̱l. Chanru nak xextenkꞌa̱c la̱ex xbaneb, joꞌcan ajcuiꞌ nak xineꞌxtenkꞌa la̱in. Joꞌcan nak che-oxlokꞌiheb li herma̱n aꞌan. 19Chixjunileb laj pa̱banel li cuanqueb Asia nequeꞌxtakla xsahil e̱chꞌo̱l saꞌ xcꞌabaꞌ li Ka̱cuaꞌ. Nequeꞌxtakla ajcuiꞌ nabal xsahil e̱chꞌo̱l eb li herma̱n laj Aquila ut lix Priscila. Ut nequeꞌxtakla ajcuiꞌ nabal xsahil e̱chꞌo̱l chixjunileb laj pa̱banel li nequeꞌxchꞌutub rib saꞌ rochoch laj Aquila. 20Chixjunileb laj pa̱banel li cuanqueb arin nequeꞌxtakla xsahil e̱chꞌo̱l. Ut joꞌcan ajcuiꞌ la̱ex, cheqꞌuehak xsahil e̱chꞌo̱l che̱ribil e̱rib riqꞌuin santil utzꞌuc u.#Saꞌ li versículo 16:20 najter kꞌe cutan eb li herma̱n cꞌaynakeb chixqꞌuebal xsahileb xchꞌo̱l riqꞌuin li utzꞌuc u. Aꞌan li santil utzꞌuc u nayeman re xban nak saꞌ xcꞌabaꞌ li Jesucristo queꞌxba̱nu aꞌan. Naraj naxye nak te̱qꞌue xsahil e̱chꞌo̱l chi ribil e̱rib saꞌ xcꞌabaꞌ li Jesucristo, joꞌ cꞌaynakex xba̱nunquil. 21La̱in laj Pablo. Riqꞌuin cuukꞌ yo̱quin chixtzꞌi̱banquil li a̱tin aꞌin re xqꞌuebal xsahil e̱chꞌo̱l. 22Li Ka̱cuaꞌ Jesucristo chi se̱b ta̱cha̱lk. Cui cuan junak saꞌ e̱ya̱nk incꞌaꞌ naxra li Jesucristo, chi cha̱lc ta raylal saꞌ xbe̱n. 23Aꞌ taxak li rusilal li Ka̱cuaꞌ chicua̱nk e̱riqꞌuin. 24Kꞌaxal nequexinra che̱junilex xban nak junajo chic saꞌ xcꞌabaꞌ li Ka̱cuaꞌ Jesucristo. Joꞌcan taxak.

Currently Selected:

1 Corintios 16: kek

Highlight

Copy

Compare