Kulava 12
12
Milyamu vamunyanyamesa
1Milyamu na Alone vafweyele Mosesa omwo wambatele munakazi wa kaKushe.#12:1 KAKUSHE: Nambe, KaSundane, nambe, KaMindyani, (kenga Hambakuke 3:7). 2Co vendekele ngwavo, “Kuma Shukulu Kalunga wendekele muli Mosesa lika ndi? Kuma kendekele lalo na muli yetu ndi?” Co Shukulu Kalunga wazivile vije vendekele. 3Mosesa wapwile munu wa kulikeesa kutuvakana vanu voshe ano asi.
4Vwasi-vwasi Shukulu Kalunga wendekele kuli Mosesa na Alone na Milyamu ngwendi, “Ijeni kuno ku Mbalaka Mwakuliwanena yeni voshe muvutatu vweni.” Co voshe muvutatu vwavo vaileko. 5Asinoni Shukulu Kalunga washelumukilile mu manda ya lishelwa, wemanene ku cikolo ca Mbalaka, wasanene Alone na Milyamu. Co voshe vavali vaile kulutwe. 6Co Shukulu Kalunga wendekele ngwendi, “Njitolilileni evi njendeka! Nga kwali muka-kwimanena akati keni, yange Kalunga njilisholola kuli ikeye mu cimona nakwendeka nendi mu njozi, 7#VaHe 3:2 oloni kesi ngoco na ngamba yange Mosesa. Ikeye wapwa wa kulongwa, njinamwana moko ya vanu vange voshe va Isalele. 8Co njikendeka nendi citona-mesho kesi mu tusau embwe, na ikeye namono laja cifwa cange! Omwo vikajo kumwesi na lyova akufweya ngamba yange Mosesa?”
9Shukulu Kalunga waluvalele manene navo, ngeci watundile kuli vakevo. 10Co omo lishelwa lyatundile a Mbalaka, kengeni Milyamu wakele na mushongo wa mbumba. Omo Alone wamukengele wamwene ngeci ali na mbumba, 11Co wendekele kuli Mosesa ngwendi, “Mwane shukulu yange, kesi utuhise omwo tunalingi vya vulema nomu lalo tunalingi vuvi. 12Kesi utave ndokazi yetu apwe ngwe mutsi nambe ngwe mwana uje navolela mwimo lya vaina embwe.”
13Ngecivene, Mosesa walombelele kuli Shukulu Kalunga ngwendi, “Njakulombo yove Njambi ngwange umukangwise!” 14#Kul 5:2-3 Oloni Shukulu Kalunga wakumbulwile Mosesa ngwendi, “Nga ishe namwawilile,#12:14 NGA ISHE NAMWAWILILE: A simbu ije mu Isalele kwawila kwapwile kujekwila mate mu luholo. nga nakala matangwa atanu na avali na shwamwa ndi? Ngecivene, mutuwiseni akale anja ya cilombo matangwa atanu na avali, co kutundoo mwasa kumwilwisilamo lalo.” 15Milyamu vamutuwisile mu cilombo matangwa atanu na avali, co vanu kuvasele kujalukamo noo Milyamu welukile. 16Asinoni vanu vaIsalele vatundile ku Hazelote, vakashimbikile cilombo cavo mu mambo ya Palane.
Currently Selected:
Kulava 12: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
