Kujombolola 5
5
Livulu lyakuzenga na Muna Manga
1 #
Ezek 2:9-10; Isa 29:11 Co njamwene livulu lyakuzenga mu livoko lya cilyo lya uje watumbamene a litanda, lije livasoneka anja na mukati, co valishokele na tusateso tutanu na tuvali. 2Co njamwene kangelo wa nzili uje wambulwile nakutambeka na lijwi lyakama ngwendi, “Iyajo nafwila kuvatula otu tusateso nakufukula eli livulu?” 3Oloni naumo wai ivawanene mwilu, nameme ano asi, nameme mwisi lya kaye,#5:3 MWISI LYA KAYE: Vukalo vwa vatsi (kenga 1:18, 6:8). uje asa kufukula lije livulu nakukenga vili mukati kalyo. 4Co njalilile manene nakusikoka omwo kuvasele kuwana umo uje nafwila kufukula lije livulu nameme kukengamo. 5#Kus 49:9; Isa 11:1,10 Asinoni umo wa vaje vakulunu wendekele kuli yange ngwendi, “Kesi ulile. Kenga! Ndumba wakutunda ku muyati wa Yunda, naanga yakama ya kuli Ndaviti, ikeye nahyana, co asa kuvatula tusateso otu tutanu na tuvali nakufukula eli livulu.”
6 #
Isa 53:7; Zak 4:10 Asinoni njamwene Muna Manga nemana mukati ka litanda, vaje vikashama vawana vakuyoya na vakulunu vamuzengelekele. Co Muna Manga washolokele ngwe uje ivanatsii. Wakele na vimbinga vitanu na vivali na mesho atanu na avali, evi vinapu minzinzime itanu na ivali ya Njambi ije ivatumine asi oshe. 7Muna Manga wakatukile nakunona lije livulu mu livoko lya cilyo lya uje watumbamene a litanda. 8#Mya 141:2 Omo walingile ngacije, co vaje vikashama vawana vakuyoya na vakulunu makumi avali na vawana valyumbilile kulutwe lwa Muna Manga. Co umo na umo wakwatele kalyalya na malonga a ngolinde ashulile na insense, evi vikevyo vyapwa malombelo a vanu va Njambi. 9#Mya 33:3; 98:1; Isa 42:10 Co vembile mwaso wauha ngwavo,
“Yove wafwila kwambata eli livulu
nakuvatula tusateso twalyo.
Omwo vakutsiile, co a kutsa kwove
wakulile vanu na maninga ove kuli Njambi,
vakutunda ku miyati yoshe na ku vindaka vyoshe
na ku mafuti oshe na ku vanu voshe.
10 #
Kut 19:6; Kuj 1:6 Co unavapwisa vumwene vwa vaka-kukombelela
mukupangela Njambi yetu,
co vakashwana ano asi.”
11 #
Ndan 7:10
Njakengele lalo, co njazivile tungelo vavangi-vangi mameme! Vemanene nakuzengeleka litanda, na vaje vikashama vawana akuyoya, na vakulunu, 12co vembile na majwi akukangoka ngwavo,
“Wafwila Muna Manga uje ivatsiile kutambula nzili
na vufuko na mana na vukama na kasingimiko
na vumpau na kushangazala!”
13Co njazivile vyakutanga vyoshe vili mwilu na asi na mwisi lya kaye na mu mema a kalunga na vyakuyoya vyoshe vya kaye, co vikevyo vyembile ngwavyo,
“Kuli uje natumbama a litanda
na kuli Muna Manga,
kukale kushangazala na kasingimiko na vumpau na nzili,
ku myaka yoshe!”
14Co vaje vikashama vawana vakuyoya vakumbulwile ngwavo, “Ewa!” Co vaje vakulunu valyumbilile asi nakulemesa.
The Bible in Mbunda ©The Bible Society of Zambia, 2006