1 Corintios 15

Lix cuaclijic chi yoꞌyo li Jesucristo saꞌ xya̱nkeb li camenak

1Anakcuan ex inherma̱n, tinchꞌolob cuiꞌchic che̱ru li resil li colba-ib. Li resil aꞌan, aꞌan li ac xinye e̱re ut xecꞌu̱luban saꞌ e̱chꞌo̱l ut riqꞌuin aꞌan cau chic e̱chꞌo̱l saꞌ le̱ pa̱ba̱l. 2Aꞌan aꞌin lix ya̱lal li xinchꞌolob che̱ru, li xexcoleꞌ cuiꞌ. La̱ex colbilex chic cui nequexpa̱ban chi tzꞌakal ut incꞌaꞌ nequecanab xpa̱banquil. Abanan cui incꞌaꞌ nequepa̱b chi anchal e̱chꞌo̱l, ma̱cꞌaꞌ rajbal nak xexpa̱ban. 3Li cꞌaꞌru quixcꞌut li Ka̱cuaꞌ chicuu, aꞌan ajcuiꞌ li xinchꞌolob che̱ru. Lix ya̱lal aꞌan kꞌaxal nim xcuanquil ut aꞌan aꞌin: nak li Ka̱cuaꞌ Jesucristo quicam re xtojbal rix li kama̱c joꞌ tzꞌi̱banbil najter saꞌ li Santil Hu xbaneb li profeta. 4Joꞌ nak queꞌxtzꞌi̱ba chak li profeta najter, joꞌcan quicꞌulman. Li Ka̱cuaꞌ Jesucristo quimukeꞌ ut quicuacli cuiꞌchic chi yoꞌyo saꞌ rox li cutan. 5Chirix aꞌan li Ka̱cuaꞌ Jesucristo quixcꞌut rib chiru li apóstol Pedro ut quixcꞌut ajcuiꞌ rib chiruheb chixjunileb li apóstol. 6Ut chirix chic aꞌan quixcꞌut rib chiruheb numenak o̱b ciento chi aj pa̱banel nak chꞌutchꞌu̱queb. Saꞌ xya̱nkeb aꞌan cuanqueb nabaleb toj yoꞌyo̱queb anakcuan ut cuanqueb ajcuiꞌ li ac camenakeb. 7Ut mokon li Ka̱cuaꞌ Jesucristo quixcꞌut rib chiru laj Jacobo ut quixcꞌut ajcuiꞌ rib chiruheb chixjunileb li apóstol. 8Ut chirix chixjunil aꞌan, quixcꞌut ajcuiꞌ rib chicuu la̱in, usta la̱in chanchanin jun cꞌulaꞌal toj ma̱jiꞌ naxtau xkꞌehil xyoꞌlajic xban nak la̱in toj ma̱jiꞌ ninyoꞌla saꞌ lin pa̱ba̱l nak quixcꞌut rib chicuu. 9La̱in cubenak incuanquil chiruheb chixjunileb li apóstol ut ma̱cuaꞌ raj incꞌulub nak la̱inak apóstol xban nak la̱in xinrahobtesiheb chak laj pa̱banel. 10Abanan xban rusilal li Dios nak la̱in apóstol. Ut li rusilal li Dios incꞌaꞌ quicana chi ma̱cꞌaꞌ rajbal xban nak kꞌaxal cau cuiꞌchic nincꞌanjelac chiru chixjunileb li apóstol. Aban ma̱cuaꞌ injunes nincꞌanjelac. Li Dios natenkꞌan cue xban xnimal rusilal li xinma̱tani. 11Ma̱cꞌaꞌ naxye cui xerabi resil li colba-ib riqꞌuineb li apóstol jun chꞌol malaj cuiqꞌuin la̱in. Juntakꞌe̱t li resil li colba-ib li nakajultica chikajunilo ut aꞌan li xepa̱b la̱ex.

Eb li camenak teꞌcuacli̱k cuiꞌchic chi yoꞌyo

12Ac xkachꞌolob xya̱lal che̱ru nak li Cristo quicuacli cuiꞌchic chi yoꞌyo saꞌ xya̱nkeb li camenak. Abanan toj cuan saꞌ e̱ya̱nk li nequeꞌyehoc re nak incꞌaꞌ teꞌcuacli̱k cuiꞌchic chi yoꞌyo li camenak. 13Cui incꞌaꞌ teꞌcuacli̱k cuiꞌchic chi yoꞌyo eb li camenak, incꞌaꞌ raj ya̱l nak quicuacli cuiꞌchic chi yoꞌyo li Jesucristo sa xya̱nkeb li camenak. 14Cui ta incꞌaꞌ quicuacli cuiꞌchic chi yoꞌyo li Jesucristo, ma̱cꞌaꞌ raj xya̱lal li nakajultica resil, ut ma̱cꞌaꞌ raj rajbal li xepa̱b. 15Ut cui ta incꞌaꞌ quicuacli chi yoꞌyo li Cristo saꞌ xya̱nkeb li camenak, xocana raj la̱o chokꞌ aj balakꞌ riqꞌuin li xkaye chirix li Dios xban nak xkachꞌolob xya̱lal nak li Dios quixcuaclesi cuiꞌchic chi yoꞌyo li Cristo. Abanan incꞌaꞌ raj quixcuaclesi chi yoꞌyo cui ya̱l nak incꞌaꞌ teꞌcuacli̱k cuiꞌchic chi yoꞌyo li camenak. 16Cui ta incꞌaꞌ ya̱l nak teꞌcuacli̱k cuiꞌchic chi yoꞌyo li camenak, incꞌaꞌ raj ya̱l nak quicuacli cuiꞌchic chi yoꞌyo li Cristo. 17Cui ta li Cristo incꞌaꞌ quicuacli cuiꞌchic chi yoꞌyo, ma̱cꞌaꞌ raj rajbal le̱ pa̱ba̱l. Toj cua̱nkex raj ajcuiꞌ saꞌ le̱ ma̱c. 18Cui ta joꞌcan, eb li queꞌxpa̱b li Cristo li queꞌcam sachenakeb raj ajcuiꞌ xban lix ma̱queb. 19Cui ta caꞌaj cuiꞌ re li kayuꞌam arin saꞌ ruchichꞌochꞌ nak xkapa̱b li Cristo, xkabalakꞌi raj kib ut kꞌaxal tokꞌoba̱l raj ku tocana̱k chiruheb chixjunileb li kas ki̱tzꞌin. 20Abanan relic chi ya̱l nak li Cristo quicuaclesi̱c cuiꞌchic chi yoꞌyo saꞌ xya̱nkeb li camenak. Aꞌan li xbe̱n li quicuacli chi yoꞌyo chiruheb chixjunileb li teꞌcuaclesi̱k cuiꞌchic chi yoꞌyo. 21Xban nak quima̱cob laj Adán, joꞌcan nak chikajunilo nococam. Abanan xban nak quicuacli cuiꞌchic chi yoꞌyo li Jesucristo, cuan ajcuiꞌ xcuaclijiqueb li camenak chi yoꞌyo. 22Joꞌcan nak saꞌ xcꞌabaꞌ laj Adán li kaxeꞌto̱nil yucuaꞌ nak chikajunilo nococam. Ut saꞌ xcꞌabaꞌ li Jesucristo, chixjunileb li nequeꞌpa̱ban re teꞌcuacli̱k cuiꞌchic chi yoꞌyo ut teꞌqꞌuehekꞌ xyuꞌam chi junelic. 23Ut nak teꞌcuacli̱k cuiꞌchic chi yoꞌyo eb li camenak, moco jun cuaclijiqueb ta nak teꞌcuacli̱k chak. Li xbe̱n li quicuacli chak chi yoꞌyo, aꞌan li Jesucristo. Ut mokon nak tol-e̱lk cuiꞌchic li Jesucristo, teꞌcuacli̱k chak eb li queꞌpa̱ban re. 24Ut chirix chic aꞌan acaꞌ chic li rosoꞌjic li ruchichꞌochꞌ ut li Cristo tixsacheb xcuanquil chixjunileb li nequeꞌtaklan saꞌ ruchichꞌochꞌ ut tixsach ajcuiꞌ xcuanquileb li musikꞌej. Ut chirix aꞌan li Cristo tixkꞌaxtesi lix cuanquil saꞌ rukꞌ li Dios Acuabej. 25Li Cristo cua̱nk xcuanquil chi takla̱nc toj retal tixqꞌueheb rubel rok chixjunileb li xicꞌ nequeꞌiloc re. 26Ut li ta̱sachekꞌ xcuanquil toj saꞌ rosoꞌjic, aꞌan li ca̱mc. 27Tzꞌi̱banbil retalil saꞌ li Santil Hu nak li Acuabej Dios quixqꞌue chixjunil li cꞌaꞌak re ru rubel xcuanquil li Cristo. Abanan li Cristo incꞌaꞌ nataklan saꞌ xbe̱n li Acuabej Dios xban nak li Dios, aꞌan li quiqꞌuehoc re lix cuanquilal. 28Ut nak acak xcanaba̱c xban li Dios chixjunil li cꞌaꞌak re ru rubel xcuanquil li Cristo li Alalbej, tojoꞌnak li Cristo tixkꞌaxtesi ajcuiꞌ rib rubel xcuanquil li Acuabej Dios, li quiqꞌuehoc xcuanquil li Cristo saꞌ xbe̱n chixjunil, ut li Dios aꞌanak chic yal re saꞌ xbe̱n chixjunil. 29Cuan caꞌchꞌin chic tinye chirix lix cuaclijiqueb chi yoꞌyo li camenak. Cuanqueb saꞌ e̱ya̱nk li nequeꞌcubsi̱c xhaꞌeb chokꞌ ru̱chil xcubi haꞌ li camenak. Cui incꞌaꞌ nequeꞌxpa̱b nak teꞌcuacli̱k li camenak, ¿cꞌaꞌut nak nequeꞌxba̱nu chi joꞌcan? 30Ut cui incꞌaꞌ teꞌcuacli̱k chi yoꞌyo li camenak, ¿cꞌaꞌut nak la̱o aj yehol resil li colba-ib nakaqꞌue kib chi rahobtesi̱c cui ma̱cꞌaꞌ xya̱lal li yo̱co chixba̱nunquil? 31Ex inherma̱n, relic chi ya̱l ninye e̱re nak rajlal cutan cuan li nequeꞌraj incamsinquil xban nak ninye resil li colba-ib. Abanan nasahoꞌ saꞌ inchꞌo̱l xban nak xepa̱b li Cristo. 32Ut cui incꞌaꞌ teꞌcuacli̱k chi yoꞌyo li camenak, ¿cꞌaꞌ raj ru tinra nak tincꞌul li raylal arin Éfeso? Chanchan nak yo̱quin chi pletic riqꞌuineb li joskꞌ aj xul nak cuanquin arin saꞌ xya̱nkeb li tenamit. Ma̱cꞌaꞌ raj rajbal aꞌan cui incꞌaꞌ takacꞌul kakꞌajca̱munquil chirix li kacamic. Kꞌaxal us raj cui takaba̱nu joꞌ li incꞌaꞌ nequeꞌxpa̱b nak teꞌcuacli̱k chi yoꞌyo li camenak li nequeꞌxye cuaꞌako, ucꞌako xban nak cuulaj caꞌbej nococam. 33Me̱qꞌue e̱rib chi balakꞌi̱c xbaneb li nequeꞌa̱tinac chi joꞌcan. Me̱junaji e̱rib riqꞌuineb li incꞌaꞌ useb xnaꞌleb xban nak li incꞌaꞌ useb xnaꞌleb nequeꞌxpoꞌ xchꞌo̱leb li cha̱bileb xnaꞌleb. 34Checꞌoxla chi us li yo̱quex chixba̱nunquil ut mexma̱cob chic. Cuanqueb saꞌ e̱ya̱nk li toj ma̱jiꞌ nequeꞌxpa̱b li Dios. Re xcꞌutbal e̱xuta̱n nak ninye e̱re chi joꞌcaꞌin. 35Ma̱re cuan li nequeꞌyehoc, ¿chanru nak teꞌcuacli̱k cuiꞌchic chi yoꞌyo li camenak? ¿Chanru teꞌcꞌutu̱nk nak teꞌcuacli̱k? ¿Ma teꞌcuacli̱k cuiꞌchic chi tzꞌakal re ruheb? chanqueb. 36Ma̱cꞌaꞌ e̱naꞌleb. Cꞌoxlankex caꞌchꞌinak chirix li a̱uc. Li iyaj na-auman incꞌaꞌ namok cui incꞌaꞌ nakꞌa li rix xbe̱n cua. 37Ma̱cuaꞌ li ratzꞌum li acui̱mk na-auman. Aꞌ li riyajil ban na-auman usta trigo malaj cꞌaꞌ chic ru chi iyajil. 38Ut li Dios naxqꞌue li ratzꞌum chi chꞌinaꞌus joꞌ naraj aꞌan. Aꞌ yal cꞌaꞌru li iyaj ta̱rau junak, aꞌan ajcuiꞌ li ratzꞌum tixqꞌue. 39Nabal pa̱y ru li iyaj ut nabal pa̱y ajcuiꞌ ru li ratzꞌum na-el. Ut joꞌcan ajcuiꞌ nabal pa̱y ru li tibelej. Jalan xtibel li cristian chiru xtibel li xul. Ut jalan xtibel li car chiru xtibel li xul li nequeꞌrupupic. 40Ut jalaneb ajcuiꞌ li ángel saꞌ choxa chiku la̱o ut jalaneb lix lokꞌal chiru li kalokꞌal la̱o arin saꞌ ruchichꞌochꞌ. 41Jalan cuiꞌ xlokꞌal li sakꞌe ut jalan cuiꞌ xlokꞌal li po ut jalan ajcuiꞌ xlokꞌal li chahim ut jalan jala̱nk lix lokꞌal li junju̱nk chi chahim. 42Joꞌcan ajcuiꞌ la̱o. Jalan chic li kalokꞌal nak tocuacli̱k cuiꞌchic chi yoꞌyo chirix li kacamic. Nak nococam, nocomukeꞌ ut nakꞌa li katibel, abanan nak tocuacli̱k cuiꞌchic chi yoꞌyo jalanako chic ut incꞌaꞌ chic toca̱mk. 43Nak namukeꞌ junak camenak ma̱cꞌaꞌ xcacuilal chi moco xlokꞌal. Abanan nak ta̱cuacli̱k cuiꞌchic chi yoꞌyo, kꞌaxal nimak xlokꞌal ut cua̱nk chic xcuanquil. 44Nak nococam namukeꞌ li katibel xban nak yal chꞌochꞌ oquenak. Abanan nak tocuacli̱k cuiꞌchic chi yoꞌyo, musikꞌejo chic. Nak cuanco saꞌ ruchichꞌochꞌ cuan li katibel nakꞌa na-osoꞌ. Abanan saꞌ choxa jalanako chic ut ta̱cua̱nk li kayuꞌam chi junelic. 45Tzꞌi̱banbil saꞌ li Santil Hu chi joꞌcaꞌin:

Laj Adán li xbe̱n cui̱nk quiqꞌueheꞌ xmusikꞌ nak quiyoꞌobtesi̱c xban li Dios. (Gén. 2:7)

Abanan li xcab Adán, aꞌ li Ka̱cuaꞌ Jesucristo, aꞌan musikꞌej ut aꞌan li naqꞌuehoc kayuꞌam chi junelic.

46Joꞌcan nak li katibel arin saꞌ ruchichꞌochꞌ, aꞌan na-osoꞌ. Abanan li kamusikꞌ li naxqꞌue ke li Dios, aꞌan incꞌaꞌ na-osoꞌ. Cuan ban chi junelic. 47Nak quiyoꞌobtesi̱c laj Adán xban li Dios, chꞌochꞌ qui-oc. Abanan li Jesucristo moco yoꞌobtesinbil ta. Aꞌan musikꞌej ut saꞌ choxa quichal chak. 48Joꞌcan nak chikajunilo arin saꞌ ruchichꞌochꞌ yal tibelo joꞌ laj Adán. Ut nak tocuacli̱k cuiꞌchic chi yoꞌyo, la̱ako chic musikꞌej joꞌ li Cristo li quichal chak saꞌ choxa. 49Anakcuan cuan katibel joꞌ li re laj Adán. Li tibelej aꞌan chꞌochꞌ oquenak. Abanan saꞌ jun cutan la̱ako chic joꞌ li Cristo li quichal chak saꞌ choxa. 50Ex inherma̱n, li nacuaj xyebal e̱re, aꞌan aꞌin: li katibel ut li kaquiqꞌuel incꞌaꞌ ta̱oc saꞌ lix nimajcual cuanquilal li Dios xban nak aꞌan nakꞌa. Li bar cuan nakꞌa incꞌaꞌ naru ta̱re̱chani lix nimajcual cuanquilal li Dios xban nak aꞌan incꞌaꞌ nakꞌa. 51Nacuaj ajcuiꞌ nak te̱nau lix ya̱lal li mukmu nak quicuan chak junxil. Aꞌan aꞌin: moco chikajunilo ta la̱o aj pa̱banel toca̱mk, abanan chikajunilo tojalanokꞌ. 52Saꞌ rosoꞌjic li cutan nak ta̱ecꞌa̱nk chak li trompeta, tojalanokꞌ saꞌ junpa̱t saꞌ jun mutzꞌil u. Nak ta̱ecꞌa̱nk chak li trompeta eb laj pa̱banel li ac camenakeb teꞌcuacli̱k cuiꞌchic chi yoꞌyo ut incꞌaꞌ chic teꞌca̱mk. Ut eb laj pa̱banel li toj yoꞌyo̱queb teꞌjalanokꞌ. 53Li katibel arin saꞌ ruchichꞌochꞌ nakꞌa. Tento nak ta̱jala̱k re nak incꞌaꞌ chic ta̱kꞌa̱k. Ut li kayuꞌam li na-osoꞌ saꞌ ruchichꞌochꞌ ta̱jala̱k riqꞌuin jun acꞌ yuꞌam incꞌaꞌ chic ta̱osokꞌ. 54Nak acak xjalanoꞌ li katibel li nakꞌa, ut nak acak xjalanoꞌ li kayuꞌam li na-osoꞌ, aran ta̱tzꞌaklok ru li quitzꞌi̱ba̱c chak najter xbaneb li profeta nak queꞌxye chak chi joꞌcaꞌin:

Sachbil xcuanquil li ca̱mc chi junaj cua xban nak xnumta xcuanquil li Cristo saꞌ xbe̱n. (Isa. 25:8)

55Li ca̱mc ma̱cꞌaꞌak chic xcuanquil saꞌ kabe̱n. Ma̱cꞌaꞌ chic li raylal takacꞌul xban li ca̱mc. (Ose. 13:14)

56Xban nak cuan li ma̱c, joꞌcan nak cuan li ca̱mc. Nak ma̱cꞌaꞌak chic li ma̱c, ma̱cꞌaꞌak chic li ca̱mc. Ut li chakꞌrab ma̱cꞌaꞌak chic xcuanquil saꞌ kabe̱n. 57Joꞌcan ut chikabantioxi re li Dios nak ma̱cꞌaꞌ chic xcuanquil li ca̱mc saꞌ kabe̱n saꞌ xcꞌabaꞌ li Ka̱cuaꞌ Jesucristo. 58Joꞌcan ut ex inherma̱n, raro̱quex inban, cauhak taxak e̱chꞌo̱l saꞌ le̱ pa̱ba̱l. Michꞌinan le̱ chꞌo̱l. Cheqꞌuehak ban e̱chꞌo̱l chi cꞌanjelac chiru li Ka̱cuaꞌ. Ut chenauhak nak li joꞌ qꞌuial te̱ba̱nu saꞌ xcꞌabaꞌ li Ka̱cuaꞌ cuan rajbal.

Currently Selected:

1 Corintios 15: kek

Highlight

Copy

Compare