Myaso 124
124
Njambi ikeye kanyungi ka vanu vendi
Mwaso wa Ndaviti
1Nga Shukulu Kalunga kakele ku mutambela wetu,
Isalele vendeke ngwavo,
2“Nga Shukulu Kalunga kakele ku mutambela wetu,
omo vitozi vetu vatulwisile,
3nga vatutsiile tuvavoshe omwo ya vukalu vwavo vwakama
ali yetu,
4nga vatuungumwinine kulyala ngwe livazi,
nga vatukupwile ngwe mema,
5na mankimba akama nga atukupwile.”
6Tushangazaleni Shukulu Kalunga,
uje watwovwele ku vitozi vetu.
7Tunaputumuka ngwe kazila
natundu mu mweto wa ciyambi,
mweto unashutuka,
co tunaputumukamo!
8Vukwasi vwetu vutunda kuli Shukulu Kalunga,
uje watangele lilu na asi.
The Bible in Mbunda ©The Bible Society of Zambia, 2006