Myaso 145
145
Mwaso wakushangazala
Mwaso wa Ndaviti
1Njikakwalesa Njambi yange na mwene yange,
njikashangazala lizina lyove ku myaka yoshe.
2A litangwa na litangwa njikakushangazala,
nakwalesa lizina lyove ku myaka yoshe.
3Shukulu Kalunga wapwa wakama,
co vanapande kumushangazala manene,
naumo wai asa kuzivuka vukama vwendi.
4Cisemwa na cisemwa cikashangazala
vyuma vije viwunalingi,
vakambulula vipangi vyove vya nzili.
5Vanu vakambulula vumpau vwove, na vulemu vwove,
co yange njikayongola a vilinga vyove vyakukomokesa.
6Vanu vakendeka a vilinga vyove vya nzili,
co yange njikambulula a vukama vwove.
7Vanu vakendeka vyavuvwa vwove vwoshe,
nakwimba a ngozi yove.
8Shukulu Kalunga ikeye muka-kutetela
na mema ku mbunge,
kesi kuluvala vwasi,
oloni washula na cizemo
cije kucesi kutenguluka.
9Shukulu Kalunga wapwa wamuvwa kuli voshe,
muka-kutetela vyuma vyoshe vije vyatangele.
10Vitanga vyove vyoshe vikakushangazala
Shukulu Kalunga,
na vaka-kujela vove voshe vakakwalesa.
11Vakendeka vya vumpau vwa vumwene vwove,
nakwambulula a nzili yove,
12ngecivene, vanu voshe vakazivuke vilinga vyove vya nzili,
na vumpau vwa vumwene vwove.
13Vumwene vwove vwapwa vwa ku myaka yoshe,
co yove wapwa u mwene wa ku myaka yoshe.
Shukulu Kalunga wapwa muka-vushunga
ku cikulaeso cendi,
wapwa lalo wa cizemo ku vyoshe vije vyatangele.
14Ikeye muka-kukwasa voshe vaje vali mu tuyando,
nakwana lalo nzili kuli voshe vaje vanazeye.
15Vyuma vyoshe vyakuyoya vilinakukenga
na cinyangavili kuli yove,
co yove uvana vyakulya a simbu yaivwa.
16Yove uvana vyakulya vyakupwisamo,
nakuvakutisa voshe na vyakulya.
17Shukulu Kalunga wapwa wa vushunga
mu vyuma vyendi vyoshe vyakalingi,
wakala na mema ku mbunge mu vilinga vyendi vyoshe.
18Ikeye ali muyehi na vanu vaje voshe
vatambeka kuli ikeye,
vanu vaje vatambeka kuli ikeye mu vushunga.
19Ikeye akutisa vizango vya vaje vamukomoka,
aziva mitambi yavo, co avamena.
20Shukulu Kalunga akanyungu
voshe vaje vamuzema,
oloni vaka-vuvi akavanyongesa.
21Shukulu Kalunga,
simbu yoshe njikakushangazala,
vyuma vyoshe vije vyanatanga
vishangazale lizina lyendi
lyakujela ku myaka yoshe!
The Bible in Mbunda ©The Bible Society of Zambia, 2006