Kujombolola 1
1
1Mu livulu eli vanasonekamo vyuma vije vyajombolwele Yesu Kilistu. Njambi wamwanene kujomboloka oku ngeci avisholole kuli vangamba va Njambi vije vikalingiwa vwasi-vwasi. Kilistu wajombolwele vyuma evi kuli ngamba yendi Yowano akutuma kangelo kendi kuli ikeye, 2co Yowano nambulula vyoshe vije vyamwene. Ovu vukevwo vukaleo vwendi kupwisa ku muzimbu watundile kuli Njambi na vushunga vuje vwajombolwele ali Yesu Kilistu. 3Kuvwaelela kuli uje alinakulava eli livulu, co lalo kuvwaelela kuli vaje vatolilila ku majwi a muzimbu wa vuka-kwimanena nakwononoka vije vivanasoneka mu livulu eli! Omwo simbu ili muyehi omo vyoshe evi vikalingiwa.
Viindu ku vikungulukilo vitanu na vivali
4 #
Kut 3:14; Kuj 4:5 Viindu vyakutunda kuli Yowano vyakutuma ku vikungulukilo vije vitanu na vivali vya mu lifuti lya Asiya.
Kutetela na kwoloka vyakutunda kuli Njambi ou aliko na uje wakeleko, co na uje akaija, vipwe vyeni, co vinatundu lalo kuli minzinzime ije itanu na ivali ili kulutwe lwa litanda lyendi, 5#Isa 55:4; Mya 89:27 na kuli Yesu Kilistu, mukaleo wa vushunga, mushoke wakulivanga kusanguka ku kutsa, co uje lalo muka-kushwana vimyene va ano a kaye.
Watuzema, co a n̄ombelo ya kutsa kwendi natupatula ku vivi vyetu, 6#Kut 19:6; Kuj 5:10 co natupwisa vumwene vwa vaka-kukombelela mukupangela Njambi na Ishe. Kuli Yesu Kilistu kukale vumpau na nzili ku myaka yoshe! Ewa.
7 #
Ndan 7:13; Mat 24:30; Mak 13:26; Luk 21:27; 1 Tes 4:17; Zak 12:10; Yow 19:34,37 Kengeni, alinakwija a mashelwa! Vanu voshe vakamumona, amolika na vaje vamutivile makunga. Miyati yoshe ya ano asi vakalila mbimbi-mitwe omo vakamumona. Mwa vushunga cikapwa ngacije vene! Ewa.
8 #
Kuj 22:13; Kut 3:14 “Yange wakulivanga na muka-kukotokela,” mwanendeka Shukulu Kalunga Njambi Muka-nzili yoshe, uje aliko na uje wakeleko na uje akaija.
Cimona ca Kilistu
9Yange Yowano, ndolome yeni, co akupwa ndongisi ya Yesu njili amo neni na lukakateya mu n̄avava ije ilinakwija kuli vaje vanakundama ku Vumwene vwendi. Vanjakele a lin̄anda lya Patimose omwo njambulwile lijwi lya Njambi lya vushunga vuje vwasholwele Yesu. 10A litangwa lya Mwene njakele mu Munzinzime, co njazivile lijwi lyakama, lyalifwile ngwe cililimo ca lupembo, lyendekele munima yange. 11Lyendekele ngwalyo, “Soneka vyoshe vije umona, co tuma livulu ku vikungulukilo evi vili mu vinganda vitanu na vivali, Efeso na Simina na Pelengamu na Tiyatila na Salendisiya na Filandelufiya na Laondisiya.”
12Njatengulukile nakukenga kunima kumona iyajo uje wakele nakwendeka nange, co njamwene vitumbikilo vya vindeya vya ngolinde vitanu na vivali, 13#Ndan 7:13; 10:5 co akati kavyo emanene umo uje walifwile ngwe muna munu, wazalele cikoveyo cacilaja cakweta na ku myanja yendi, na mwiva wa ngolinde unazengeleka mu nulo yendi. 14#Ndan 7:9; 10:6 Na vin̄ambu vyendi vyatokele too ngwe vwanda, nambe ngwe mbundu, na mesho endi ahyahyatele ngwe mulangi wa tuhya, 15#Ezek 1:24; 43:2 mendi endi avyazimine ngwe vutale vwa vunengu vucitunda mu lutengo lwakama vuje vwakukwita mufwitilo, na cilumo ca lijwi lyendi califwile ngwe mema a nzili aa cipupa. 16Ikeye wakwatele vingongonosi vitanu na vivali mu livoko lyendi lya cilyo, co mu kanwa kendi mwatuukile moko ya mukwale ya vuvela kuvali. Cihanga cendi cavyazimine ngwe misha ya litangwa lya akati ka mutwe. 17#Isa 44:6; 48:12; Kuj 2:8; 22:13 Omo njamumwene, njawililile ku myanja yendi ngwe munu wa kutsa. Co wakambekele livoko lyendi lya cilyo ali yange, co wendekele ngwendi, “Kesi uzive lyova! Yange wakulivanga na wakukotokela. 18Yange muka-kuyoya! Njatsile, oloni kenga, njilinakuyoya ku myaka yoshe. Njili na moko yakutuvakana kutsa na vukalo vwa vatsi. 19Ngecivene, soneka vyuma vyoshe vije umona, vyoshe vyuma vije viliko ololo, na vyuma vije vikakalako kulutwe munima yevi. 20Eci cikeco kulumbunuka kwa cisin̄iko ca vingongonosi vitanu na vivali vije unamono mu livoko lyange lya cilyo, na vitumbikilo vya vindeya vya ngolinde vitanu na vivali, vingongonosi vitanu na vivali vinapu tungelo va vije vikungulukilo vitanu na vivali, co vitumbikilo vya vindeya vitanu na vivali vinapu vije vikungulukilo vitanu na vivali.”
The Bible in Mbunda ©The Bible Society of Zambia, 2006