Myaso 7
7
Lilombelo lya vushunga
Mwaso wembile Ndaviti kuli Shukulu Kalunga omwo ya Kushe kaMbenjemani
1Yove Shukulu Kalunga Njambi yange,
muli yove mukemwo njiwana kuvanda,
njamene nakunjipatula kuli voshe vaje valinakunjisheka,
2nga kuulingimo,
co vanjitatuvula nakunjisanyozola
vipuka-vipuka ngwe vindumba,
co naumo wai anjamena.
3Yove Shukulu Kalunga Njambi yange,
nga njinaviisila musamba wange,
nga njinende vungungu musamba,
4nambe kuzivila
citozi cange mema ku mbunge,
nga njinalingi vyuma evi,
5co tava vitozi vange vanjisheke nakunjikwata.
Vatave ngeci vanjilyatangele nakunjitsiya,
nakunjiseza asi.
6Yove Shukulu Kalunga,
luvala nakulinga cuma cimo,
lwisa vitozi vange vaje vanaluvala nange,
mona ngeci vushunga vulinakulingiwa.
7Mbunga ya vanu voshe valikungulwile kuli yove,
omo utumbama a litanda lyove lya vumwene.
8Shukulu Kalunga, yove lyaako wa vanu voshe.
Njisompe nakuwana ngeci yange kunjesi na mulonga.
9 #
Kuj 2:23
Yove u Njambi wa vushunga,
wilula viyongola vyetu na vizango vyetu.
Vindika vilinga vya vanu vya kupenga-penga,
oloni nyunga voshe vaka-kukwononoka.
10Njambi ikeye ntelo yange,
ikeye muka-kwamena vaje voshe valinga vya vushunga.
11Njambi wapwa lyaako wa vushunga,
co simbu yoshe akahisi vaka-vuvi.
12Nga vaka-vuvi kuvatenguluka
ku vilinga vyavo vyavivi,
co Njambi akotola moko yendi ya mukwale,
nakulema vuta vwendi vwa lusipa,
13nakuvwaesela cimweja nakunana mikili yendi
ya milangi ya tuhya.
14Kengeni vaka-vuvi muvakayongwelamo vuvi,
vayongola vingila mwakulingila vuvi,
nakwendeka makuli.
15Vanu va cifwa eci valinakunjeseka,
co kweseka kwavo kuvelukile vakevo vavenya!
16Vilinga vyavo vyavivi,
vikavelukila vakevo vavenya.
17Njikandelela kuli Shukulu Kalunga,
omwo ya vushunga vwendi,
njikaimba myaso yakushangazala
Shukulu Kalunga,
wa Akamwa ya Akamwa.
The Bible in Mbunda ©The Bible Society of Zambia, 2006