Myaso 12
12
Lilombelo lyakukwasa
Mwaso wa Ndaviti
1Yove Shukulu Kalunga,
tukwase omwo kukwesi vanu
va vushunga lalo vanasalao,
co kutwasa kuwana lalo vanu va kulongwa.
2Vanu voshe valinakwendeka makuli kuli umo na mukwavo,
nakulikwisa umo na mukwavo na vyuma vyakuseveleka.
3Yove Shukulu Kalunga,
olwesa majwi a vaka-kuseveleka,
co shoka tunwa twa vaka-kulishasha!
Vaje vendeka ngwavo,
4“Na majwi etu tuwana vije vitushaka.
Twendeka mwoshe mutushakela,
co naumo wai atuvindika.”
5Shukulu Kalunga alinakwendeka ngwendi,
“Oloni ololo njilinakwija,
omwo tuutu valinakuvayandesa,
na vaka-kuyanda valinakulinyenga omwo tuyando.
Njikavanyunga ku tuyando twavo.”
6Vikulaeso vya Shukulu Kalunga vyapwa vya vushunga,
vinapu vyavivwa ngwe siliva yakujelesa mu lutengo
visimbu vitanu na vivali.
7Simbu yoshe tunyunge yove Shukulu Kalunga,
co tuvingilikiye ku vanu va cifwa cangacije.
8Vaka-vuvi vali kwoshe-ikwoshe,
co vanu voshe valinakushangala vyuma vije vyavivi.
The Bible in Mbunda ©The Bible Society of Zambia, 2006