Lute 4
4
Mbowasi ambata Lute
1Asinoni Mbowasi waile ku mwela wakukungulukila ku cikolo ca mu nganda, co watumbamene mu mbanja. Cooni kavushoko ka Elimeleke wa a mbunge, uje yatumbwile Mbowasi, wezile. Ngecivene, Mbowasi wamusanene ngwendi, “Ndolome yange ija utumbame kuno.” Co watumbamene. 2Asinoni Mbowasi wasanene vakulunu likumi va mu nganda, wavalombele ngeci navo lalo vatumbame. Omo vatumbamene, 3Mbowasi wendekele kuli kavushoko kendi ngwendi, “Naumi naija kutunda ku Mowavi, ashaka kulandesa lihya lya ndolome yetu Elimeleke, 4njinakuleke ngeci uzivuke omwo yove wapwa kavushoko kendi wa a mbunge. Cooni nga ulishaka lilande ku mesho a mbunga ya vakulunu ava vanatumbama kuno. Oloni nga kuulishaka, endeka, omwo yove uli na moko yakulilanda akulivanga asinoni yange.”
Co uje munalume wendekele ngwendi, “Njikalilanda.”
5Mbowasi wendekele ngwendi, “Mwamuvwa nga yove ulanda lije lihya kuli Naumi, co lalo ambatela kumo na uje fwile Lute kaMowavi, ngeci lihya lisale mu mavoko a vavushoko vwa mutsi.”
6Co uje munalume wamukumbulwile ngwendi, “Nga ngoconi, co eli lihya kunjasa kulilanda, omwo eci cikapwa cangoco, amo vana vange kuvakasa kulishwana. Cooni lilande yove, nga yangeni shange!”
7A matangwa aje kuvatula vin̄anda vyakukula vyuma nambe kulandakana vufuko, uje muka-kulandesa ikeye ashomona n̄aku ku lindi lyendi, co ayana kuli uje muka-kulanda. Mukemwo vakele nakulinga vaIsalele mukumwesa ngeci vin̄anda vinahu.
8 #
Kwi 25:9
Ngecivene, uje munalume wendekele kuli Mbowasi ngwendi, “Lilande yove,” co washomwene n̄aku ku lindi lyendi nakuyana kuli Mbowasi. 9Asinoni Mbowasi wendekele kuli vantwama na kuli voshe vaje vakele kuje ngwendi, “Ku litangwa lya lelo yeni voshe munapu vakaleo, yange njinalanda kuli Naumi vyuma vyoshe vije vyapwile vya Elimeleke, nevi vya vana vendi va vanalume, Kilyone na Mahelone. 10#Kwi 25:5-6 Amo na Lute kaMowavi, fwile ya Mahelone, njimwambata oni apwe munakazi wange. Eci cikapwa kunyunga vufuko vwa naanga ya mutsi mu mavoko a vavushoko vwendi, co na naanga yendi anga vakakala akati ka vavushoko vwendi na mu nganda yendi. Co ku litangwa lya lelo yeni voshe munapu vakaleo.”
11 #
Kus 29:31
Asinoni vaje vantwama na veka vakele kuje vamukumbulwile ngwavo, “Eyo, yetu tunapu vakaleo. Shukulu Kalunga apwise munakazi wove ngwe Lakele na Leya, vaje vapwile vakukulwila va cikota ca Isalele. Upwe muka-kufuka mu cikota ca Efaleta nakutsimana mu Mbetelehema. 12#Kus 38:27-30 Naanga yove ipwe ngwe naanga ya Peleze muna Tamale na Yunda.”
Mbowasi na vatekulwila vendi
13Ngecivene, Mbowasi wambatele Lute, co Shukulu Kalunga wavezikisile Lute, wakele na kafumba, wakitile mwana wa munalume. 14Co vanakazi vendekele kuli Naumi ngwavo, “Shukulu Kalunga ku litangwa lya lelo nakwana mutekulu wa munalume wakukunyunga. Mwana ou apwe wa lutsimo mu Isalele! 15Vanyokomweno ava vakuzema manene, vanatuvakana vana va vanalume vatanu na vavali. Co ololo nakwana mutekulu wa munalume uje akasangula lizina lyove nakukwana kuvwaelela mu vukulukazi vwove.”
16Naumi wambatele mwana, wamukambekele a nulo yendi, wamulelele.
17Vanakazi vaje muvalyatelele valukile mwana lizina lya Ovende. Co valekele vanu voshe ngwavo, “Kuli Naumi kunasemuka mwana wa munalume.”
Ovende ikeye ishe ya Njesi, uje wakitile Ndaviti.
18Eyi ikeyo naanga ya Peleze, Peleze wakitile Hezelone, 19Hezelone wakitile Lama, 20co Lama wakitile Aminandave, Aminandave wakitile Naheshone, Naheshone wakitile Salemone, 21Salemone wakitile Mbowasi, Mbowasi wakitile Ovende, 22co Ovende wakitile Njesi, na Njesi wakitile Ndaviti.
The Bible in Mbunda ©The Bible Society of Zambia, 2006