Yoshwa 1
1
Njambi ashika Yoshwa kufungulula Kanana
1Omo Mosesa ngamba ya Shukulu Kalunga natsi laja, Shukulu Kalunga wendekele kuli Yoshwa muna Nune mukwasi wa Mosesa ngwendi, 2“Ngamba yange Mosesa natsi, ngecivene, ololo livwaese, katuka yove na vanu va Isalele voshe, ngeci mujavuke Ndonga ya Yondau muye mu lifuti lije linjikavana. 3#Kwi 11:24-25 Mutambela woshe umukalyata myanja yeni njinamyanawo ngwe munjalekele Mosesa. 4Vinginga vyeni vikatunda mu mambo ku mbwela nakweta ku Minkinda ya Lembanone ku kunto, nakutunda ku Ndonga ya Yufuleti mu ngangela kutuvakana lifuti lya vaHiti, nakweta ku Lishali lya Menditelenyani mu kangombe ka yambi. 5#Kwi 31:6,8; VaHe 13:5 Naumo wai akakufungulula matangwa oshe akuyoya kwove. Simbu yoshe njikakala amo nove ngwe munjakele na Mosesa, kunjikakuseze ngoco, nambe kukukengesa nima embwe. 6#Kwi 31:6,7,23 Kolesa nakusimpa omwo yove ukapwa ntwama ya vanu ava, ngeci vakashwane lifuti lije njalisingile na vakukulwila vavo kuvanalyo. 7Oloni kolesa lika nakusimpa manene, unyunge mashiko oshe aje akushikile ngamba yange Mosesa. Kesi ukalimbulule nambe litambelo limo, ngeci ukavezike mwamuvwa kwoshe kuje kuukaya. 8Livulu eli lya Mashiko lilave kutambekela simbu yoshe omo mukunguluka. Co lilongeselyo mutanya na vutsiki, ngeci wononoke vyuma vyoshe vije vivasonekamo. Co ukavezika nakukala mwamuvwa mukuyoya kwove. 9Anuka vinjinakushiki ngeci ukolese nakusimpa! Kesi uzive lyova nambe kujujuka, omwo yange Kalunga Njambi yove, njili amo nove kwoshe kuukaya.”
Yoshwa ashika vanu va Isalele
10Asinoni Yoshwa washikile vantwama 11kwita mu cilombo nakwendeka kuli vanu va Isalele ngwavo, “Vwaeseni vyakulya, indele mukajavuka Ndonga ya Yondau nakukovela mu lifuti lije lyakamyana Shukulu Kalunga Njambi yeni ngeci mulishwane.” 12Oloni Yoshwa wendekele ku miyati ya Luvena, na Ngande, na ku litambelo lya muyati wa Manase ngwendi, 13“Anukeni lijwi lije lyamishikile Mosesa ngamba ya Shukulu Kalunga ngwendi, ‘Shukulu Kalunga Njambi yeni akamyana lifuti eli lili ku mutambela wa mu ngangela ya Yondau kupwa lifuti lyeni.’ 14Vanakazi veni, na vana veni, na vimuna veni vakasala muno mu lifuti lije lyamyanene Mosesa, musambwa lino mu ngangela ya Yondau. Oloni mashwalale veni vakajavuka musambwa kulutwe lwa vavushoko vweni vaIsalele ngeci mukavakwase 15#Kul 32:28-32; Kwi 3:18-20; Yos 22:1-6 kuvanga noo vanatambula lifuti lije lili mu kangombe ka yambi ya Yondau lije lyanavana Shukulu Kalunga Njambi yeni. Omo vanashwana laja lifuti lije lyanavana Shukulu Kalunga Njambi yeni, asinoni mukeluka nakutunga muno mu lifuti lyeni mu ngangela ya Yondau, eli lyamyanene Mosesa ngamba ya Shukulu Kalunga.”
16Asinoni vakumbulwile Yoshwa ngwavo, “Tukalinga vyuma vyoshe vije viwunatuleka, co tukaya kwoshe-ikwoshe kuje kuukatutuma. 17Muje mutwononokele kuli Mosesa mu vyuma vyoshe, mukemwo vene mutukononoka kuli yove. Oloni cuma lika cimo, Shukulu Kalunga Njambi yove akale amo nove ngwe mwakele amo na Mosesa! 18Munu woshe uje akavyana kushika kwove nambe kujeneka kwononoka mashiko ove vakamutsiye. Kolesa lika nakusimpa!”
Currently Selected:
Yoshwa 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006