VaLevi 4
4
Milambu ya a vuvi vuje kesi vwa cizango
1Shukulu Kalunga washikile Mosesa 2aleke vanu va Isalele ngwendi, “Nga munu woshe uje alinga vuvi oloni kayongwele kuvulinga nakupokola lishiko limo lya mashiko a Shukulu Kalunga, napande kunyunga lishiko lyakukombelela a vuvi vwendi.
3“Nga Muka-kukombelela Wakama nalingi vuvi, co akokela mulonga vanu, akanene muna ngombe wa nkomba wakujeneka kapenga, co akamukombelele kuli Shukulu Kalunga a vuvi vwendi. 4Akanene uje ngombe wa nkomba ku cikolo ca Mbalaka, akakambeke livoko lyendi a mutwe wa uje cimuna, nakumutsiila ku mesho a Shukulu Kalunga. 5Asinoni Muka-kukombelela Wakama akambate maninga amo a uje ngombe wa nkomba nakuwanena mu Mbalaka Mwakuliwanena. 6Co akambwitike mulavo wendi mu maninga nakuwashamwina kulutwe lwa livamba lyakujela visimbu vitanu na vivali. 7Asinoni akakwite maninga amo ku vyakushongomoka vije vili mu vimbango vya mutula wa insense mu Mbalaka. Co ikeye aketile aje maninga anasalao kwisi ya mutula wakwenyekela vin̄ombelo, uje uli ku cikolo ca Mbalaka. 8Co a ngombe wa nkomba uje akatundiseo mazi oshe, na mazi a vya mwimo, 9na vinso, na mazi avyo, na mutambela wauvwa wa lishuli. 10Co muka-kukombelela akambate mazi awa nakuwenyekela a mutula wa milambu ya kwenyeka, ngwe mwakalingi na mazi akutundisa a cimuna wakutsiila a mulambu wa kulitombola. 11Oloni akambate cilambu ca uje cimuna, na situ yendi yoshe, na mutwe wendi, na mapondo endi, na vya mwimo vyendi kukumbasanako na mila, na vufwati vwayo, 12co akatwale ngombe woshe wamutunu anja ya cilombo ku mutambela wakujela kuje ku lishito lya lito, co akavyenyeke.
13“Nga mbunga yoshe ya Isalele valinga vuvi, oloni kuvayongwele kuvulinga, co vapokola lishiko limo lya mashiko a Shukulu Kalunga, 14asinoni omo vuvi vunasholoka nakuvuzivuka, co mbunga ikatwale muna ngombe wa nkomba kupwa mulambu wa a vuvi. Co vakamutwale ku Mbalaka Mwakuliwanena, 15vantwama va mbunga vakakambeke mavoko avo a mutwe wa uje cimuna, co vakamutsiile ku mesho a Shukulu Kalunga. 16Muka-kukombelela Wakama akatwale maninga amo a uje ngombe wa nkomba mu Mbalaka, 17akambwitike mulavo wendi mu maninga akawashamwine kulutwe lwa livamba visimbu vitanu na vivali. 18Co akakwite maninga amo ku vyakushongomoka vije vili mu vimbango vya mutula wa insense mukati ka Mbalaka, aje anasalao akawetile kwisi ya mutula wakwenyekela vin̄ombelo uje uli ku cikolo ca Mbalaka. 19Asinoni akambate mazi oshe a cimuna nakuwenyekela a mutula, 20co akalinge cuma cimo na ngombe wa nkomba ngwe mwalingile na ngombe wa nkomba uje wa mulambu wa a vuvi. Mu ngila eyi muka-kukombelela akavaambesa ku vuvi vwavo, co vakavasambesa. 21Asinoni akatwale uje ngombe wa nkomba anja ya cilombo nakumwenyeka, ngwe mwanenyekele uje ngombe wa nkomba yakombelelele a vuvi vwendi vavenya. Ou ukewo mulambu wakutundisa vuvi vwa mbunga.
22“Nga ikeye napu ntwama alinga vuvi oloni kayongwele kuvulinga, co apokola lishiko limo lya mashiko a Shukulu Kalunga, 23omo vuvi vwendi vunasholoka, co akanene lijamba lya membe wakujeneka kapenga kupwa mulambu wendi. 24Co akakambeke livoko lyendi a mutwe wa uje cimuna nakumutsiila ku kunto ya mutula, kuje vakatsiila vimuna va milambu ya kwenyeka. Ou ukewo mulambu wakutundisa vuvi. 25Co muka-kukombelela akambate maninga amo a mulambu wa a vuvi akambwitike mulavo wendi mu maninga a cimuna, akawakwite ku vyakushongomoka vije vili mu vimbango vya mutula, aje anasalao akawetile kwisi ya mutula. 26Asinoni akenyekele mazi oshe a cimuna a mutula, ngwe mwakenyeka mazi a vimuna vakutsiila a milambu ya kulitombola. Co mu ngila eyi muka-kukombelela akaambesa uje ntwama ku vuvi vwendi, co vakamusambesa.
27“Nga ikeye napu umo wa vanu nkala, uje alinga vuvi, oloni kayongwele kuvulinga, apokola lishiko limo lya mashiko a Shukulu Kalunga, 28co omo vuvi vwendi vunasholoka, akanene mulambu wa membe wa lwavo wakujeneka kapenga kupwa mulambu wendi. 29Co akakambeke livoko lyendi a mutwe wa uje cimuna nakumutsiila ku kunto ya mutula kuje vakatsiila vimuna va milambu ya kwenyeka. 30Co muka-kukombelela akambate maninga amo akambwitike mulavo wendi mu maninga a uje cimuna, akawakwite ku vyakushongomoka vije vili mu vimbango vya mutula, aje anasalao akawetile kwisi ya mutula. 31#Kul 15:27-28 Asinoni akatundise mazi oshe aa cimuna, ngwe muje akatundisa mazi a vimuna vakutsiila a milambu ya kulitombola, co akawenyekele a mutula, vweko vwa mulambu ou vukavwaelelesa Shukulu Kalunga. Mu ngila eyi muka-kukombelela akaambesa uje munu ku vuvi vwendi, co vakamusambesa.
32“Nga munu anena manga kupwa mulambu wa a vuvi, napande kupwa wa lwavo wakujeneka kapenga. 33Co ikeye akakambeke livoko lyendi a mutwe wa uje cimuna nakumutsiila ku kunto ya mutula kuje vakatsiila vimuna va milambu ya kwenyeka. 34Co muka-kukombelela akambate maninga amo akambwitike mulavo wendi mu maninga a uje cimuna, akawakwite ku vyakushongomoka vije vili mu vimbango vya mutula, aje anasalao akawetile kwisi ya mutula. 35Asinoni akatundise mazi oshe a cimuna, ngwe muje akatundisa mazi a vimanga vakutsiila a milambu ya kulitombola, co akawenyekele a mutula akamwa ya milambu ya vyakulya vyakulambula kuli Shukulu Kalunga. Mu ngila eyi muka-kukombelela akaambesa uje munu ku vuvi vwendi, co vakamusambesa.
Currently Selected:
VaLevi 4: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
