Hangai 1
1
Shukulu Kalunga ashika ngeci vatungulule Njuvo yendi
1 #
Eze 4:24—5:2; 6:14 Mu mwaka wamucivali omo Ndalyuse wapwile mwene wa Pelesha, a litangwa lyakulivanga ku ngonde yamucitanu na imo,#1:1 NDALYUSE WAPWILE MWENE WA PELESHA...NGONDE YAMUCITANU NA IMO: Ngonde ya Elule ya vingonde vya vaHevelu kutunda akati ka Kashukwe nakweta akati ka Kapepo, Ndalyuse wapwile mwene mu mwaka wamucivali mu 520 BC. Shukulu Kalunga walekele Hangai muka-kwimanena ngeci endeke majwi awa kuli Zelumbambele nguvulu wa mu Yunda, muna Sheyaletiyele, na kuli Yoshwa Muka-kukombelela Wakama, muna Yehozandake.
2Shukulu Kalunga Muka-nzili yoshe wendekele kuli Hangai ngwendi, “Vanu ava vendeka ngwavo eyi kesi ikeyo simbu yaivwa yakutungulula Njuvo ya Shukulu Kalunga.” 3Shukulu Kalunga waanene majwi awa kuli Hangai muka-kwimanena ngeci aleke vanu ngwendi, 4“Vanu vange, omwo vikajo mulinakukala mu vinjuvo vyakutunga mwamuvwa, oku Njuvo yange inaviya? 5Kumwesi nakumona vije vilinakulingiwa ali yeni? 6Yeni mwalimine vimbuto vyavingi manene, oloni mwatejele vyavindondo lika. Muli na vyakulya ngeci mulye, oloni kumwapwisilemo ngeci mukute. Muli na vinyu ngeci munwe, oloni kumwapwisilemo ngeci mupende! Mulinakuzala, oloni kumwesi nakuziva ntwima embwe. Co lalo muka-kupanga kesi nakuwana cuma cakumuyoyesa. 7Kuma yeni kumwesi nakumona ngeci omwo vikajo vyuma evi vilinakulingiwa? 8Ololo lamateni ku malundu mukashakeko mavaya, ngeci mwakutungulule Njuvo yange, asinoni cikanjivwasa, co mukanjilemesa ngwe mucanjipande.
9“Mwashakele kuteja vimbuto vyavingi manene, oloni vyapwile vyavindondo. Omo mwanenele vije vimwatejele kwimbo, co njavipekumwine. Omwo vikajo njalingile ngacije? Omwo Njuvo yange yasiwukile, munu na munu naungama na vipangi vyakutunga njuvo yendi. 10Omu mukemwo mwamono kukwesi nyonzi, co nacimo cai casa kumena. 11Njinanene lilanga mu lifuti na a malundu, na mu mahya a vimbuto, na mu vitungu vya mikolovozi ya vushuka vwa vinyu, na mu mahya a miti ya olive, na a vimbuto vyoshe vije vikamene asi, na a vanu na a tusitu, na a vyuma vyoshe vimukuna.”
Vanu vononoka lishiko lya Shukulu Kalunga
12Asinoni Zelumbambele na Yoshwa, na vanu voshe vaje velukile kutunda ku vunzinda ku Mbambilone, vononokele majwi a Shukulu Kalunga Njambi yavo. Vakele na lyova, co vononokele Hangai muka-kwimanena, muluwa wa Shukulu Kalunga. 13Asinoni Hangai walekele vanu majwi a Shukulu Kalunga ngwendi, “Njikakala amo neni, eci cikeco cikulaeso cange.” 14Shukulu Kalunga watakamesele munu na munu kupanga vipangi vya ku Njuvo ya Shukulu Kalunga, Zelumbambele, nguvulu wa mu Yunda, na Yoshwa, Muka-kukombelela Wakama, na vanu voshe vaje vatundile ku vunzinda. Vashangumukile kupanga ku Njuvo ya Shukulu Kalunga Muka-nzili yoshe, Njambi yavo. 15Co vipangi vyashangumukile a litangwa lyamumakumi avali na awana ku ngonde yamucitanu na imo ku mwaka wamucivali omo Ndalyuse wapwile mwene.
Currently Selected:
Hangai 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006