Mateo 12

Cihula ca a Litangwa Lyakuhwima

(Mako 2:23-28; Luka 6:1-5)

1 # Kwi 23:25 A simbu ije vene, Yesu wetile mu mahya a tiliku a Litangwa Lyakuhwima. Vandongisi vendi vazivile njala, co vashangumukile kushutozola mitwe ya tiliku nakulya vinona. 2Oloni omo vaFaliseo vamwene ngacije, vamwihwile ngwavo, “Kenga, vandongisi vove valinakulinga evi lishiko kulitavesa kuvilinga a Litangwa Lyakuhwima!”

3 # 1 Sam 21:1-6 Yesu wavakumbulwile ngwendi, “Kuma kanda mulave vije vyalingile Ndaviti na vaje vakele amo nendi omo vazivile njala ndi? 4#VaLe 24:9 Wakovelele mu Njuvo ya Shukulu Kalunga, co ikeye na vanu vendi valile aje makende avakombelelele kuli Njambi, nameme kuwapandele kuwalya kuvanga vaka-kukombelela lika. 5#Kul 28:9-10 Nambe kanda mulave majwi a Lishiko a Mosesa ngwavo vaka-kukombelela vakazilula lishiko lya a Litangwa Lyakuhwima mu Njuvo ya Shukulu Kalunga, oloni kuvesi na mulonga? 6Njimileka ngwange, kucili cije cinatuvakana Njuvo ya Shukulu Kalunga. 7#Mat 9:13; Hoz 6:6 Visoneka vyendeka ngwavyo, ‘Yange njishaka kutetela, kunjishaka n̄ombelo ya tusitu.’ Nga mwazivukile mwamuvwa muwalumbunukila majwi awa, nga kumuhisa vaje kuvesi na mulonga. 8Omwo Muna Munu ikeye Mwene wa Litangwa Lyakuhwima.”

Munalume wakusekwa livoko

(Mako 3:1-6; Luka 6:6-11)

9Yesu watundile ku mutambela uje, co waile ku sinangonge yavo, 10co kuje kwakele munalume umo wakusekwa livoko. Co vamwihwile ngwavo, “Kuma mwamuvwa kukangwisa munu a Litangwa Lyakuhwima ndi?” Ngeci vamuwanene mulonga.

11 # Luk 14:5 Yesu wavakumbulwile ngwendi, “Vatijo nga umo akati keni nga ali na manga yendi umo, co uje manga awila mu mbulu a Litangwa Lyakuhwima? Kuma kamukwata amutundisemo ndi? 12Co munu ali na seo kutuvakana manga! Ngecivene, Lishiko lyetu litutavesa kukwasa munu a Litangwa Lyakuhwima.” 13Asinoni Yesu wendekele kuli uje munu ngwendi, “Olola livoko lyove.”

Co wolwele livoko lyendi, co lyakangukile nakupwa amo nalikwavo. 14Oloni vaFaliseo vatuukilemo, co vatumbile vutumbe vwakutsiya Yesu.

Ngamba ivanaangula kuli Njambi

15Omo Yesu wazivukile vya vutumbe vwakumutsiya, watundile kuje, co vanu vavangi vamukavele. Co wakangwisile vaka-kuvinja vavavangi, 16co wavashikile ngwendi kesi vamutsimanese. 17Eci cinapu kushulisa vije vyendekele Isaya muka-kwimanena ngwendi,

18 # Isa 42:1-4 “Kengeni, ngamba yange injinaangula

ou ikeye injazema,

ikeye muka-kunjivwaelelesa.

Njikaka Munzinzime wange ali ikeye,

co akambulula vushunga ku vaje kesi vaYunda.

19Kakakala na vimata, nambe kutambeka,

nambe kutendeka lijwi lyendi mu vitapalo embwe.

20Kakapokola lihongo lyakutepama,

nambe kuzima mulangi wakutsitsivala mu ndeya.

Akamona ngeci vushunga vunahyana vuvi.

21Co muli ikeye vanu voshe vaje kesi vaYunda

vakaka cinyangavili cavo muli ikeye.”

Yesu na Mbelezembulu mwene ya minzinzime yakujwala

(Mako 3:20-30; Luka 11:14-23)

22Asinoni vamunenelele munalume umo wa kapuputwa na vuveveve omwo wakele na munzinzime wakujwa. Yesu wamukangwisile, ngecivene, uje munalume wasele kumona nakwendeka. 23Co vimbunga vya vanu voshe valikomokelele a vije vyalingile Yesu, co vendekele ngwavo, “Kuma ou ikeye Muna Ndaviti ndi?”

24 # Mat 9:34; 10:25 Oloni omo vaFaliseo vavazivile, vendekele ngwavo, “Munalume ou alinakutundisa minzinzime yakujwala omwo ali na nzili yanamwana Mbelezembulu mwene ya minzinzime yakujwala.”

25Yesu wazivukile viyongola vyavo, ngecivene, wendekele kuli vakevo ngwendi, “Vumwene vwoshe vuje vulyangunuka mu vimunga nakulilwisa akati kavwo vukanyonga, co nganda nambe naanga yoshe ilyangunuka mu vimunga nakulilwisa akati kayo ikanyonga. 26Co nga Satana atundisa Satana, ikeye nalyangununa ikeye vavenya, vumwene vwendi vukakola vatijo? 27Yeni mwendeka ngweni yange njikatundisa minzinzime yakujwala omwo Mbelezembulu ikeye akanjana nzili yakulinga ngacije. Mukemwo vene njimihula ngwange iyajo alinakwana vanu veni nzili yakutundisa minzinzime yakujwala? Vije valinakulinga vanu veni vinapu vukaleo vwakumihisa! 28Kesi Mbelezembulu ikeye akanjana nzili yakutundisa minzinzime yakujwala embwe, oloni Munzinzime wa Njambi ikeye njikatundisa nendi minzinzime yakujwala, muzivuke ngeci Vumwene vwa Njambi vunete kuli yeni vene.

29“Naumo wai munu asa kukovela mu njuvo ya muka-nzili nakupukula vufuko vwendi, kuvanga alivange kukuta uje muka-nzili, asinoni akapukula vya mu njuvo yendi.

30 # Mak 9:40 “Woshe uje kesi amo nange, mwa vushunga vene ikeye muka-n̄ole yange, woshe uje kakungulula amo nange, mwa vushunga vene ikeye ashandola. 31Ngeciene njimileka ngwange, vivi vyoshe na kushaula kwoshe#12:31 VIVI VYOSHE NA KUSHAULA KWOSHE: Nambe, majwi amavi aje vendeka ali Njambi. vakavisambesa, oloni uje ashaula Munzinzime Wakujela kuvakamusambesa nalumo lwai. 32#Luk 12:10 Co woshe uje endeka lijwi limo lyakushaula Muna Munu vakamusambesa, oloni uje ashaula Munzinzime Wakujela kuvakamusambesa, nambe simbu ino, nambe simbu ya kulutwe.

Muti na vushuka vwawo

(Luka 6:43-45)

33 # Mat 7:20; Luk 6:44 “Kukala na muti wauvwa, co na vushuka vwawo vwavuvwa, nga muti vautumbula wauvi, na vushuka vwawo vwavuvi. Muti vauzivukila ku vushuka vwawo. 34#Mat 3:7; 23:33; 15:18; Luk 3:7; 6:45 Yeni muyati wa mambwambwa, vatijo mwasa kwendeka vyuma vyavivwa kuma yeni mwapwa mu vaka-vivi? Omwo kanwa kakendeka vije vyashula mu mbunge. 35Munu wamuvwa ikeye muka-kusholola vyuma vyavivwa ku vufuko vwendi vwavuvwa vwa mu mbunge, co munu wamuvi akasholola vyuma vyavivi ku vufuko vwendi vwavuvi vwa mu mbunge.

36“Yange njimileka a cuma eci ngwange, a Litangwa Lyakusompa munu woshe akalangulula majwi oshe angoco aje endekele. 37Omwo a majwi eni akewo vakamisompa nawo, nambe kumisambesa nambe kumihisa.”

Cihula ca cizivukiso

(Mako 8:11-12; Luka 11:29-32)

38 # Mat 16:1; Mak 8:11; Luk 11:16 Asinoni vamo valongisi va majwi a Lishiko na vaFaliseo vendekele nendi ngwavo, “Mulongisi, tushaka tukumone ulinga cizivukiso.”

39 # Mat 16:4; Mak 8:12 Oloni wavakumbulwile ngwendi, “Vanu vavavi va matangwa ano vakujeneka kukulaela vashaka lika cizivukiso, oloni cizivukiso nacimo cai mukamona kuvanga lika cizivukiso ca Yona muka-kwimanena. 40#Yon 1:17 Omwo ngwe Yona wakele matangwa atatu mutanya na vutsiki mwimo lya liisi lyakama, ngecivene, na Muna Munu lalo akakala matangwa atatu mutanya na vutsiki mwisi ya livu. 41#Yon 3:5 A Litangwa Lyakusompa vanu vaka-Nenevayi vakakatuka nakumihisa, omwo vakevo vatengulukile ku vingila vyavo vyavivi omo vazivile kwambulula kwa Yona, co njimileka ngwange, kuli cuma cimo kuno cakama cinatuvakana Yona! 42#1 Vim 10:1-10; 2 Miz 9:1-12 A Litangwa Lyakusompa Vamwene wa ku Shemba akakatuka nakumihisa, omwo ikeye watundile ku lifuti lyendi waile kuli Solomoni mukukatolilila vilongesa vyendi vya mana, co njimileka ngwange, kuli cuma cimo kuno cakama cinatuvakana Solomoni!

Kwiluka kwa munzinzime wakujwala

(Luka 11:24-26)

43“Omo munzinzime wakujwala utunda muli munu, co wita ku lifuti kukwesi mema nakukengezekako mutambela wakuhwimina. Nga kuwasa kuwanako mwela kuje, 44asinoni ulyendekesa ukewo vavenya ngwawo, ‘Njiiluka ku njuvo yange kuje kunjatundile,’ co omo uneluka uwana muje mu njuvo mwangoco, mwakukomba, co mwakujela. 45Asinoni uya nakunenelamo minzinzime yeka itanu na ivali yakujwala manene kutuvakana ukewo, ikovelamo nakutumbamamo. Co kuviya kwa munu uje kwakukotokela kukatuvakana kwakulivanga. Ngecivene, mucikapwa ku muyati ou wauvi wa vanu ava valelo.”

Vaina ya Yesu na vandolome vendi

(Mako 3:31-35; Luka 8:19-21)

46Omo wacikele nakwendeka na vimbunga vya vanu, kengeni vaina na vandolome vendi vemanene anja, vehwile ngwavo vendeke nendi. 47Ngecivene, munu umo wakele kuje wamulekele ngwendi, “Kenga, vanyoko na vandolome vove vanemana anja, co vashaka kwendeka nove.”#12:47 NGECIVENE, MUNU UMO...VASHAKA KWENDEKA NOVE: Kunungulula kumo vesi 47 yaimo.

48Oloni wakumbulwile uje munu ngwendi, “Vanana veyajo? Na vandolome vange veyajo?” 49Co wenikile vandongisi vendi wendekele ngwendi, “Kenga! Ava vakevo vanana na vandolome vange! 50Woshe uje alinga cizango ca Tate ali mwilu, ikeye vene napu ndolome yange, na ndokazi yange, na vanana.”

Currently Selected:

Mateo 12: MBB

Highlight

Copy