Kulava 20
20
Vije vyalingiwile ku Kandeshe
(Kut 17:1-7)
1Ku ngonde yakulivanga mbunga yoshe ya vanu va Isalele vetele ku mambo ya Zine, co vatungile cilombo ku Kandeshe. Kuje kwatsililile Milyamu, co vamutsindile kuje vene.
2Co kukwakele mema kuje vatulilile, ngecivene, vanu va Isalele voshe valikungulwile nakulinyenyetela kuli Mosesa na Alone. 3Vanu valinyenyetelele kuli Mosesa vendekele ngwavo, “Mwamuvwa vene nga netu twatsililile kulutwe lwa Mbalaka ya Shukulu Kalunga ngwe muje vatsile vavushoko vwetu va Isalele! 4Omo vikajo mwatunenelele muno mu mambo ngeci twakutsilemo amo na vimuna vetu! 5Omo vikajo mwatutundisilile mu Ingito nakutunena ku mutambela uno wakuviya ngeci, muno kumwesi nevi vyakumenamo vyai. Muno kumwesi vimbuto, kumwesi mikuyu, kumwesi mikolovozi ya vushuka vwa vinyu, kumwesi mapomingilanete! Kumwesi nambe mema akunwa ayi!” 6Asinoni Mosesa na Alone vatundile ku mbunga ya vanu, vaile ku cikolo ca Mbalaka Mwakuliwanena. Valyumbilile asi, co vumpau vwa Shukulu Kalunga vwavasholokelele.
7Shukulu Kalunga wendekele kuli Mosesa ngwendi, 8“Ambata mulamu uje uli kulutwe lwa Cikasa ca Cikumiiyo, co yove na ndolome yove Alone kungululeni mbunga yoshe ya vanu va Isalele. Endekeni ku limanya lije lili kuje ku mesho avo, ngeci mema atunde mu limanya lije. Mu ngila eyi ukatuwisa mema mu limanya akunwa vanu na vimuna vavo.” 9Mosesa wambatele uje mulamu, ngwe muje mwamushikile Shukulu Kalunga.
10Mosesa na Alone vakungulwile mbunga yoshe ya vanu va Isalele kuje ku limanya, co Mosesa wendekele kuli vakevo ngwendi, “Tolilileni, yeni vaka-kutengulukila Shukulu Kalunga! Kuma tunapande tumituwisile mema mu limanya eli ndi?” 11Co Mosesa wajundwile uje mulamu nakupupa aje a limanya visimbu vivali, co kwatuukile muta wa mema, co vanu voshe, na vimuna vavo vanwile. 12Oloni Shukulu Kalunga wendekele kuli Mosesa na Alone ngwendi, “Yange njapwa wakujela, oloni kumwakulaelele nakunjisingimika ku mesho a vanu va Isalele. Ngecivene, kumukasa kukovelesa mbunga eyi mu lifuti lije njavakulaesele kuvana.”
13Evi vyalingiwile kuje ku Meliva,#20:13 MELIVA: Eli lizina mu ciHevelu linanunguluka ngwalyo, kulinyenyeta. kuje vanu va Isalele valinyenyetele nakutengulukila Shukulu Kalunga, co kuje lalo Shukulu Kalunga walimwesele ngeci wapwa wakujela akati kavo.
Mwene wa Endome avindika vaIsalele kwita mu lifuti lyendi
14Co ku Kandeshe Mosesa watumine tunganda kuli mwene wa ku Endome ngwendi, “Ndolome yove Isalele nendeka ngwendi, ‘Yove wazivuka vukalu vwoshe vutwayandele, 15ngwe omo vakukulwila vetu vaile ku Ingito twakele kuje myaka yaingi. Vaka-Ingito vayandesele vakukulwila vetu amo netu, 16twatambekele kuli Shukulu Kalunga ngeci atukwase, co wazivile mutambi wetu, watumine kangelo uje watutwamenenene kututundisa mu Ingito. Co ololo tuli ku Kandeshe, nganda ije ili ku nginga ya lifuti lyove. 17Ngecivene, tutave twakulombo shukulu twite mu lifuti lyove. Yetu na vimuna vetu kutukatundu mu tapalo, nambe kuya mu mahya eni, nambe mu vitungu vyeni vya mikolovozi ya vushuka vwa vinyu, co kutukanu lalo mema a mu masima eni. Tukenda lika mu tapalo ya mwene#20:17 MU TAPALO YA MWENE: Nambe, mu tapalo ya mbunga. noo tukatuuka mu lifuti lyove.’ ”
18Oloni vaEndome vakumbulwile ngwavo, “Shetu, tunavyana kwita mu lifuti lyetu! Nga mwesekamo, co twakumilwisa.”
19Co vanu va Isalele vendekele navo ngwavo, “Yetu tukenda lika mu tapalo, co nga yetu nambe vimuna vetu vanwa ku mema eni, co tukamifweta. Cumalika citushaka, twite mu lifuti lyeni.”
20VaEndome velukililemo lalo ngwavo, “Shetu! Tunavyana!” Co vakevo vaile na mbunga yakama ya Mashwalale va nzili kukalwisa vanu va Isalele. 21Omu mukemwo muvavyanenene vaEndome vaIsalele kwita mu lifuti lyavo, ngecivene, vaIsalele velukile nakuya ngila yeka.
Kutsa kwa Alone
22Mbunga yoshe ya Isalele vatundile ku Kandeshe, vetele ku Munkinda wa Hole. 23Ku Munkinda wa Hole ku nginga ya Endome, Shukulu Kalunga wendekele kuli Mosesa na Alone ngwendi, 24“Alone kakakovela mu lifuti lije linjakulaesele Isalele kuvanalyo, oloni ikeye akatsa, omwo muvuvali vweni mwatengulukilile nakulwisa mashiko ange ku Meliva. 25Twala Alone na munendi Elyazale ku Munkinda wa Hole, 26co kuje shulula Alone vuzalo vwa vuka-kukombelela, uvuzike munendi Elyazale, omwo Alone akatsila kuje vene.” 27Co Mosesa walingile vije vyamushikile Shukulu Kalunga. Valamatele ku Munkinda wa Hole ku mesho a mbunga yoshe. 28#Kut 29:29; Kul 33:38; Kwi 10:6 Aje vene Mosesa washulwile Alone vuzalo vwa vuka-kukombelela, co wavuzikile munendi Elyazale. Akamwa ya munkinda uje vene akeo atsililile Alone. Asinoni Mosesa na Elyazale vashelumukile kutunda ku munkinda. 29Mbunga yoshe vanangukile ngwavo Alone nakatsa vene, co mbunga yoshe ya vanu va Isalele vamulilile matangwa makumi atatu.
Currently Selected:
Kulava 20: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
