Loma 5

Kutupwisa vaka-vushunga ku mesho a Njambi

1Ngecivene, omo vanatupwisa vaka-vushunga ku mesho a Njambi akukulaela, co tuli mu kwoloka#5:1 TULI MU KWOLOKA: Kununguluka kumo ngwavo, tunapande kukala mu kwoloka. na Njambi ali Mwene yetu Yesu Kilistu. 2Ali ikeye natulingisa ngeci tuzivuke kutetela kwa Njambi, kuje tulinakuyoyela ololo. Co tulinakulishasha mu cinyangavili tulinaco cakutambula vumpau vwa Njambi! 3Tuli lalo nakulishasha#5:3 TULI LALO NAKULISHASHA: Nambe, tunapande lalo kulishasha. a tuyando twetu, omwo tunazivuka ngwetu tuyando tusholola lukakateya, 4co lukakateya lulingisa ngeci Njambi atutambule, co eci kutambula ca Njambi cinena cinyangavili. 5Co cinyangavili eci kucasa kutuzivisa shwamwa, omwo Njambi netila cizemo cendi mu vimbunge vyetu ali Munzinzime Wakujela, ikeye napu vwana vwa Njambi kuli yetu.

6Omwo a simbu ije twapwile tuvakuzeya, Kilistu watsililile vaka-vuvi a simbu ije yaangwile Njambi. 7Omwo cinapu cuma cacikalu manene kuwana munu atava kutsila muka-vushunga. Amo casa kupwa cacasi kuwana munu uje atava kutsila munu wamuvwa. 8Oloni Njambi nasholola cizemo cendi cakama kuli yetu, omo a simbu ije twapwile tu vaka-vuvi Kilistu watutsililile!

9A n̄ombelo ya kutsa kwendi ololo vanatupwisa vaka-vushunga ku mesho a Njambi, ngecivene, cikahyana manene Kilistu kutwamena ku vukalu vwa Njambi! 10Omwo twapwile tu vitozi va Njambi, oloni natupwisa vasamba vendi a kutsa kwa Munendi. Ololo omo tunapu vasamba va Njambi, tukovoka a mwonyo wa Kilistu! 11Oloni kesi evi lika embwe, tujolela omwo a vije vyanalingi Njambi ali Mwene yetu Yesu Kilistu, uje ololo natupwisa vasamba va Njambi.

Andama na Kilistu

12 # Kus 3:6 Ngecivene, vuvi vwezile ano a kaye ali munu umolika, co vuvi vwendi vunanene kutsa. Co kutsa kunete ku miyati yoshe ya vanu omwo voshe vanalingi vuvi. 13Vuvi vwakele mu kaye simbu kanda vaane Lishiko, oloni kuje kukwesi lishiko, vuvi kuvavulava nalumo lwai. 14Oloni kutunda ku simbu ya Andama nakweta ku simbu ya Mosesa, kutsa kwashwanene a vanu voshe, nameme ali vaje kuvalingile vuvi ngwe mwalingile Andama omo kononokele lishiko lya Njambi.

Andama wapwile cimweso ca uje akaija. 15Oloni vwana vuje kuvwafwile ngwe kuvulumuna, omwo vwana vwa Njambi kuvwalifwile ngwe vuvi vwa Andama embwe. Mwa vushunga vene vanu vavangi vanatsi omwo vuvi vwa munu umolika. Oloni kutetela kwa Njambi kwakama manene, co na vwana vwendi vwakujeneka kupangela vuje vwanaana kuli vanu vavangi mu kutetela kwa munu uje umolika, ikeye Yesu Kilistu vunapu lalo vwakama manene. 16Co kuli kutepesa akati ka vwana vwa Njambi na vuvi vwa munu umolika. Munima ya vuvi vumolika, kwezile kusompa kwa “Kuhisa”, oloni munima ya vivi vyavingi, kunaija vwana vwakujeneka kupangela vwa “Kusambesa!” 17Mwa vushunga a vuvi vwa munu umolika kutsa kwashwanene omwo uje munu umolika. Oloni vyuma vije vinasholoka vyanalingi uje munu umolika, ikeye Yesu Kilistu vinahyana manene! Voshe vaje vanatambula kutetela kwa Njambi kwa myaka yoshe vanavapwisa vaka-vushunga ku mesho endi vakashwana mu mwonyo ali Kilistu.

18Ngecivene, ngwe a vuvi vumo vanu voshe vanavahisa, mu ngila eyi vene cipangi cimolika ca vushunga cinapatula vanu voshe nakuvana mwonyo. 19Co ngwe omo vanu voshe vavapwisile vaka-vuvi akujeneka kwononoka kwa munu umolika, mu ngila eyi vene voshe vakavapwisa vaka-vushunga ku mesho a Njambi akwononoka kwa munu umolika.

20Lishiko lyasholokele ngeci vilinga vya kupenga-penga vitume, oloni kuje vuvi vwatumine, kutetela kwa Njambi kwatumine manene. 21Ngecivene, ngwe omo vuvi vwashwanene a kutsa, ngeci lalo kutetela kwa Njambi kulinakushwana a vushunga, nakututwamenena ku mwonyo wa myaka yoshe ali Yesu Kilistu Mwene yetu.

Currently Selected:

Loma 5: MBB

Highlight

Copy