Nahumi 2
2
Kuwa kwa Nenevayi
1Vaka-Nenevayi, valinakumilwisa!
Muka-kumilwisa uje ali na nzili yakuminyongesa naija mukumilwisa!
Nyungeni civumbe ca nganda!
Nyungeni tapalo!
Livwaeseleni cimweja nzita!
2(Shukulu Kalunga ashaka kwilwisa lalo vumpau vwa Isalele, ngwe muje muvwakeleko laja simbu kanda vitozi vendi vamupukule.)
3Vintelo vya mashwalale va vitozi vavikwiti
mufwitilo wakuvenga,
co vanazala vikoveyo vyakuvenga.
Vanalivwaesela kulwa!
Co matemba avo avyazima ngwe tuhya,
na tuvalu twavo vanalivwaesela cimweja.
4Matemba a tuvalu alinakushatozoka ngwe akuzaluka mu vitapalo,
alinakushatozoka noku-noku mu vipango vya nganda.
Avyazima ngwe mitetango ya tuhya,
nakutumbuka vwasi ngwe muhyato.
5Vamyata valinakuvasana,
valinakutanozoka omo vashwenya kulutwe.
Vaka-kulwisa vazambwila vwasi ku civumbe
nakwaka vintelo vya vyuma vimo vyakulikwasesa kuwisa civumbe.
6Vikolo vili ku ndonga vyashokoloka,
mu lipela mwoshe munashulu lyova.
7Vamwene valinakumutwala ku vunzinda,
vangamba vendi valinakulinyenga ngwe tumbovo nakulipika ku mitwe
kumwesa vusiwa vwavo.
8Vanu vatunda vwasi mu nganda ya Nenevayi
ngwe mema atunda mu lishali lyakusita omo linatuvika!
Co mutambi ngwawo, “Imaneni! Imaneni!”
Oloni naumo wai atenguluka.
9Pukuleni siliva!
Pukuleni ngolinde!
Nganda inashulu na vufuko!
10Nenevayi vanainyongesa, inapu ngundu, ili mupulungwa!
Vimbunge vinazeye na lyova, mavuli alinakujaja, nzili inahu, na vihanga vinafufutuka.
11Ilikulijo ololo nganda
ije yapwile ngwe mbulu ya vindumba,
mutambela uje vakelenakulila vindumba?
Kuje ndumba wa nkomba na ndumba wa lwavo vakele nakuya,
co vana vavo vakala kuje kujeneka vushonde?
12Ndumba wa nkomba watsiile kasitu,
co wamusanyozwelele lwavo lwendi na vana vendi vipuka-vipuka,
washulisile mbulu yendi na situ yakusanyozola.
13Shukulu Kalunga Muka-nzili yoshe alinakwendeka ngwendi, “Yange nji citozi ceni! Njikenyeka matemba eni. Mashwalale veni vakavatsiila mu nzita, co njikambata vyuma vyoshe vije vimwambatele kuli vakweni. Co majwi a miluwa veni kuvakawazivi lalo.
Currently Selected:
Nahumi 2: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
