Kulava 17
17
Mulamu wa Alone
1Co Shukulu Kalunga wendekele kuli Mosesa ngwendi, 2“Leka vanu va Isalele vakwane milamu likumi na ivali, ku muyati umo na umo vakwane umo. Co soneka lizina lya munu na munu a mulamu wendi, 3co soneka lizina lya Alone a mulamu uje unemanena Levi. Ntwama na ntwama akale na mulamu wa muyati wa vakukulwila vendi. 4Asinoni twala milamu ku Mbalaka Mwakuliwanena ukayake kulutwe lwa Cikasa ca Cikumiiyo, kuje kunjikaliwana neni. 5Co mulamu wa munalume uje injikaangula ukajovelela. Mu ngila eyi njikamanesa kulinyenyeta kwa vanu va Isalele kuje vakalinyenyetela kuli yeni.”
6Ngecivene, Mosesa walekele vanu va Isalele, co vantwama vavo voshe vamwanene milamu yavo, umo ku ntwama na ntwama ngwe ku vakukulwila vavo, milamu yoshe amo na mulamu wa Alone yapwile likumi na ivali. 7Asinoni Mosesa watulikile milamu yoshe mu Mbalaka Mwakuliwanena kulutwe lwa Cikasa ca Cikumiiyo.
8Alikaki, Mosesa wakovelele mu Mbalaka Mwakuliwanena, co wamwene mulamu wa Alone uje wemanenene muyati wa Levi, unajovelela, uli na mavundungulu, unashamwina vishani, co unemi vushuka vwakuhya vwa alumonde! 9Mosesa watuwisile milamu yoshe, co waimwesele kuli vanu va Isalele voshe. Co vamwene vije vyalingiwile, asinoni ntwama na ntwama wanonele mulamu wendi. 10#VaHe 9:4 Co Shukulu Kalunga wendekele kuli Mosesa ngwendi, “Ilwisa mulamu wa Alone kulutwe lwa Cikasa ca Cikumiiyo. Vaunyunge kupwa cizivukiso kuli vanu va Isalele ca vaka-kulitengulukila. Eci cikamanesa kulinyenyeta kwavo kuje valinakulinyenyetela kuli yange, ngeci kesi vatse.” 11Mu ngila eyi Mosesa walingile ngwe muje mwamushikile Shukulu Kalunga.
12Co vanu va Isalele vendekele kuli Mosesa ngwavo, “Kenga! Tutsa! Tunyonga, tuziluka tuvavoshe! 13Nga woshe ashwenya kuyehi na Mbalaka ya Shukulu Kalunga akatsa, tuvavoshe tuli mu vushonde vwa kutsa!”
Currently Selected:
Kulava 17: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
