Njelemiya 2
2
Njambi anyunga Isalele
1Lijwi lya Shukulu Kalunga lyezile kuli yange ngwalyo,
2“Ya ku Yelusalema ukambulwile vanu voshe,
ngwove Shukulu Kalunga nendeka ngwendi,
‘Njanuka kulongwa kwove omo wapwile u mwanike,
na cizemo cove omo njakwambatele,
na muje wanjikavele mu mambo,
mukati ka lifuti lije kuvalimine.
3Isalele, yove wapwile u wange,
wapwile vufuko vwange vwakujela.
Njatumine tuyando na n̄avava ali munu
woshe uje wakuyandesele.
Yange Kalunga, njinendekamo.’ ”
Vuvi vwa vakukulwila va Isalele
4Tolilileni ku lijwi lya Shukulu Kalunga,
yeni vatekulwila va Yakomba,
yeni miyati ya Isalele.
5Shukulu Kalunga alinakwendeka ngwendi,
“Mulonga ukajo uvanjiwanene nawo
vakukulwila veni ngeci vatunde kuli yange?
Valemesele tumponya twakujeneka seo,
co na vakevo lalo vapwile vanu vangoco.
6Vakukulwila veni kuvanjumbile mbunge,
nameme njavamenene kuvatundisa mu Ingito
nakuvatwamenena mu mambo,
mu lifuti lyakuma na lishen̄avu,
lifuti lyakuma lya vushonde
muje naumo wai wakelemo, nambe kwendamo.
7Njaminenele mu lifuti lya vwilo,
mukulya vushuka vwamwo
na vyuma vyoshe vije vyavivwa.
Oloni mwaviisile lifuti lyange
nakujwalesa vushwana vuje vunjamyanene.
8Vaka-kukombelela kuvehwile ngwavo,
‘Shukulu Kalunga ali kulijo?’
Vaka-kukombelela vange kuvanjizivukile.
Vaka-kushwana vanjitengulukilile nakunjilwisa,
vaka-kwimanena vendekele vya vuka-kwimanena
mu lizina lya Mbale,
co valemesele tumponya twakujeneka seo.
Kusompa kwa Shukulu Kalunga a vanu vendi
9“Ngecivene, yange Kalunga,
njikanena n̄anda yange mukusompa
yeni vanu vange.
Njikasompesa lalo vatekulwila veni.
10Yeni mu kangombe ka yambi
ku lin̄anda lya Sipulase,
co tumeni munu umo mu ngangela
ku lifuti lya Kendale,
mukamone ngeci nacimo cai
cakulifwa neci calingiwile ku san̄ulu.
11Kukwesi muyati watengulukilile vinjambi vavo
nameme vapwile vinjambi va makuli.
Oloni yeni munakengesa nima yange Njambi yeni
uje naminenela kasingimiko,
co munakava vinjambi vaje kuvasa
kumilingila cuma cimo.
12Ngecivene, njishika lilu lijaje na lyova,
valikomokele nakukasama,
13omwo vanu vange vanalingi vuvi vuvali,
vanatundu kuli yange,
lisima lya kavwelu-vwelu lya mema akutonola,
vanalicokwela masima a myanzi
muje kumwasa kukendama mema.
Fweto a Isalele yakujeneka kulongwa
14“Isalele kapwile ndungo,
kuvamukitilile mu vundungo.
Cooni omwo vikajo vitozi vendi valinakumuyomba?
15Valinakumwanena ngwe vindumba,
lifuti lyendi vanalipwisa mambo,
co vinganda vyendi vinapu vyamupulungwa,
naumo wai wakalamo.
16Eyo, vanu va mu Mefise na Tahapanehese
vanatavozola cikola cendi.
17Isalele, yove vavenya walikokela vuvi!
Wasezele yange Kalunga Njambi yove,
omo njakutwamenenene mu ngila.
18Vikajo ukawanao akuya ku Ingito
mukunwa mema a mu Ndonga ya Nailo?
Vikajo ukawanao akuya ku Asilya
mukunwa mema a mu Ndonga ya Yufuleti?
19Vuvi vwove vukakuhisa yove vavenya
omwo unatundu kuli yange.
Ngecivene, ukalilongesa vuvi na vunyengwe,
akuseza yange Kalunga Njambi yove,
kujeneka kunjisingimika.
Yange Kalunga wa Akamwa ya Vyoshe,
Muka-nzili yoshe, njinendekamo.”
Isalele avyana kulemesa Shukulu Kalunga
20Shukulu Kalunga wa Akamwa ya Vyoshe
alinakwendeka ngwendi,
“Isalele, ku san̄ulu yove wanjisezele
nakupokola vikumiiyo vyoshe
vije vyakele akati kove nange,
wavyanene kunjononoka nakunjilemesa.
Oloni a malundu oshe amalaja,
na mu minzinze ya miti yoshe yakutonola,
walemesele vinjambi vakujeneka seo.
21Yange njakukunine kupwa mukolovozi
wa vushuka vwa vinyu wauvwa,
wa ku mbuto yaivwa manene.
Cooni unatenguluka vatijo kupwa
mukolovozi wakuvola wakujeneka seo?
22Nameme wajwelesele njapau ya nzili manene,
oloni anga njicimona mapwata-mapwata
a milonga yove.
23Vatijo wendeka ngwove kuwalijwalesele
nameme kulemesa Mbale?
Oloni anuka muje muwalingile vuvi mu cana,
kenga vije viwunalingi.
Yove unalifu ngwe kamelo wa lwavo
uje ali na lishungu,
ashatukila noku-noku mu mambo
omwo ya lishungu lyendi,
24kamelo wa cifwa eci iyajo asa kumupangula?
Nkomba naumo wai ayanda akumushakezeka,
omwo simbu yoshe yakulonda
nkomba amuwana mukwasiwa.
25Isalele, kesi ujukise mendi ove,
nambe mulivu wove kesi uminine na lihwila,
kushatozoka noku-noku mukulemesa vinjambi veka.
Oloni yove wendeka ngwove,
‘Embwe kunjasa kwiluka kunima.
Njinashaka laja vinjambi veka,
co njikavakavangeya.’ ”
Isalele napande kutambula cihiso
26Shukulu Kalunga alinakwendeka ngwendi, “Ngwe mwizi mwakashauka omo vanamukwata, ngecivene, yeni voshe vanu va Isalele, vimyene veni, na vakulunu veni, na vaka-kukombelela veni, na vaka-kwimanena veni vakamishawisa, 27voshe vaje vendeka ngwavo muti wapwa ishweni, co limanya lyapwa vanyoko. Eci cikalingiwa omwo munatundu kuli yange, kumwelukile kuli yange embwe. Oloni omo muli mu tuyando, co munjilomba ngeci njimikwase.
28“Vali kulijo vinjambi vaje mwalishongelele? Vanapande kumyamena, omo muli mu tuyando! Yunda, yove uli na vinjambi vavangi ngwe muuli na vinganda vyavingi. 29Vikajo ulinyenga? Omwo vikajo munanjitengulukila nakunjilwisa? 30Njaminyanyamesele, oloni kucamikwasele ngeci mwa ndumba wa vukalu, yeni mwatsiile vaka-kwimanena vange. 31Vanu va Isalele, tolilileni vinjendeka. Kuma yange njamisezele mu mambo, nambe kumifwika na lisusulungu ndi? Omwo vikajo mwendeka ngweni mukalinga ngwe mucamivwasela, ngweni kumukelukila lalo kuli yange? 32Kuma shombolwa asa kwivala vyakuzala vyendi vya senga, nambe cikoveyo cendi ca vushombolwa ndi? Oloni vanu vange vananjivala matangwa amangi manene. 33Mwa vushunga mwazivuka mwamuvwa kukavangeya cizemo. Nameme vanakazi vakavilinga vyavivi vasa kumitembunwina. 34Vuzalo vweni vuli na vipesa vya maninga kesi maninga a vezi vaka-kutuva vinjuvo embwe, oloni na maninga a tuutu na vanu vaka-kujeneka mulonga.
“Oloni a vyoshe evi, 35mwendeka ngweni, ‘Kutwesi na mulonga, mwa vushunga Shukulu Kalunga, kaluvalele netu.’ Oloni yange Kalunga, njimihisa omwo munavyana ngweni kumwalingile vuvi. 36Omwo vikajo mulinakutengulwila vingila vyeni akukavangeya vinjambi va miyati yeka? Vaka-Ingito vakamizivisa shwamwa, ngwe muvamizivisile shwamwa vaka-Asilya. 37Mukatunda lalo mu Ingito na shwamwa. Yange Kalunga, njinavyana vaje vamwakulaela, nacimo cai mukawana kuli vakevo.”
Currently Selected:
Njelemiya 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006