Myaso 115
115
Njambi lika ikeye muka-vushunga
1Kuli yove lika Shukulu Kalunga, kuli yove lika,
kesi kuli yetu, vanapande kwana vumpau,
omwo cizemo cove cije kucesi kutenguluka,
na kulongwa kwove.
2Omwo vikajo vanu vatwihula ngwavo,
“Njambi yeni ali kulijo?”
3Njambi yetu ali mwilu, akalingi vyoshe vije ashaka.
4Tumponya va miyati yeka vanapu vakupanga na siliva
na ngolinde,
vanapu vakumunga na mavoko a vanu.
5Vali na tunwa, oloni kuvasa kwendeka,
vali na mesho, oloni kuvasa kumona.
6Vali na matwi, oloni kuvasa kuziva,
vali na majulu, oloni kuvasa kuziva kunika.
7Vali na mavoko, oloni kuvasa kukwata,
vali na mendi, oloni kuvasa kwenda,
co lalo kuvasa kutuula lijwi.
8 #
Mya 135:15-18; Kuj 9:20 Voshe vaje vapangele ava tumponya
nakukulaela kuli vakevo,
vapwe ngwe ava tumponya vavanapanga!
9Vanu va Isalele kulaeleni kuli Shukulu Kalunga,
ikeye muka-kumikwasa na muka-kuminyunga.
10Yeni vaka-kukombelela va Njambi,
kulaeleni kuli Shukulu Kalunga,
ikeye muka-kumikwasa na muka-kuminyunga.
11Yeni voshe vaka-kulemesa Shukulu Kalunga,
kulaeleni kuli ikeye,
ikeye muka-kumikwasa na muka-kuminyunga.
12Shukulu Kalunga akatwanuka nakutuvezikisa,
akavezikisa vanu va Isalele,
nakuvezikisa lalo voshe vaka-kukombelela va Njambi.
13 #
Kuj 11:18; 19:5 Shukulu Kalunga akavezikisa voshe vaje vamulemesa,
vakama nambe vavandondo.
14Shukulu Kalunga amitumise manene,
yeni na vatekulwila veni.
15Shukulu Kalunga uje watangele lilu na asi amivezikise.
16Lilu lya melu lyapwa lya Shukulu Kalunga,
oloni kaye wakaanene ku vanu.
17Vatsi kuvasa kushangazala Shukulu Kalunga,
nambe woshe uje aya mu vukalo vwa vatsi,
kasa kushangazala Shukulu Kalunga.
18Oloni yetu tulinakuyoya,
tushangazaleni Shukulu Kalunga,
ku simbu ino na ku myaka yoshe.
Shangazaleni Shukulu Kalunga!
The Bible in Mbunda ©The Bible Society of Zambia, 2006