Kulava 5
5
Vanu vakujeneka kujela ngwe ku mashiko a Mosesa vavatuwisa mu cilombo
1Shukulu Kalunga wendekele kuli Mosesa ngwendi, 2“Shika vanu va Isalele vatuwise munu woshe mu cilombo uje ali na mushongo wa a cikonde wakulitambwisa nambe mushongo wakususula, nambe munu woshe uje kajelele akwata a civimbi. 3Tuwiseni vanalume na vanakazi vaje vanajwala vaye anja ya cilombo, ngeci mu cilombo cavo, muje munjakala akati ka vanu vange mupwe mwakujela.” 4Ngecivene, vanu va Isalele vononokele, co vavatuwisile mu cilombo voshe vaje kuvajelele, ngwe muje mwashikile Shukulu Kalunga kuli Mosesa.
Lishiko lyakuliilwisila a kuvulumuna
5Shukulu Kalunga wendekele kuli Mosesa ngwendi, 6“Endeka kuli vanu va Isalele ngwove, omo munalume nambe munakazi avulumwina mukwavo, navulumwina yange Kalunga, 7munu wa cifwa eci napande kulitavela vuvi vwendi vwanavulumuna nakufweta mulonga woshe, co awezeleleko litambelo lya ndando makumi avali nakufwetela uje yanavulumwina. 8Oloni nga uje munu natsi kesi na kavushoko kendi wa a mbunge uje asa kutambula fweto ya mulonga, co ije fweto ikapwa ya Shukulu Kalunga, co vakayane kuli muka-kukombelela amo na lijamba lya manga mukujelesa vuvi vwa uje munu muka-mulonga. 9Ngecivene, milambu yoshe yakujela ije ivakatwala vaIsalele kuli Shukulu Kalunga ikapwa ya muka-kukombelela. 10Vyuma vyoshe vyakujela vya munu vikapwa vyendi vavenya, oloni vyoshe vije aana munu kuli muka-kukombelela vikapwa vya muka-kukombelela vene.”
Mashiko a lifuwa lyakuyongwela
11Asinoni Shukulu Kalunga wendekele kuli Mosesa ngwendi, 12“Endeka kuli vanu va Isalele ngwove, nga munakazi wa munu asevuka nakujeneka kulongwa kuli munalume wendi 13a kulala na munalume weka, co vanavishweke ku mesho a munalume wendi, co uje munakazi nalijwalesa ikeye vavenya, oloni kukwesi mukaleo wakumwambulula, omwo ikeye kuvamukwatele mu cilinga cije. 14Cooni nga munalume wendi nazivi lifuwa lyakuyongwela munakazi wendi ngwe nalingi vuvi, oloni kesi na vukaleo, 15asinoni uje munalume akatwale munakazi wendi kuli muka-kukombelela. Ikeye lalo napande kwambata n̄ombelo ya vinganja vivali vya vunga vwa mbale ya maumwa,#5:15 MBALE YA MAUMWA: Mbale ya maumwa inalifu na masha akuvenga. oloni kesi etileo mazi a olive nambe kwakao insense yakunika lwengo lwaluvwa, omwo inapu n̄ombelo ya vimbuto yakutunda ku lifuwa lya munalume, mukwanukilao vuvi.
16“Muka-kukombelela akatwale uje munakazi nakumwimika kulutwe lwa mutula. 17Co aketile mema akujela mu lilonga lya vuma, akajomone livu lya mu Mbalaka Mwakuliwanena, akalyake mu mema ngeci alule. 18Asinoni muka-kukombelela akashakulula vin̄ambu vya munakazi nakwaka n̄ombelo ya vunga vwa mbale ya maumwa mu mavoko endi. Co muka-kukombelela akakwate lilonga lije lili na mema akulula aje anena cisingo. 19Asinoni muka-kukombelela akasinge uje munakazi, co akendeke ngwendi, ‘Nga kuwalingile vupangala, co kuuvulumuka ku cisingo eci cisholoka mu mema awa. 20Oloni nga unalingi vupangala, 21Shukulu Kalunga asinge lizina lyove akati ka vavushoko vwove. Co ukapwa muka-kujombwesa limbo nameme kushoka shivu. 22Mema awa a cisingo alinakukovela mwimo lyove akupwise muka-kujombwesa limbo nameme kukushoka shivu.’ ”
Co uje munakazi akakumbulule ngwendi, “Njatava, Shukulu Kalunga alinge ngacije.”
23“Asinoni uje muka-kukombelela akasoneke vije visingo mu livulu, co aake vije visoneka mu mema akulula a muje mu lilonga. 24Co akanwise uje munakazi mema akulula a cisingo, co aje mema a cisingo akakovela mwimo lyendi nakumuvinjisa. 25Co muka-kukombelela akanone ije n̄ombelo ya lifuwa ya vunga vwa mbale ya maumwa mu mavoko a uje munakazi, na kuyikundika kuli Shukulu Kalunga, nakuyitwala ku mutula. 26Asinoni muka-kukombelela akajomonao livoko lyakushula lya n̄ombelo ya vunga vwa mbale ya maumwa kupwa canukiso nakuyenyekela a mutula. Akumanesa, akanwise mema uje munakazi. 27Nga ikeye nalingi vupangala, co aje mema a cisingo akamuvinjisa manene, co uje munakazi akapwa muka-kujombwesa limbo nameme shivu yendi ikashoka, na lizina lyendi likapwa lyakusinga akati ka vavushoko vwendi. 28Oloni nga ikeye kaliviisile napu wakujela, kakasa kuvulumuka oloni akasa kukita vana.
29“Eli likelyo lishiko lya lifuwa omo munakazi uje ali na munalume wendi asevuka nakuliviisa ikeye vavenya, 30nambe omo lifuwa lya munalume lyakuyongwela munakazi wendi ngwendi nalingi vupangala limuwana, akatwale uje munakazi ku mesho a Shukulu Kalunga. Co muka-kukombelela akalinge nendi mwoshe muje mwaila lishiko eli. 31Co munalume akasamba ku vuvi vuje, oloni munakazi nga ali na mulonga, co ngongo yendi ikeye vavenya.”
Currently Selected:
Kulava 5: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
