VaLevi 2
2
Milambu ya vimbuto vya vinona
1“Omo munu umo akalambula mulambu wa vimbuto vya vinona kuli Shukulu Kalunga, akulivanga napande kuvilola vunga vwavuvwa vwakuseneta. Co napande kwakao mazi a olive na insense, 2akayitwale kuli vaka-kukombelela va ka naanga ya Alone. Co muka-kukombelela akajomonao livoko lyakushula lya vunga, na mazi, na insense yoshe nakuvyenyekela a mutula kupwa cimweso ngeci vyoshe vanavikombelela kuli Shukulu Kalunga. Co vweko vwa mulambu ou wa vyakulya vukavwaelelesa Shukulu Kalunga. 3Co vije vikasalao ku mulambu ou wa vimbuto vya vinona vikapwa vya vaka-kukombelela, vikapwa vyakujela, omwo vikevyo vanavitundisa ku vyakulya vije vanalambula kuli Shukulu Kalunga.
4“Nga mulambu ou unapu wa makende akwoca a liko, vanapande kuwatika akujeneka musima. Anapande kupwa a mikasha ya kuhima yakulinga na vunga vwavuvwa vwakuseneta vwakutsingasana na mazi a olive, nambe tumashama-shama twakukwita na mazi a olive.
5“Nga ou mulambu wa vimbuto vya vinona unapu wa makende akwocela a cikango, anapande kupwa akulinga na vunga vwavuvwa vwakuseneta vwakutsingasana na mazi a olive, oloni akujeneka musima. 6Co akaapazule nakwitilao mazi kupwa mulambu wa vimbuto vya vinona.
7“Nga ou mulambu wa vimbuto vya vinona unapu wa mashama-shama akuteleka mu ndeo, vanapande kuwalinga na vunga vwakuseneta na mazi a olive. 8Akaanene kupwa mulambu wa vimbuto vya vinona kuli Shukulu Kalunga, co akaane kuli muka-kukombelela, ikeye akawatwala ku mutula. 9Co muka-kukombelela akanonako mutambela wa mulambu ou wa vimbuto vya vinona kupwa cimweso ngeci mulambu woshe vanaukombelela kuli Shukulu Kalunga, co ikeye akawenyekela a mutula. Co vweko vwa mulambu ou wa vyakulya vukavwaelelesa Shukulu Kalunga. 10Co vije vikasalao ku mulambu ou vikapwa vya vaka-kukombelela, vikapwa vyakujela, omwo vanavitundisa ku vyakulya vije vanakombelela kuli Shukulu Kalunga.
11“Kukwesi mulambu wa vimbuto vya vinona vije vimukanena kuli Shukulu Kalunga vimukalinga na musima. Kumwapandele kupangesa musima nambe vuki mu vyakulya vije vimukalambula kuli Shukulu Kalunga. 12Mulambu wa vimbuto vya mushoke vije vimukateja a mwaka na mwaka mukaunene kuli Shukulu Kalunga, oloni kesi mukawenyekele a mutula. 13Co a mulambu woshe wa vimbuto vya vinona munapande kutovao mwongwa, omwo mwongwa wimanena cikumiiyo akati keni na Njambi. (Munapande kutova mwongwa a milambu yeni yoshe.)
14“Omo munena mulambu wa vimbuto vya mushoke kuli Shukulu Kalunga, lambuleni vimbuto vyakwoca nambe vunga vwakulola. 15Tsingasaneniko mazi a olive, co akeniho insense. 16Muka-kukombelela akenyeka mutambela umo wa vunga, na mazi kupwa cimweso, amo na insense yoshe, kupwa mulambu wa vyakulya wakwana kuli Shukulu Kalunga.
Currently Selected:
VaLevi 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006