Njelemiya 1
1
Njelemiya
1 #
2 Vim 22:3—23:27; 2 Miz 34:8—35:19 Livulu eli lyapwa lya vin̄anda vije vyendekele Njelemiya, umo wa vaka-kukombelela va mu nganda ya Anatote mu lifuti lya Mbenjemani. Njelemiya wapwile muna Hilikiya. 2Shukulu Kalunga wendekele kuli Njelemiya mu mwaka wamulikumi na itatu omo Yosiya#1:2 YOSIYA: Washwanene mu myaka 640-609 BC. muna Amoni wapwile mwene wa mu Yunda. 3#2 Vim 23:36—24:7,18; 25:21; 2 Miz 36:5-8; 11:21 Shukulu Kalunga wendekele lalo kuli Njelemiya omo Yehoyakime#1:3 YEHOYAKIME: Washwanene mu myaka 609-598 BC. muna Yosiya wapwile mwene. Munima yevi, Shukulu Kalunga wendekele kuli Njelemiya visimbu vyavingi, noo mu mwaka wamulikumi na umo mu ngonde yamucitanu omo Zendekiya#1:3 ZENDEKIYA: Washwanene mu myaka 598-586 BC. muna Yosiya wapwile mwene. Ije ikeyo simbu omo vanu va mu Yelusalema vavatwalele mu vunzinda.
Njelemiya vamusana
4Shukulu Kalunga wendekele kuli yange ngwendi, 5“Njakuzivukile simbu kanda uwile mwimo lya vanyoko, njakwangwile simbu kanda usemuke ngeci upwe muka-kwimanena wange ku miyati ya vanu.”
6Co njakumbulwile ngwange, “Shukulu Kalunga wa Akamwa ya Vyoshe, kunjizivukamo kwendeka, nji mwanike wamundondo.”
7Oloni Shukulu Kalunga wendekele kuli yange ngwendi, “Kesi wendeke ngwove u mwanike wamundondo embwe, oloni unapande kuya ku vanu kuje kunjikutuma, nakuvaleka vyuma vyoshe vije vinjikushika. 8Kesi uvazivile lyova embwe, omwo yange njikakala nove nakukunyunga. Yange Kalunga, njinendekamo!”
9Asinoni Shukulu Kalunga wolwele livoko lyendi, co wakwatele a kanwa kange, wendekele kuli yange ngwendi, “Njilinakukwana majwi aje aunapande kwendeka. 10Ku litangwa lya lelo njilinakukutuma na nzili kukendeka ku mafuti oshe na ku vumwene vwoshe kutukula nakusiwula, kunyongesa nakuwisa, kutunga nakukuna.”
Vimona vivali
11Shukulu Kalunga wanjihwile ngwendi, “Njelemiya, vikajo unamono?” Co njakumbulwile ngwange, “Njinamono munango wa muti wa alumonde.”
12Shukulu Kalunga wendekele ngwendi, “Watombola. Yange njikengelela#1:12 YANGE NJIKENGELELA: Lijwi eli mu ciHevelu linalifu na lijwi ngwavo, simbu yoshe kwinduka mutondo. njimone ngeci majwi ange alingiwa.”
13Asinoni Shukulu Kalunga wanjihwile lalo ngwendi, “Vikajo vyeka lalo viwunamono?”
Co njakumbulwile ngwange, “Njinamono ndeo ilinakutupuka ku kunto, co ishaka kwitikila ku mutambela unotuli.”
14Co wendekele kuli yange ngwendi, “Tuyando tukatundilila ku kunto tukaija ali vanu voshe vaje vakala mu lifuti eli, 15omwo njilinakusana miyati yoshe ya vanu vali ku kunto vaije. Vimyene vavo vakatumbika nakuzengeleka matanda avo ku vikolo vya Yelusalema na ku vivumbe vyayo, co lalo vakazengeleka vinganda vikwavo vya mu Yunda. 16Co njikahisa vanu vange omwo vanalingi vuvi akunjiseza, vanakombelela vin̄ombelo ku vinjambi veka, co vanashongo tumponya nakutulemesa. 17Ngecivene, Njelemiya, katuka uye, ya ukavaleke vyuma vyoshe vije vinjikushika. Kesi uvazivile lyova embwe, nga uziva lyova ni, co njikakuzivisa manene lyova ku mesho avo. 18Co yange njikakupwisa nganda yakukola manene, nambe ngwe manda ya vutale, nambe civumbe ca vunengu, mukulwisa lifuti lyoshe, vimyene voshe va mu Yunda, na vamyata vamwo, na vaka-kukombelela vamwo, na vanu voshe va mu lifuti. 19Vakevo vakakulwisa, oloni kuvakakufungulula, omwo yange njikakala nove nakukunyunga. Yange Kalunga, njinendekamo.”
Currently Selected:
Njelemiya 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006