Zakaliya 10
10
Shukulu Kalunga akulaesa kwamena
1Lombeni nyonzi kuli Shukulu Kalunga a simbu ya nyangao. Ikeye Shukulu Kalunga muka-kutuma mashelwa a nyonzi ya vusuku-mbundu, mukuzivalesa vimbuto vya mu mahya a munu na munu. 2Vanu vakai nakwihula ku tumponya na kuli vaka-kulukiya, oloni kukumbulula kwavo kwapwa kwangoco na makuli. Vamo vakalumbununa vinjozi, oloni vamitanganesa lika, kuzembeleka kuje vakamwesa kwapwa kwangoco. Ngecivene, vanu vakalyendanganena ngoco ngwe vimanga kuvesi na kanyungi. Vali mu vushonde omwo kuvesi na ntwama.
3Shukulu Kalunga alinakwendeka ngwendi, “Njinaluvala na vaka-kwija vaje valinakushwana vanu vange, co njikavanyanyamesa. Vanu va mu Yunda vanapu vange, co yange Kalunga Muka-nzili yoshe, njikavanyunga. Vakapwa ngwe tuvalu vange va nzili va nzita. 4Akati kavo akatunda vaka-kushwana, na vantwama, na vaka-kushika mukushwana vanu vange. 5Vanu va mu Yunda vakahyana ngwe mashwalale valyatangela vitozi vavo ngwe lindova lya mu vitapalo. Vakalwa omwo Shukulu Kalunga akakala amo navo, co vakafungulula nameme vitozi vavo vaka-kwendela a tuvalu.
6“Vanu va mu Yunda njikavapwisa vaka-nzili,
njikapatula vanu va mu Isalele.
Njikavazivila ngozi,
co voshe njikavelwisa kwimbo.
Vakapwa ngwe vaje kunjavyanene.
Yange njapwa Kalunga Njambi yavo,
njikakumbulula malombelo avo.
7Vanu va mu Isalele vakapwa vaka-nzili
ngwe mashwalale,
vakavwaelela ngwe vanu vananu vinyu.
Vatekulwila vavo vakanuka kuhyana oku,
co vakavwaelela omwo a vije
vyanalingi Shukulu Kalunga.
8“Njikasana vanu vange
nakuvakungulwila amolika.
Njikavapatula,
co njikavapwisa vavangi ngwe muvapwile laja.
9Nameme njavashandwela akati ka miyati ya vanu,
oloni ku mitambela yakulyala kuje vali vakanjanuka.
Vakevo na vana vavo vakayoya,
co vakeluka mumolika kwimbo.
10Njikavatundisa ku Ingito
na ku Asilya nakuvelwisa kwimbo,
co vakatunga mu lifuti lyavo.
Vakakala lalo mu Ngilyande na mu Lembanone,
lifuti lyoshe likashula na vanu.
11Omo vakaita mu mema a kalunga a tuyando,
yange Kalunga njikolwesa mankimba,
co Ndonga ya Nailo ikauma cau.
VaAsilya vaka-kulyalesa vakalikeesa,
co nzili ya Ingito ikahwa.
12Vanu vange vakapwa vaka-nzili,
vakanjilemesa nakunjononoka.”
Mwanendeka Shukulu Kalunga.
Currently Selected:
Zakaliya 10: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
