Myaso 52
52
Kusompa kwa Njambi na mema ku mbunge
Mwaso wa Ndaviti, omo Ndoenge kaEndome wezile nakuleka Saulu ngwendi, “Ndaviti naija ku njuvo ya Ahimeleki.” (1 Sam 22:9-10)
1Omwo vikajo ulyalesela a vuvi yove cingenyenye?
Cizemo ca Njambi cakala simbu yoshe.
2Utumba matumbe akuviisa vakweni,
co ndaka yove inapu ngwe moko ya mbeli.
Simbu yoshe u muka-kutunga makuli.
3Uzema manene vuvi kutuvakana vuvwa,
co uzema manene makuli
kutuvakana kwendeka vushunga.
Yove muka-makuli,
4wazema manene kwendeka majwi
akuvavalesa vakweni ku vimbunge!
5Ngecivene, Njambi akakunyongesa ku myaka yoshe,
ikeye akakwambata nakukukokela anja ya njuvo yove,
co akakutundisa mu lifuti lya vaka-kuyoya.
6Vanu vaka-vushunga vakacimona,
co vakaziva lyova,
asinoni vakakujola, nakwendeka ngwavo,
7“Kengeni, munalume ou kakulaelele Njambi,
oloni wakulaelele vufuko vwendi vwavungi,
nakunyongesa vakwavo na muuka!”
8Oloni yange njikakala mwamuvwa
mu Njuvo ya Shukulu Kalunga
ngwe muti wakutonola wa olive
uje wamena mu Njuvo ya Shukulu Kalunga,
njinakulaela mu cizemo ca Njambi
cije kucesi kutenguluka ku myaka yoshe.
9Njikakukandelela yove Njambi ku myaka yoshe,
omwo vije viwunalingi ku mesho a vanu vove,
co njikambulula ngeci yove wapwa uwamuvwa.
The Bible in Mbunda ©The Bible Society of Zambia, 2006