Kulava 9
9
Kunyunga Ciwano ca Pasovala camucivali
1Shukulu Kalunga wendekele kuli Mosesa mu mambo ya Sinai ku ngonde yakulivanga#9:1 NGONDE YAKULIVANGA: Livulu lya Kulava lyashangumuka mu ngonde yamucivali mu mwaka wamucivali (kenga 1:1), ngecivene, 9:1-5 yendeka a Ciwano ca Pasovala cije calingiwile laja. mu mwaka wamucivali omo vanu va Isalele vanatundu laja mu Ingito ngwendi, 2“Vanu va Isalele vanapande kunyunga Ciwano ca Pasovala a simbu yaco ivemika. 3Kushangumuka a litangwa lyamulikumi na awana ku ngonde eyi vene#9:3 KU NGONDE EYI VENE: Ngonde ya Avive (ikeye lalo ngonde ya Nisane), mu ciHevelu inapu ngonde yakulivanga, kutunda akati ka Kuwana nakweta akati ka Kuhu. ku cingwezi, mukacinyunga a simbu yaco ivemika ngwe ku mashiko aco oshe na vilongesa vyaco vyoshe.” 4Ngecivene, Mosesa walekele vanu va Isalele kunyunga Ciwano ca Pasovala. 5#Kut 12:1-13 Co vanyungile Ciwano ca Pasovala mu mambo ya Sinai ku ngonde yakulivanga a litangwa lyamulikumi na awana ku cingwezi. Co vanu va Isalele valingile vyuma vyoshe ngwe muje vene mwashikile Shukulu Kalunga kuli Mosesa.
6Oloni kwakele vanu vamo kuvajelele ngwe ku mashiko a Mosesa omwo vakwatele a civimbi, co kuvasele kunyunga litangwa lya Ciwano ca Pasovala. Vezile kuli Mosesa na Alone a litangwa lije vene 7vendekele ngwavo, “Yetu kutwajelele omwo twakwatele a civimbi, omwo vikajo vanatuvindikila ngwavo kutwasa kukombelela n̄ombelo kuli Shukulu Kalunga amolika na vanu va Isalele a simbu yaco?”
8Co Mosesa wavakumbulwile ngwendi, “Vandameneni tai njikazive vika ovyo vyakanjishika Shukulu Kalunga ali yeni.”
9Shukulu Kalunga wendekele kuli Mosesa ngwendi, 10“Leka vanu va Isalele ngwove, oloni nga umo weni nambe mutekulwila weni kajelele akukwata a civimbi, nambe ali mu vungenzi vwa kulyala, anga napande kunyunga Ciwano ca Pasovala. 11Vanamitavesa kucinyunga ku ngonde yamucivali, ku cingwezi ca litangwa lyamulikumi na awana. Co mukalya ciwano na makende akujeneka musima na visapa-sapa vyakulula. 12#Kut 12:46; Yow 19:36 Kesi vakasezeo vyakulya vimo noo ku mutondo nambe kupokolao citsiya cimo ca cimuna. Vakanyunge lika Ciwano ca Pasovala ngwe ku mashiko aco oshe. 13Oloni nga munu najele, co kesi mu vungenzi ikeye alikela kunyunga Ciwano ca Pasovala, co kuvakamulava lalo kupwa umo wa vanu vange embwe, omwo ikeye kakombelelele n̄ombelo kuli yange a simbu yaco. Co uje munu ngongo yendi vavenya.
14“Nga muka-kwija alinakukala akati keni ashaka kunyunga Ciwano ca Pasovala, ikeye napande kucinyunga ngwe kukushika kwa lishiko lyaco. Lishiko eli valimikila munu na munu, nambe muka-kwija nambe vavenya lifuti.”
Lishelwa lya tuhya akamwa ya Mbalaka Mwakuliwanena
(Kut 40:34-38)
15A litangwa lije omo vashimbikile Mbalaka Mwakuliwanena, lishelwa lyaifwikile, co ku cingwezi lyakele akamwa ya Mbalaka, lyasholokele ngwe tuhya noo ku mutondo. 16Ngecivene, lije lishelwa lyakeleo simbu yoshe, co ku vutsiki lyasholokele ngwe tuhya. 17Oshe aje alitundila lishelwa akamwa ya Mbalaka, co vanu va Isalele vajalukile muje mu cilombo, co vakashimbikile lalo cilombo cavo oshe aje alyemanene. 18Vanu va Isalele vakele nakujaluka mu cilombo cavo omo Shukulu Kalunga avashika. Omo avashika lalo, co vatumbamene mu cilombo simbu yoshe ije lishelwa lyakele akamwa ya Mbalaka Mwakuliwanena. 19Omo lishelwa lyakele matangwa amangi akamwa ya Mbalaka, co vanu va Isalele vononokele lishiko lya Shukulu Kalunga, co kuvasele kujalukamo. 20Visimbu vimo lije lishelwa lyakele lika matangwa amandondo akamwa ya Mbalaka, omo Shukulu Kalunga avashika, co vatumbamene mu cilombo, co omo Shukulu Kalunga avashika lalo, co vajalukilemo. 21Visimbu vimo lishelwa lyakeleo kutunda ku cingwezi nakweta ku mutondo, co omo lishelwa lyatundileo ku mutondo vajalukilemo. 22Nameme lishelwa lyakeleo matangwa avali, nambe ngonde, nambe mwaka, nambe simbu yakama, vanu va Isalele anga vatumbamene mu cilombo, kuvajalukilemo. Oloni omo lishelwa lyatundileo, co vajalukilemo. 23Omo Shukulu Kalunga avashika, co vatumbamene mu cilombo, co omo Shukulu Kalunga avashika lalo, co vajalukilemo, co vononokele lishiko lije lyashikile Shukulu Kalunga kuli Mosesa.
Currently Selected:
Kulava 9: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
