Luka 1
1
1Kuli mukwetu Teofilo.
Vanu vavangi vanasoneka vukaleo vwa vyuma vije vyalingiwile akati ketu. 2Vasonekele vije vatulekele vaje vamwene vyuma evi, tunde akushangumuka, vaje vambulwile lijwi. 3Ngecivene, nange njinayongola ngwange njinapande kukusonekelavyo yove shukulu Teofilo, muvyalikavasanena, omwo njinavihwisisa vyoshe tunde avyashangumukilile. 4Njilinakulinga evi ngeci uzivuke vushunga vwakushula vwa vyuma vije vivakulongesele.
Vambulula kusemuka kwa Yowano Muka-kumbwitika
5 #
1 Miz 24:10
A matangwa a Helonde, mwene wa Yundeya,#1:5 YUNDEYA: Lizina eli lilumbununa mutambela woshe wa Palesitina. kwakele muka-kukombelela lizina lyendi Zakaliya, wa ku cikota ca Aviya. Lizina lya munakazi wendi lyapwile Elizaveta, nendi lalo wapwile wa ku naanga ya vaka-kukombelela. 6Voshe vapwile vaka-vushunga ku mesho a Njambi, vendele mwamuvwa nakwononoka mashiko oshe a Shukulu Kalunga. 7Oloni vakevo kuvakele na mwana omwo Elizaveta wapwile mumba, co voshe vavali vapwile tukulukazi.
8A litangwa limo Zakaliya wakele nakupanga vipangi vyendi vyakukombelela mu Njuvo ya Shukulu Kalunga, a simbu yendi ya vipangi vyakukombelela. 9Ngwe ku cilika civakavele vaka-kukombelela, vamwangwile akuta n̄ela mukwenyeka insense a mutula. Ngecivene, wakovelele mu Njuvo ya Shukulu Kalunga, 10omo mbunga ya vanu vakele anja nakulombela a simbu ije wakele nakwenyeka insense.
11Kwamusholokelele kangelo ka Shukulu Kalunga, wemanene ku cilyo ku mutula wakwenyekela insense. 12Omo Zakaliya wamumwene walijujukilile, co wazivile lyova. 13Oloni kangelo wendekele kuli ikeye ngwendi, “Kesi uzive lyova Zakaliya! Njambi nazivi lilombelo lyove, munakazi wove Elizaveta akakita mwana wa munalume, co ukamuluka lizina lyendi Yowano. 14Ukavwaelela nakujolela, co vavangi vakalisamba akusemuka kwendi! 15Akapwa wakama ku mesho a Shukulu Kalunga. Kakanu vinyu nameme vyuma vyakulula vije vipendesa. Tunde akusemuka kwendi akashula na Munzinzime Wakujela, 16co akelwisila vanu vavangi va Isalele kuli Shukulu Kalunga Njambi yavo. 17#Mal 4:5-6 Akaya kulutwe lwa Mwene, na nzili na vukama ngwe Elinja muka-kwimanena. Akelwisila vaishavo na vana amolika, akatengulula vaka-kujeneka kwononoka nakuvelwisila lalo ku ngila yakuyongola ngwe vaka-vushunga, akavwaesela cimweja vanu va Mwene ngeci vamukengelele.”
18Co Zakaliya wendekele kuli kangelo ngwendi, “Njikazivuka vatijo nga cuma eci mucikafwa? Omwo yange njinakulu laja, co lalo munakazi wange nakuluvala.”
19 #
Ndan 8:16; 9:21 Co kangelo wamukumbulwile ngwendi, “Yange Ngambiliyele muka-kupangela Njambi uje nanjitumu kwendeka nove nakukunenela muzimbu ou wauvwa. 20Oloni yove kuwakulaelele majwi ange, aje akapwa a vushunga omwo simbu yawo iketa. Omwo kuwakulaelele, ukapwa u kaveveve, ukoloka kuluu noo litangwa lije cikulaeso cange kuli yove cikapwa ca vushunga.”
21A simbu ije vene vanu vakele nakuvandamena Zakaliya, vakele nakulikomokela omwo weshwalele manene mu Njuvo ya Shukulu Kalunga. 22Omo Zakaliya watuukilemo, kasele kwendeka kuli vakevo, co vazivukile ngwavo namono cimona mu Njuvo ya Shukulu Kalunga. Akwonwa kwendeka lijwi limo, walingile vimweso kuli vakevo na mavoko endi.
23Omo wamanesele vipangi vyendi mu Njuvo ya Shukulu Kalunga, co Zakaliya welukile ku njuvo yendi. 24Munima ya vyuma evi munakazi wendi Elizaveta wakele na kafumba, wakele mu njuvo vingonde vitanu. 25Co wendekele ngwendi, “Akukotoka Shukulu Kalunga nanjikwasa, nanjitundisa shwamwa ku mesho a vanu.”
Vambulula kusemuwa kwa Yesu
26Omo Elizaveta wakele na vingonde vitanu na imo, Njambi watumine kangelo Ngambiliyele aye ku Ngalileya ku nganda ije vatumbwile Nazaleta. 27#Mat 1:18 Kangelo wakele na lijwi kuli mumbanda umo kanda alimone na munalume wakuulila kuli munalume lizina lyendi Yosefa, wa ku naanga ya Mwene Ndaviti. Lizina lya uje mumbanda lyapwile Maliya. 28Co kangelo wezile kuli Maliya wendekele ngwendi, “Kwoloka kukale nove! Mwene ali amo nove, co nakuvezikisa manene!”
29Maliya wakele na citanga a lijwi lije lyendekele kangelo, wayongwele mu mbunge yendi ngwendi, “Majwi awa analumbunuka vika?” 30Co kangelo wendekele kuli ikeye ngwendi, “Kesi uzive lyova Maliya, omwo unawana kutetela kuli Njambi. 31#Mat 1:21 Kenga, ukakala na kafumba, co ukakita mwana wa munalume, ukamuluka lizina lyendi Yesu. 32#2 Sam 7:12,13,16; Isa 9:7 Ikeye akapwa wakama, co vakamutumbula Muna Njambi wa Akamwa ya Vyoshe. Co Shukulu Kalunga Njambi akamupwisa mwene, ngwe mwapwile kukulwila yendi Ndaviti, 33co akashwana vatekulwila va Yakomba ku myaka yoshe, na vumwene vwendi kuvukahu!”
34Co Maliya wendekele kuli kangelo ngwendi, “ Yange nji mumbanda uje kanda alimone na munalume. Eci cikapwa vati?”
35Co kangelo wamukumbulwile ngwendi, “Munzinzime Wakujela akaija ali yove, na nzili ya Njambi ikakufwika. Ngecivene, uje wakujela iwukakita vakamutumbula Muna Njambi. 36Anuka mushoni yove Elizaveta. Vamutumbwile ngwavo mumba, oloni nakulisa mwana wa munalume mu vukulukazi vwendi, co ino inapu ngonde yamucitanu na imo. 37#Kus 18:14 Omwo cuma nacimo cai cahonwa Njambi kulinga.”
38Co Maliya wakumbulwile kangelo ngwendi, “Yange njinapu nji ngamba ya Shukulu Kalunga, cilingiwe kuli yange ngwe muunendeka.” Co kangelo wamusezele.
Maliya aya nakwindwisa Elizaveta
39A matangwa aje Maliya waile vwasi-vwasi ku lifuti lya minkinda lya mu Yundeya. 40Wakovelele mu njuvo ya Zakaliya, co wendwisile Elizaveta. 41Omo Elizaveta wazivile kwindwisa kwa Maliya, co mbututu wanyangumukile mwimo lyendi. Co Elizaveta washulile na Munzinzime Wakujela, 42co wendekele na lijwi lyakama ngwendi, “Yove umuka-kuvezika akati ka vanakazi voshe, navezika mwana uje iwukakita! 43Omwo vikajo cuma cakama eci cilingiwa kuli yange, ngeci vaina ya Mwene yange vaije kuli yange? 44Omo vwasi-vwasi njazivile lijwi lyakwindwisa kwove, vwasi-vwasi mbututu mwimo lyange wanyangumukile nakujolela. 45Yove unavezika akukulaela ngeci lijwi lya Shukulu Kalunga kuli yove likapwa lya vushunga!”
Mwaso wa Maliya wakushangazala
46 #
1 Sam 2:1-10
Maliya wendekele ngwendi,
“Mbunge yange ishangazala Shukulu Kalunga,
47mwonyo wange uvwaelela omwo Njambi
Muyoyesi wange,
48 #
1 Sam 1:11
omwo nanuka yange ngamba yendi wamundondo!
Kutunda ololo nakuya kulutwe,
vanu voshe vakanjitumbula ngwavo njimuka-kuvezika,
49omwo Njambi Muka-nzili yoshe nanjilingila vyuma vyakama.
Lizina lyendi lyakujela,
50ikeye akamwesa mema ku mbunge kuli voshe vamusingimika,
kutunda ku cisemwa cimo kutwala ku cisemwa cikwavo.
51Ikeye nolola livoko lyendi lya nzili,
nashandola vaka-kulyalesa na matumbe avo oshe.
52 #
Yom 5:11; 12:19 Natundisa vimyene vakama a matanda avo,
co naaka vaje vavandondo ku vukama.
53Nakutisa vaje vali na njala na vyuma vyavivwa,
co vaka-kufuka navasheke mavoko-voko.
54Ikeye nanyungu cikulaeso cije calingile kuli
vakukulwila vetu,
co naija nakukwasa ngamba yendi Isalele.
55 #
Kus 17:7
Nanuka kumwesa mema ku mbunge kuli Avilahama
na kuli vatekulwila vendi voshe ku myaka yoshe!”
56Co Maliya wasikamene na Elizaveta vingonde vitatu,
co welukile kwimbo lyavo.
Kusemuka kwa Yowano Muka-kumbwitika
57Simbu ya Elizaveta yakukita mwana yetele, co wakitile mwana wa munalume. 58Vandambo na vavushoko vwendi vazivile vyuma vije vyamulingililile Shukulu Kalunga, co voshe vavwaelelele amo nendi.
59 #
VaLe 12:3
Co a litangwa lyamucitanu na atatu, vezile nakutuula mwana, vashakele kumwindula lizina lya ishe Zakaliya. 60Oloni vaina vendekele ngwavo, “Embwe! Mulukeni Yowano.”
61Vamukumbulwile ngwavo, “Kukwesi kavushoko kove ivaluka lizina eli!” 62Co vanyateyeye ishe nakulinga vimweso na mavoko avo kumwihula lizina lika ashaka kuluka mwana.
63Co Zakaliya walombele citale asonekeo, wasonekeleo ngwendi, “Lizina lyendi Yowano.” Co voshe vakasamene manene! 64A simbu ije vene Zakaliya wasele kwendeka lalo, co washangumukile kushangazala Njambi. 65Vandambo voshe vakele na lyova, co muzimbu wa vyuma evi washandokelele mu lifuti lyoshe lya minkinda mu Yundeya. 66Voshe vaje vavizile muzimbu ou vayongweleo, co valihozwele ngwavo, “Ou mwanike akafwa vati?” Omwo casholokele mwamuvwa ngeci nzili ya Shukulu Kalunga yakele ali ikeye.
Vuka-kwimanena vwa Zakaliya
67Ishe ya Yowano, Zakaliya, washulile na Munzinzime Wakujela, co wendekele vin̄anda vya Njambi ngwendi,
68“Tushangazaleni Shukulu Kalunga Njambi ya Isalele!
Naija nakukwasa vanu vendi nakuvapatula.
69Natwana Muyoyesi wa nzili,
mutekulwila wa ngamba yendi Ndaviti.
70Wakulaesele laja
muli vaka-kwimanena vendi vakujela
71ngeci akatwamena ku vitozi vetu,
na ku nzili ya voshe vaje vaka-kutuzinda.
72Wendekele ngwendi akamwesa mema ku mbunge
kuli vakukulwila vetu
nakwanuka cikumiiyo cendi cakujela.
73Walikumiiye cikumiiyo cije calisingile
na kukulwila yetu Avilahama.
74Wakulaesele kutupatula ku mavoko a vitozi vetu,
ngeci tumupangele kujeneka lyova,
75ngeci tupwe vakujela na vaka-vushunga ku mesho endi,
matangwa oshe akuyoya kwetu.
76 #
Mal 3:1
“Co yove munange,
vakakutumbula muka-kwimanena
wa Njambi wa Akamwa ya Vyoshe.
Co ukatwama kulutwe lwa Mwene
mukuvwaesa ngila yendi,
77nakuleka vanu vendi ngeci vakavovola,
akuvasambesa ku vuvi vwavo.
78Njambi yetu wakala na mema ku mbunge.
Akatuwisa ceke cakutwamena a mungulungengu ngeci citwe ali yetu,
79 #
Isa 9:2
ceke ca mwilu kutwila voshe vaje vanatumbama
mu munzinze wa lisusulungu lya kutsa,
nakutwamenena mendi etu mu ngila ya kwoloka.”
80Mwana wakolele mu muvila na mu munzinzime. Wakele mu mambo noo litangwa lyendi lyetele lyakulisholola ku vanu va Isalele.
Currently Selected:
Luka 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006